Biblia Todo Logo
Bìoball air-loidhne

- Sanasan -

Abaramuzi 18 - Ebibulia 2001


Abadani nibahiga obuturo

1 Omu biro ebyo omuli Isiraeli hakaba hatalimu mukama. Kandi oruganda rw'Abadani rukaba niruhiga obutaka bw'okuturamu, aha rw'okuba kugoba aho bhakaba batakahairwe busika omu nganda za Isiraeli.

2 Kityo omu ruganda rwabo rwona baihyamu abashaija emanzi batanu babatuma kunyomoza ensi n'okugirambura, kwema Zora na Eshitaoli. Babagambira bati, “Mugende murambure ensi.” Baija omu mabanga ga Efuraimu, bagoba omwa Mika baba nimwo bashura.

3 Orwo babaire bali omwo bamanya eiraka ly'Omulevita muto, bamugoba bamubaza bati, “N'ohai ayakulesire munu? Oinamu mulimoki? Nokoraki kunu?”

4 Abahorora ati, “Mika angiliire ati n'ati: Antahize kamukolera mara naba mukuhaniwe.”

5 Bamugambira bati, “Nitukushaba obaze Ruhanga tumanye nk'orugendo rwaitu orwo tulikwija kugenda ruragoshoka.”

6 Omukuhani abagambira ati, “Mugende n'emilembe; omu rugendo rwanyu orwo muliho Ruhanga arabalinda.”

7 Aho abashaija bontanu baimukya baija Laisha, babona abantu bayo okwo balikutura omu milembe nk'Abasidoni, bachuleire, batalikutina kantu, batalikuburwa kantu mu nsi, baina eitunga, batataine na Basidoni handiki kufaho muntu wena wena.

8 Kabagobire Zora na Eshitaoli omu babo, bababaza bati, “Mwina makuruki?”

9 Babashubamu bati, “Mwimuke tugende tubatere aha rw'okuba ensi tugiboine, mara wewe, eina einura lingi muno. Mutarombera! Mutakelererwa, mugende omu nsi egyo mugilye.

10 Orwo muragenda muragobera abantu abatalikwebabara. Ensi mpango, mazima Ruhanga yagibanagire omu mikono; ensi etalikuburwa kantu kona kona akhakaba omu nsi.”


Abadani nibafuruka

11 Abashaija 600 ab'oruganda rwa Dani, baina ebikwato by'endashana, baruga Zora na Eshitaoli,

12 batemba basisira Kiriatiyearimu omuli Yuda. Aha rw'enshonga egyo omwanya ogwo bakagweta Mahanedani kugoba kir'eki; guli obugwaizoba bwa Kiriatiyearimu.

13 Barugaho bagya omu mabanga ga Efuraimu, bagoba omwa Mika.

14 Aho abashaija abatanu ababaire bagenzire kunyomoza ensi ya Laisha bagambira abanyaruganda babo bati, “Nimumanya okwo omu maju aga halimu efodi, eterafimu, ekishushani ekibaijano n'ekiheshano? Aho aha rw'ekyo tekeleza ekyo muragira.”

15 Bakwata omuhanda bagya omw'Omulevita muto, omwa Mika, bamubaza emiralireye.

16 Aho abashaija 600 Abadani, baina ebikwato by'endashana, bemelera aha kishasi ky'ekihigi.

17 Abashaija abatanu ababaire bagiire kunyomoza ensi batemba, batahamu bakwata ekishushani ekibaijano n'ekiheshano, efodi, eterafimu, oku omukuhani ayemeleire omu kishasi ky'ekihigi hamoi n'abashaija 600 baina ebikwato by'endashana.

18 Orwo aba batahire omwa Mika bakatwara ekishushani ekibaijano, efodi, eterafimu n'ekishushani ekiheshano, omukuhani ababaza ati, “Nimukoraki?”

19 Bamugarukamu bati, “Yesize, bumba omunwa, mara otuhondere, obe isheichwe mara mukuhani waitu. Noshemelerwa kuba mukuhani omw'omuntu omoi kushaga okuba mukuhani w'oruganda rwona rwa Isiraeli?”

20 Omukuhani ashemelerwa. Akwata efodi, n'eterafimu n'ekishushani ekibaijano, agenda abantu bamuhagasire.

21 Aho bakwata omuhanda bagenda bebembeize abana, ebitunganwa n'ebintu.

22 Kababaire bagenzireho akatambi kuruga omwa Mika, abantu ababaire bali omu maju agataine omwa Mika betangana babahondera.

23 Bakungera Abadani. Abadani bahinduka babaza Mika bati, “Noshasibwaki kwija n'embaga nk'egi?”

24 Abahorora ati, “Mwatwara baruhanga bange abo nayekoleire n'omukuhani wange mwagenda; inye nasigara naki? Mwakumbaza mutai muti, ‘Noshasibwaki?’ ”

25 Abadani bamugambira bati, “Tutakuhulira iraka lyawe rundi ab'ekiniga bakakubunda okafa n'omutungo gwawe.”

26 Aho Abadani begendera. Mika kayaboine okwo bamushagisa amani, akubuka agaruka omuka.

27 Abadani batwete ebyo Mika yabaire akozire, n'omukuhaniwe, bagoba Laisha omu bantu abachuleire, abatalikwebabara, babaisa embanda n'ekigo bakitaho omuliro.

28 Hakaba hataliho wa kujuna Laisha aha rw'okuba ekaba eli harai na Sidoni, mara batalikwetaho bantu bandi. Ekigo kikaba kili omu ruhanga rwa Betirehobu. Bakyombeka, bakituramu,

29 bakyeta Dani, eibara lya Dani ish'enkurubo, mutabani wa Isiraeli. Kyonkai obubere eibara lyakyo kyayetwaga Laisha.

30 Abadani baketera ekishushani ekiheshano. Yonatani eya Gerishomu, Gerishomu eya Musa, hamoi n'abatabani bhakaba bali bakuhani b'oruganda rw'Abadani kuhika kiro ekyo bakwetwe endore.

31 Mpaho baketera ekishushani ekiheshano ekyo Mika yakozire, ebiro byona ebyo Rwensinga ya Ruhanga yabaire eli Shilo.

Ruhaya DC Bible © Bible Society of Tanzania, 2001.

Bible Society of Tanzania
Lean sinn:



Sanasan