Abaramuzi 20 - Ebibulia 2001

Isiraeli neyehoroza Abagibea

¹ Abaisiraeli bona bahurura, kwema Dani kugoba Beerisheba, n'ensi ya Gileadi ebulimu. Enteko ehurura oti muntu omoi eija aha Mukama omuli Mizipa.

² Abakuru b'embaga yona omu nganda zona za Isiraeli baija omu nteko y'Omukama, abaisherukale 40,000 ab'embanda.

³ (Aho Ababenjamini bahulira okwo Abaisiraeli baizire Mizipa). Abaisiraeli bagambira Omulevita bati, “Tugambire ekihemu eki kikaija kitai?”

⁴ Omulevita, iba omukazi ayaisirwe, ahorora ati, “Nkaija Gibea eya Benjamini, inye n'ensholeke yange kushura.

⁵ Abashaija ba Gibea bantabalira, bazinda enju obuzingora kili kiro; bhakaba nibenda kunyita, kandi bahamba ensholeke yange, efa.

⁶ Nkwata ensholeke yange egyo ngichwamu ebichweka, ngitweka omu nsi yona y'obusika bwa Isiraeli; aha rw'enshonga bakozire ekihemu mara ihano omuli Isiraeli.

⁷ Murore, inywe Baisiraeli inywena, mugambe muhanure aha.”

⁸ Abantu baimuka oti muntu omoi nibagamba bati, “Ichwe thaliho muntu aragya mw'ihemalye, nangu n'omoi omuli ichwe kugaruka mwe.

⁹ Mbwenu Gibea nitwija kugigira tuti: Omuli ichwe abaratekerwa enshoga turagibunda,

¹⁰ omu 100 twihyemu abashaija 10, omu nganda zona za Isiraeli, 1000 omu 1000 na 1000 omu 10,000, baletere abantu entanda, Gibea eya Benjamini bagikore akalimo, bazire ekihemu ekyo bakozire omuli Isiraeli.”

¹¹ Kityo Abaisiraeli bona abashaija bema hamoi oti muntu omoi, bazinda ekigo kya Gibea.

Ababenjamini nibagwa omu kabi

¹² Enganda za Isiraeli zituma abantu omu ruganda rwona rwa Benjamini nibagamba bati, “Eki kihemu nyabaki ekibaireho omuli inywe?

¹³ Mbwenu aha rw'ekyo mutaishure abantu abo, empwabujwa za Gibea tubaite, tuchwe eihano omuli Isiraeli.” Kyonkai Ababenjamini tibahuliire byo barumuna babo Abaisiraeli bagambire.

¹⁴ Baruga omu bigo, bateranira Gibea kutera Abaisiraeli.

¹⁵ Kir'ekyo Ababenjamini baruga omu bigo byabo, bahurura abaisherukale ab'embanda 26,000 otatairemu bashaija ba Gibea 700 endondwa.

¹⁶ Omuli aba bona hakaba halimu abashaija 700 abarondwa ab'emosho; buli omoi ayakushoboire kurasha eibare omu kihubeezo akatera orushoke rutamulemire.

¹⁷ Abaisiraeli, Benjamini etabulimu, bakahurura abaisherukale b'embanda 400,000.

¹⁸ Abaisiraeli baimuka bagya Betheli, babaza Ruhanga bati, “Ni rugandaki omuli ichwe oruragenda mbere kutera Ababenjamini?” Omukama agamba ati, “Aba Yuda bagende mbere.”

¹⁹ Aho Abaisiraeli baimuka bwankya basisira kutera Gibea.

²⁰ Batabara kurashanisa Benjamini bemire Gibea.

²¹ Ababenjamini baturuka Gibea, kir'ekyo baita Abaisiraeli 22,000.

²² Kyonkai Abaisiraeli bakwata mashaija, bashuba batekateka endashana omu mwanya gwonene gwonene mbali babaire bagitekatekeire kiro ekya mbere.

²³ Bagenda bataka omu maisho g'Omukama kuturuka bwaigoro. Babaza Omukama bati, “Tushubeyo kurwanisa barumuna baitu Ababenjamini?” Omukama agamba ati, “Mugende mubarashanise.”

²⁴ Kityo batabalira Ababenjamini ekiro kya kabili.

²⁵ N'Ababenjamini baturuka Gibea ekiro kya kabili ekyo kubarashanisa. Abaisiraeli 18,000 abaisherukale b'embanda.

²⁶ Aho eihe lyona ly'Abaisiraeli ligya Betheli, lishuntama omu maisho g'Omukama litaka, mara kir'ekyo lisiiba kugoba bwaigoro. Bahonga ebihongo by'okwokibwa n'ebihongo by'emilembe omu maisho g'Omukama.

²⁷ Babaza Omukama (aha rw'enshonga biro bilinya Esanduku ya Ruhanga y'Endagano niho yabaire eli,

²⁸ Finehasi eya Eleazari, Eleazari eya Aroni niwe yalilebeleraga), babaza bati, “Tushube tutabalire barumuna baitu Ababenjamini anga tulekere?” Omukama agamba ati, “Mugende, aha rw'okuba nyenkya nimbabanaga omu mikono.”

²⁹ Aho Abaisiraeli batweka Abaisherukale b'okuzimba Gibea obuzingora.

³⁰ Aha kiro kya kashatu Abaisiraeli abo batabalira Ababenjamini, betekateka kurashanisa Gibea nk'emirundi endijo.

³¹ Ababenjamini baturuka babatera, bababinga omu kigo babagobya harai. Nk'obubere, babatelera omw'ishwa omuli nyaihanda elikugya Betheli, endijo Gibea. Bakaitaho Abaisiraeli nka 30.

³² Ababenjamini bagamba bati, “Twabairukya nk'obubere.” Kyonkai Abaisiraeli bonene bagira bati, “Twiruke, tubanyurure tubaihye omu kigo tubatware nyaihanda.”

³³ Aho baruga mbali babaire bali, bagya Baalitamari betekatekera endashana. N'Abaisiraeli abandi ababaiire bazimbire obugwaizoba bwa Gibea bajumbukayo.

³⁴ Abaisherukale endondwa za Isiraeli 10,000 batabalira Gibea. Endashana ekura, kyonkai Ababenjamini tibamanyire kwo kabuta kabaire kali haihi kubagwera.

³⁵ Omukama ayemamu Abaisiraeli basinga Ababenjamini, basilikya Ababenjamini abo 25,000. Aba bona bhakaba bali baisherukale ab'embanda.

³⁶ Ahanyuma Ababenjamini babona okwo basingwa. Abaisiraeli baleka buleka Ababenjamini aha rw'okwesiga abaisherukale ababaire bahunire, abo babaire bataireho kutera Gibea.

³⁷ Abaisherukale abo bajumbukayo bagwera Gibea, ekigo bakiisa embanda.

³⁸ Eihe ly'Abaisiraeli n'abaisherukale babo ababaire bahunire bhakaba baikilijainyie akabonero kamoi. Orwo bakuboine ekichwi kihango ky'omwika kyaimuka omu kigo

³⁹ Abaisiraeli bagaruka omu ndashana. Ababenjamini bhakaba babandize kutera Abaisiraeli, baisireho abantu 30. Bagamba bati, “Mazima twabatera nk'omu ndashana eya mbere.”

⁴⁰ Kyonkai orwo akabonero k'omwika kabandize kwimuka omu kigo nk'enyomyo, Ababenjamini bakebuka; leba, ekigo kyona nikichunka omwika nigukanga aha iguru.

⁴¹ Aho Abaisiraeli bakubuka. Ababenjamini bagwa omu kabuta enshonga bakabona okwo akabi kaija kubagwera.

⁴² Aha rw'ekyo bairuka Abaisiraeli bolekeire ogw'eirungu. Kyonkai bababinga babafunza, kandi abarugire omu kigo babatanga embaju zona babasilikya.

⁴³ Baita Ababenjamini, abandi bababinga, babalibatilira kwema Noha kugoba buseli oburugaizoba bwa Gibea.

⁴⁴ Bakafa Ababenjamini 18,000, bona baisherukale emanzi.

⁴⁵ Abandi bairuka batwetwe ogw'eirungu bagoba aha rwazi rwa Rimoni. Omuli bonene 5,000 bakaitirwa nyaihanda. Abaisiraeli baguma bababingire eligiligi babagobya Gidomu, baita Ababenjamini 2,000.

⁴⁶ Kityo kir'ekyo omu Babenjamini bakafa abaisherukale b'embanda 25,000.

⁴⁷ Kyonkai abandi 600 bakairukira omw'irungu bagoba aha rwazi rwa Rimoni, baikaraho emyezi enai.

⁴⁸ Abaisiraeli bagaruka bagwera Ababenjamini, abasigaire babaisa embanda. Baita abantu n'ebitunganwa na byona ebyo bagwireho. Ebigo byona ebyo bagwireho babitaho omuliro.