Abaramuzi 19 - Ebibulia 2001

Omulevita wa Efuraimu n'ensholeke

¹ Omu biro orwo omuli Isiraeli habaire hatalimu mukama, Omulevita omoi ayabaire afurukiire omu mparo z'amabanga ga Efuraimu, ashwera ensholeke agihya Betelehemu omuli Yuda.

² Ensholeke emunigalira emusigaho eshuba Betelehemu omuli Yuda omwa ishe, eikarayo emyezi nk'enai.

³ Aho iba aimuka amuhondera kumutagiliza kumugarura. Akaba agenzire n'omwiruwe n'endogobe ibili. Ataha omwa ishe mwisiki. Orwo ishe mwisiki yamuboine aija n'ebyera kumwakilira.

⁴ Ishezara, ishe mwisiki amutanga, amara nawe ebiro bishatu; kityo balya, banywa, barara omwo.

⁵ Aha kiro kya kanai baimuka bwankya karai, ayetekateka kugenda, kyonkai ishe mwisiki agambira omukoi ati, “Banza olyeho akakulya, obone amani, k'oramara ogende.”

⁶ Aho abashaija bombili bashuntama balya, banywa hamoi. Ishe mwisiki agambira omukoi ati, “Okunde obyame, mara oshemelerwe.”

⁷ Orwo omushaija yaimukire kugenda, ishezara amutagiliza alemwa araraho ekindi.

⁸ Aha kiro kya katanu aimuka bwankya karai kugenda, kyonkai ishe mwisiki agamba ati, “Oyegumisilize, osibeho ogobe bwaigoro.” Aho bombili balya.

⁹ Orwo omushaija n'ensholekeye n'omwiruwe baimukire kugenda, ishezara, ishe mwisiki amugambira ati, “Leba eizoba lyaija kutobera, wakuraire hanu. Leba ekiro kyaija kugwa; rara hanu mara oshemelerwe. Nyenkya oimuke bwankya karai ogende omuka.”

¹⁰ Kyonkai omukoi tiyakunzire kubyama, aimuka agenda, agoba ahalebangaine na Yebusi (niyo Yerusalemu). Akaba aina endogobe ibili zina amatandiko, n'ensholekeye hakaba ainayo.

Entambara y'Abagibea

¹¹ Orwo babaire bali bwatana Yebusi, eizoba likaba lyagenzire muno. Aho omwiru agambira mukamawe ati, “Mbwenu oije tugye omu kigo ky'Abayebusi eki turaremu.”

¹² Mukamawe amugambira ati, “Titulikwija kutaha mu kigo kya banyamahanga abatali Baisiraeli; ekiliho tuhingure tugye Gibea.”

¹³ Agambira omwiruwe ati, “Ija twilire haihi nk'enkiro emoi omuli ezi, turare Gibea anga Rama.”

¹⁴ Aho bahingura bagenda, eizoba libatobeleraho bali bwatana Gibea eya Benjamini.

¹⁵ Bataha Gibea, bararamu. Ataha nyarubuga y'ekigo ashuntama, aha rw'okuba thaliho yabatoire kurara mwe.

¹⁶ Aho leba omushaija mukuru ashangwa nainuka naruga omu ndimiro aha bwaigoro. Akaba ali w'omu mabanga ga Efuraimu, yashangwa afurukiire Gibea. Abanyansi bhakaba bali Babenjamini.

¹⁷ Kayanagire amaisho abona omugenzi omuli nyarubuga y'ekigo. Aho omushaija mukuru abaza ati, “Nogya nkahai? Isi noruga nkahai?”

¹⁸ Omugenzi amugambira ati, “Nituruga Betelehemu omuli Yuda nitugya omu mparo z'amabanga ga Efuraimu, niho ndugire. Mbaire ngiire Betelehemu omuli Yuda, mbwenu ninshuba omuka. Kyonkai thaliho alikuntora mwe.

¹⁹ Twina obunyasi n'ekyakulya ky'endogobe zaitu; kandi inye n'omuzana wawe n'omusigazi w'abairu bawe twina ekyakulya n'edivai; thaliho kibuzireho.”

²⁰ Omushaija mukuru agamba ati, “Humura! Ndakumalira ametage gawe gona; ekiliho otarara nyarubuga.”

²¹ Amutahya omwe, endogobe aziha ekyakulya, banaba amaguru, balya, banywa.

²² Orwo babaire bali omu mashemelerwa, abanyakigo empwabujwa, babunda enju obuzingora, nibatera orwigi. Bagambira omushaija mukuru, nyin'enju bati, “Turukya omushaija ayaija omwawe tumumanye.”

²³ Omushaija nyin'enju aturuka abagoba abagambira ati, “Chei barumuna bange, mutakora kihemu kiti, aha rw'okuba ogu yaija omwange, mutakora ihano elyo.

²⁴ Leba aha haliho muhara wange, mwisiki, n'ensholeke y'omushaija ogu; kambaturukye mbwenu aha. Bajangure okwo mulikwenda; kyonkai omushaija ogu mutamukora ihano elyo.”

²⁵ Kyonkai abantu abo tibamuhuliliza. Aho omushaija akwata ensholekeye agiturukya agibaha; bagimanya, bagijangura ekiro kyona kugoba bwankya. Orwo bwabandize kukya bagitaishura.

²⁶ Orwo bwakeire, omukazi aija agwa aha rwigi rw'enju y'omushaija mbali mukamawe yabaire ali kugoba orwo obwire bwataishukaine.

²⁷ Mukamawe aimuka bwankya; orwo yakingwire enyigi z'enju naturuka kugenda, leba ensholekeye ebyamire aha rwigi rw'enju, emikono eli aha muzilingiti.

²⁸ Amugambira ati, “Imuka tugende.” Kyonkai empororo ebura. Aho amuta aha ndogobe, aimukya agenda omuka.

²⁹ Kayatahire omwe akwata omuhyo, ashuba akwata ensholeke agichwagura engingo, agihyamu ebichweka ikumi na bibili, amara abitweka omu nsi yona ya Isiraeli.

³⁰ Bona abakiboine bagamba bati, “Ekyab'eki tikikazokaga handiki kuboneka kwema kiro eky'Abaisiraeli barugire Misiri kugoba mwaha. Mukitekelezeho, mukihanure, kandi mugambe.”