Abaramuzi 16 - Ebibulia 2001

Samusoni nasikura enyigi za Gaza

¹ Samusoni agya omu kigo kya Gaza, abonayo omumalaya amumanya.

² Bagambira abantu ba Gaza bati, “Samusoni aizire munu.” Aho bahazingora bamuhunira ekiro kyona aha kihigi ky'ekigo. Ekiro kyona tibajegire, bakwese, “Tulinde kuturuka bwankya, tumwite.”

³ Kyonkai Samusoni abyama kuhika ekiro eitumbi. Omw'itumbi aimuka akwata enyigi z'ekihigi ky'ekigo n'emizilingiti yombili, abisikuramu omuhingo na buli kantu, abita aha mabega abitwara aha katwetwe k'orushozi akalebangaine na Heburoni.

Delila nabanja Samusoni

⁴ Ebi kabyahoire agonza omukazi w'omu ruhanga rwa Soreki, eibaralye yayetwaga Delila.

⁵ Abatwazi b'Abafilisiti baija bagambira omukazi ogwo bati, “Omulembalembe omanye mbali amanige agangi gatyo gatabuka, n'okwo twakumukiza amani, twije tumubohe tumuchwe eishaija. Ichwe buli omoi turakuha ebichweka by'efeza 1,100.”

⁶ Delila agambira Samusoni ati, “Bojo ongambire mbali mani gawe agangi gati gatabuka, n'ekyo bakukubohesa omuntu akakuchwa eishaija.”

⁷ Samusoni amugambira ati, “Kabakunkomesa engoye mushanju ezibisi ezitakakomire aho ndiba mba nk'omuntu ondijo wena wena.”

⁸ Aho abatwazi baletera Delila engoye mushanju ezibisi ezitakanikirwe, azimubohesa.

⁹ Akaba aina abashaija beshelekire omu kiyumba eky'omunda. Delila wenene agambira Samusoni ati, “Abafilisiti bakubunda, Samusoni.” Kyonkai Samusoni wenene agutura engoye nk'okwo omuguha gw'ekigoigo gugutuka gugobirweho omuliro. Kityo enama y'amanige tiyamanyikire.

¹⁰ Delila agambira Samusoni ati, “Leba wandelura. Wambeiya; bojo ongambire ekyo bakukubohesa.”

¹¹ Amugambira ati, “Kabankumbohesa emiguha emihya etakakozibwaga, aho mpwa amani mba nk'abantu abandi.”

¹² Ahanyuma Delila akwata emiguha emihya agimubohesa, mara amugambira ati, “Abafilisiti bakubunda, Samusoni.” Abashaija beshelekire bhakaba bali omu kiyumba eky'omunda. Kyonkai agutura emiguha aha mikonoye nk'akahuzi.

¹³ Delila agambira Samusoni ati, “Kugoba mwaha okyandelura nombeiya. Ngambira ekyo bakukubohesa.” Ndi ogu amugambira ati, “K'eishoke ly'omutwe gwange wakulihyamu amakabe mushanju, okagashukisa ekitambara kishukirwe, mara okakikomesa ekikwasi, aho ndayoroba mbe nk'abantu abandi.”

¹⁴ Aho orwo yabaire anagiire Delila amukwata eishoke, aliihyamu amakabe mushanju, agashukisa ekitambara kishukirwe, mara ekitambara akikomesa ekikwasi, ashuba amugambira ati, “Abafilisiti bakwita, Samusoni.” Kyonkai asisiimuka asikuramu ekikwasi, n'ekishukiso n'ekitambara kishukirwe.

¹⁵ Delila amugambira ati, “Wakugamba otai oti, ‘Ninkugonza,’ okwo omutima gwawe gutandiho? Wanderura emirundi eshatu egi, tokangambiire mbali mani gawe gangi gatabuka.”

¹⁶ Kayamwisize orugambo obukya n'obukeire, akamujugutiliza, Samusoni asindwa agoba aha kanya.

¹⁷ Aho amufumolera byona, amugambira ati, “Orumoiso tirukangyaga aha mutwe; aha rw'okuba kwema omu nda ya mawe mba nyehonge ya Ruhanga. Kabakummoisa aho amani gandugamu, ndiba, mba nk'omuntu ondijo wena wena.”

¹⁸ Delila kayaboine okwo yamugambira age gona, atumaho abatwazi b'Abafilisiti nagamba ati, “Mwije eli lyonkai, aha rw'enshonga yangambira age gona.” Aho abatwazi b'Abafilisiti batemba baija owe, n'empiha baija nazo omu ngaro.

¹⁹ Amunagiliza aha majwige, ayeta omushaija, amugambira kumumoisa amakabe g'omutwegwe gonshatu. Aho abanza kumwita kubi, n'amani gamurugamu.

²⁰ Delila agamba ati, “Abafilisiti bakwita, Samusoni!” Asisimuka, agamba ati, “Kanshohore nyekunkumure nk'okwo nkagira.” Kyonkai tamanya kwo Omukama yamusigireho.

²¹ Abafilisiti bamukwata bamunonkoramu amaisho, bamutwara Gaza, bamubohesa empingo z'omulinga; yata nakora omulimo gw'ensika omu kifungo.

²² Kyonkai eishoke ly'omutwegwe elyabaire limoisibwe libanza kumera.

Samusoni nafa ayehoroize

²³ Ahanyuma Abafilisiti baterana kuhongera Dagoni ruhanga wabo ekitambo kihango nk'okweihukya bakwese, “Ruhanga waitu yatunaga Samusoni omubisha waitu omu mikono.”

²⁴ N'abantu orwo bamuboine basingiza ruhanga wabo nibagamba bati, “Ruhanga waitu yatunaga omubisha waitu omu mikono, omwisi w'ensi yaitu, ayaisire abantu baitu batali bake.”

²⁵ Kababaire banuliirwe bagira bati, “Yeta Samusoni atuzanire.” Bamwihya omu kifungo abazanira. Bamwemeleza omu nyomyo.

²⁶ Samusoni agambira omwana yabaire amukwete aha mukono ati, “Kankwate enyomyo ezisisikire enju nzeyegekeho.”

²⁷ Aho enju eshangwa eijwire abashaija n'abakazi; abatwazi bona b'Abafilisiti bhakaba bali omwo, n'aha rushwi hakaba haliho abashaija n'abakazi nka 3,000 ababaire balebire Samusoni nazana.

²⁸ Aho Samusoni atakira Omukama ati, “Waitu Mukama Ruhanga banyijuke, ninkutagiliza, ninkutagiliza eli lyonkai, mbone kwehororza Abafilisiti aha rw'amaisho gange gombili.”

²⁹ Samusoni akwata enyomyo z'omugati zombili ezisisikire enju, azeyegekaho n'ago manige gona, mukonogwe gwa bulyo ahali emoi n'omukonogwe gwa bumosho aha ndijo.

³⁰ Agamba ati, “Kanfe n'Abafilisiti.” Aho ainama n'amanige gona enju egwera abatwazi n'abantu bona ababaire bagilimu. Kityo abo yaisire aha kufakwe bakashaga balinya abo yabaire yaisire omu burorabwe bwona.

³¹ Abarumuna n'abanyarugandabe bona bagenda bamwihyayo, bamuziika omugati ya Zora na Eshitaoli omu nyanga ya Manoa, ishe. Akaramura Isiraeli emyaka 20.