Abaramuzi 21 - Ebibulia 2001

Isiraeli nayefunya aha rwa Benjamini

¹ Kandi Abaisiraeli bhakaba banahiire bali Mizipa bati, “Omuli ichwe thaliho n'omoi alisiigira Mubenjamini muhara.”

² Abantu baija Betheli bashuntama aho omu maisho ga Ruhanga kugoba bwaigoro, balira muno n'obushasi bungi.

³ Bagamba bati, “Waitu Mukama Ruhanga wa Isiraeli, eki kyaija kitai omuli Isiraeli, oruganda rwa Benjamini kir'eki ruraliire kuchweka omuli Isiraeli!”

⁴ Bukeire abantu baimuka karai, bombekaho elutare, bahonga ebihongo by'okwokibwa n'ebihongo by'emilembe.

⁵ Abaisiraeli bagamba bati, “Ni rugandaki omu nganda za Isiraeli orutaizire mu nteko omu maisho g'Omukama?” Omu kugamba batyo hakaba banahiire muno okwo omuntu atakugiire Mizipa aha Mukama bamwite.

⁶ Kyonkai Abaisiraeli abo ahanyuma bagilira Ababenjamini barumuna babo embabazi, bagamba bati, “Kir'eki oruganda rumoi rwachweka omuli Isiraeli.

⁷ Mbwenu tugire tutai kuha abaruhonokireho abakazi orwo tunahiire obuso bw'Omukama okwo tutalibasiigira bahara baitu?”

⁸ Bashuba bati, “Ni rugandaki omu nganda za Isiraeli orutagiire Mizipa omu maisho g'Omukama?” Baija bamanya okwo Yabeshigileadi thaliho n'omoi yaizire mu rusisira aha muterano.

⁹ Kuba orwo bahurwize abantu kubabara tibaina wo bashangiremu ali munyansi wa Yabeshigileadi.

¹⁰ Aho enteko etwekayo abaisherukale bayo emanzi muno 12,000 babaragira bati, “Abanyansi ba Yabeshigileadi mugye mubaise embanda, kwakwo n'abakazi n'abana.

¹¹ Mukore muti: Buli mushaija na buli mukazi atakili mwisiki mubasilikye limoi limoi.”

¹² Omu banyansi ba Yabeshigileadi bashangamu abaisiki 400 abatakamanyanganaga na mushaija, babaleta Shilo omu nsisira. Shilo eli omu nsi ya Kanaani.

¹³ Aho enteko yona etumaho Ababenjamini ababaire bali aha rwazi rwa Rimoni, babendera emilembe.

¹⁴ Omu bir'ebyo Ababenjamini bagaruka. Babaha abakazi abo babaire bahungizeho omu bakazi ba Yabeshigileadi; kyonkai tibabamazire.

¹⁵ Abantu bashasibwa Ababenjamini aha rw'okuba omu nganda za Isiraeli Omukama hakaba atairemu ekihuru.

¹⁶ Aho abagurusi b'enteko bagamba bati, “Tukoreki kuha abashaga abakazi orwo omuli Benjamini abakazi baisirwe bakahwamu?”

¹⁷ Bagamba bati, “Ababenjamini abakizire bagire abasika; oruganda rutakuchweka muli Isiraeli.

¹⁸ Ekiliho titwakushobora kubasiigira bahara baitu.” Okugamba batyo bakaba banahiire bati, “Nakaraamwe alisiigira Omubenjamini.”

¹⁹ Aho bagamba bati, “Leba, Shilo bhaliho obugenyi bw'Omukama obwa buli mwaka.” Shilo eli bikara bya Betheli, oburugaizoba bwa nyaihanda eruga Betheli ekatemba Shekemu, kandi eli kasi ya Lebanoni.

²⁰ Baragira Ababenjamini bati, “Mugende muzimbe omu ndimiro y'emizabibu,

²¹ mulebe; k'abaisiki ba Shilo baraturuka kuzina amayaga, aho muruge omu ndimiro y'emizabibu. Buli mushaija omu baisiki ba Shilo akwatemu omukazi, mushube mugende omu nsi ya Benjamini.

²² Baishebo anga banyanyabo kabaraija kutugeleka turabagambira tuti, ‘Musingire mubatutunge; ahakuba thaliho mushaija wotwanyagire mukazi mu ndashana, kandi nainywe timwababasiigiire aha rw'okuba mwakugizire entambara.’ ”

²³ Ababenjamini bagira batyo. Orwo abaisiki babaire nibazina, buli mushaija akwatamu omoi, amutwara kuba mukaziwe. Aho bagaruka omu butaka bwabo, bombeka buhya ebigo babituramu.

²⁴ Bir'ebyo Abaisiraeli nabo barugayo, buli mushaija agaruka omu rugandarwe n'omu bawenene; buli mushaija ashuba omu busikabwe.

²⁵ Makiro ago omuli Isiraeli hakaba hatalimu mukama; buli muntu yakoraga okwo yabonaga.