Abaramuzi 3 - Ebibulia 2001

Amahanga agatatengiibwe

¹ Omuli Kanaani Omukama aina amahanga ago yasigiremu abone kugakoza kulenga Abaisiraeli ababaire batalikumanyaho ndashana yona yona omuli Kanaani.

² Ekyo akakigir'atyo Abaisiraeli ababaire batalikumanya kurashana akubegese.

³ Amahanga ago nig'aga: Ebigo bitanu bw'Abafilisiti, n'Abakanaani bona, n'Abasidoni, n'Abahivi abaturaga aha Ibanga lya Lebanoni, kwema n'aha Ibanga lya Baaliherimoni kugoba aha butahiro bwa Hamati.

⁴ Amahanga aga akagakoza kulenga Isiraeli, kumanya nka barahulira emihango eyo yabaire aragiire baishebo omu kanwa ka Musa.

⁵ Nikwo Abaisiraeli abo kutura omu Bakanaani, Abahiti, Abaamori, Abaperizi, Abahivi n'Abayebusi.

⁶ Basiigirangana n'amahanga ago, bakolera na baruhanga bago.

Otinieli

⁷ Abaisiraeli bakagokera Omukama Ruhanga wabo, bamwebwa, bakolera Ababaali n'Abaashitaroti.

⁸ Aha rw'ekyo Omukama akabanigalira, yabanaga omu mikono ya Kushanirishataimu emyaka munana.

⁹ Kyonkai orwo bamutakiire yabaha omurokozi yabarokora, niwe Otinieli eya Kenazi, murumuna Kalebu.

¹⁰ Mwoyo wa Mukama amutungamaho, aramura Isiraeli. Atabara omu ndashana n'Omukama amunaga Kushanirishataimu omukama wa Mesopotamia omu mikono, amusinga.

¹¹ Kityo ensi ebonamu emilembe emyaka 40. Aho Otinieli eya Kenazi afa.

Ehudi

¹² Abaisiraeli bashuba bagokera Omukama. Aho Omukama agiza Egiloni omukama wa Moabu amani atera Isiraeli.

¹³ Omu kutabalira Isiraeli akagitera, akema n'Abaamoni n'Abaamaleki n'ekigo ky'emikindo.

¹⁴ Abaisiraeli bakolera Egiloni omukama wa Moabu emyaka 18.

¹⁵ Kyonkai Abaisiraeli kabatakiire Omukama, Omukama yabateraho omurokozi, Ehudi eya Gera, Omubenjamini ayagiraga emosho. Abaisiraeli bamutweka ebigemuro bya Egiloni omukama wa Moabu.

¹⁶ Ehudi ahesha embanda y'amogi gabili, oburai bwayo nk'enusu mita, agikiikira aha itako lya bulyo omu myendoye omunda.

¹⁷ Ayanjulira Egiloni omukama wa Moabu ebigemuro. Egiloni hakaba ali mushaija muhango muno.

¹⁸ Orwo Ehudi yabaire yamazire kwanjura ebigemuro, ataishura abantu ababaire babilesire.

¹⁹ Kyonkai wenene agarukira aha bishushani by'amabare ebibaijano bwatana Giligali. Agambira Egiloni ati, “Waitu mukama, nyina eky'okukugambira omu kyama.” Egiloni agambira abaramatabe ati, “Mwesize.” Aho abaramata bona baturuka, bamuruga omu maisho.

²⁰ Ehudi amugoba okwo yabaire ashuntamire wenkai omu kiyumba ky'amabeho aha rushwi, amugambira ati, “Ruhanga yakuntumaho.” Egiloni aimuka aha nketoye.

²¹ Ehudi aimukya omukono gwa bumosho aihya embanda aha itakolye lya bulyo, amuchumita orubunda.

²² Embanda n'omukono gwayo bimutaha omunda, mara tagimwihyamu. Embanda ekwatwa ebishaju, n'ebihagaro bituruka.

²³ Aho Ehudi ashohora omu kishasi, asika enyigi z'ekiyumba ky'aha rushwi azikoma, amukingirana.

²⁴ Orwo yabaire yagenzire, abairu baija. Kabaaboine okwo enyigi zikingire batekeleza bati, “Ali omu ruhuba rw'ekiyumba ky'amabeho nayeyugiza.”

²⁵ Balinda balindil'eleyo; kabaaboine okwo yaguma atakingwire nyigi, bakwata orufunguruzo bazikingura; leba omukama wabo abyamire ahansi afire.

²⁶ Orwo babaire bhaliho bategeleize, Ehudi airuka. Ahingura aha bishushani by'amabare ebibaijano ahungira Seira.

²⁷ Kayagobireyo atera orukuli omu mabanga ga Efuraimu. Abaisiraeli basongoka nawe agenda abebembeire.

²⁸ Abagambira ati, “Mumpondere, aha rw'okuba Omukama yabanaga ababisha banyu Abamoabu omu mikono.” Kityo basongoka bamuhondeire, bakwata ekyambu kya Yorudani batangirayo Abamoabu abo, mara tibajubwire muntu n'omoi kwambuka.

²⁹ Omu kanya ako baitaho Abamoabu abaisherukale emanzi nka 10,000. Thaliho muntu yairukire.

³⁰ Kir'ekyo Abaisiraeli batera Abamoabu. Ensi ebona emilembe 80.

Shamugari

³¹ Ehudi akahonderwa Shamugari eya Anati; niwe yaisize Abafilisiti 600 omuhunda gufunya ente. Na wenene arokora Isiraeli.