Abaramuzi 5 - Ebibulia 2001

Ekizina kya Debora na Baraki

¹ Kir'ekyo Debora na Baraki eya Abinoamu bazina bati,

² “Kubona okwo abebembezi bahabura Isiraeli, kubona okwo abantu bayehayo n'obweyendezi. Muhaisilize Omukama.

³ Muhulire inywe bakama, mutege amatwi inywe barangira; nzinire Omukama, nzinire Omukama Ruhanga wa Isiraeli ekizina kilikunura.

⁴ Waitu Mukama, orwo warugire Seiri, orwo warugire omu nsi ya Edomu, ensi ekatengeta, eiguru lyayoroba, ego, ebichwi byayagilira.

⁵ Amabanga gakatengeta omu maisho g'Omukama, nangu na Sinai elinya, omu maisho g'Omukama Ruhanga wa Isiraeli.

⁶ Omu biro bya Shamugari eya Anati, omu makiro ga Yaeli, emihanda ekaba etakirabwa, abagenzi batwarwaga ey'emparo.

⁷ Abatwazi bakachweka omuli Isiraeli; bakachweka, kuhika orwo waimukire, iwe Debora, orwo waimukire oli nyinabantu omuli Isiraeli.

⁸ Orwo baronzire baruhanga abahya, aho endashana yagoba omu bihigi. Engabo anga eichumu bikaba bitakiboneka, omu bukumi bunai bwa Isiraeli.

⁹ Omutima gwange nigurongotokera abakuru ba Isiraeli, abayehayo omu bantu n'obweyendezi. Muhaisilize Omukama.

¹⁰ Inywe abakuuba endogobe zilikwera, inywe abashuntama aha mikeka y'eiguzi; na inywe abagenza amaguru omu kihanda, mukigambeho.

¹¹ Muzine nk'okw'obona abashumba bali aha kyoshero, niho bahaisililiza Omukama asinga, ebikorwabye by'oburokozi omu byaro bya Isiraeli. Aho embaga y'Omukama basongokire bolekeire ebihigi.

¹² Sisimuka, sisimuka Debora! Sisimuka, sisimuka, ozine ekizina. Imuka, Baraki, ofunye endore zawe, iwe mutabani wa Abinoamu.

¹³ Aho abarangira abasigaireho basongoka, abantu b'Omukama basongoka kumurashanira, kurashanisa ab'amani.

¹⁴ Baruga Efuraimu, baija omu ruhanga, Benjamini akuhondeire n'abanyaruganda bawe. Abakuru b'amahe basongoka barugire Makiri, omuli Zabuloni harugayo balinya abakwete enkoni y'omukuru w'eihe;

¹⁵ abarangira ba Isakari baija na Debora, mara Isakari mwesigwa ahali Baraki; bairuka batahire omu ruhanga bamukuratiire aha bilenge. Omu nganda za Rubeni, bakebaza eby'amaani omu mwoyo.

¹⁶ Kubaki wazebeire omu biraro by'entaama, kuhuliliza emilere yobalikuzitelera? Omu nganda za Rubeni bakebaza eby'amaani omu mwoyo.

¹⁷ Gileadi akaikara buseli bwa Yorudani; kandi Dani kubaki yaikaire omu meli? Asheri yashuntama bunyanungi aha mwegego gw'enyanja, yatura omu myaro yayo.

¹⁸ Zabuloni bantu abayenagire omu kabi bakeisa, Nafutali kwakwo omu nshozi z'eirungu.

¹⁹ Abakama bakaija lyarashana, aho abakama ba Kanaani lyarashana, ahali Taanaki, bwatana aha migera ya Megido, tibakwese minyago ya feza.

²⁰ Enyanyinyi zayema omw'iguru zarashana, zayema omu mihanda yazo zarashanisa Sisera.

²¹ Engezi ya Kishoni yabatwara, engezi y'amani, engezi ya Kishoni. Shaya mwoyo gwange, tamu amani!

²² Aho ebinono by'efarasi byakuntira muno, orwo zilikwiruka nizikina, nizikina efarasi.

²³ Muraame Merozi, malaika w'Omukama yagamba, murame kubi abatuzi bamwo, aha rw'okuba tibaizire kujunira Mukama, kujunira Mukama omu ndashanaye n'abanyamani.

²⁴ Yaeli omu bakazi abe muberwa muno, muka Heberi Omukeni, muberwa muno omu bakazi bakatura omu mahema.

²⁵ Akamwenza amaizi yamuha amata, yamuletera amashununu omu pakuli y'ekitinwa.

²⁶ Omukonogwe yaguta aha mambo y'eihema, n'omukonogwe gwa bulyo aha nyondo y'ababuya; yabaikura Sisera, yamushekenyura omutwe, yamwatayata hakabaibai, yamuchumita.

²⁷ Sisera akabutama, yagwa, Yarambira omu maguru ga Yaeli, akabutama omu maguru ga Yaeli, yagwa; mbali yabutamire niho yagwire.

²⁸ Akalinguliza omw'idirisha, nyina Sisera akalebera omu kihuru ky'edirisha; kubaki egaliye yakelererwa kwija! Kubaki akahiliro k'amagalige kakelererwa?

²⁹ Abamikazibe abagezi bahorora, kyonkai na wenene kwakwo yayehorora;

³⁰ Tiwakushanga bakwasayo eminyago bhaliho nibagishonda? Buli mushaija omuzana anga babili Sisera yakwasa eminyago y'emyendo ezigire, eminyago y'emyendo ezigire efumirwe emitanda yange ebili ezigire efumirwe, eminyago y'okujwara omu ngoto.

³¹ Mukama osingire, ababisha bawe basilike batyo. Kyonkai batahi bawe bashane eizoba okwo lishabuka n'amani.” Aho ensi egira emilembe emyaka 40.