Abaramuzi 14 - Ebibulia 2001

Okushwera kwa Samusoni

¹ Samusoni asongoka Timuna, agwanganamu n'omwisiki Omufilisiti.

² Aho atemba agambira ishe na nyina ati, “Mboine omwisiki Omufilisiti omuli Timuna, mbwenu mumunshelerere mushwere.”

³ Kyonkai ishe na nyina bamugambira bati, “Talimu mukazi omu banyabuzare bawe anga omu banyaruganda baitu bona iwe kwenda kushwera omukazi omu Bafilisiti abatatahiliirwe?”

⁴ Bhakaba batalikumanya okwo kyabaire nikyema aha Mukama; aha rw'enshonga hakaba nahiga obushango bw'okugwisa Abafilisiti. Omu bukiro bulinya Abafilisiti bhakaba nibatwara Abaisiraeli.

⁵ Aho Samusoni asongoka Timuna hamoi na ishe na nyina, agobera endimiro za Timuna ez'emizabibu. Niho honkai omwera gw'entare gusinda gumutahiremu.

⁶ Mwoyo wa Mukama amutungamira n'amani, ajanjabura entare nk'okwo omuntu atagatagura akabuzi; mara hakaba ataina kantu mu byara. Kyonkai ekyo yakozire tiyakigambiire ishe na nyina.

⁷ Aho asongoka afumora n'omukazi, omukazi ogwo amugenderage.

⁸ Akanya kake kakahingwire agaruka kumutwara; aruga omu muhanda agya kuleba omutumbi gw'entare ashanga gulimu ekibumbuli ky'enjoki n'obwoki.

⁹ Agukiharuramu akikwata omu mikono, agenda nakilya. Agobera ishe na nyina, abahaho balya. Kyonkai tiyabagambire kwo bwoki yabwihire mu mutumbi gwa ntare.

¹⁰ Ishe asongoka agya ow'omukazi, aho Samusoni akolerayo obugenyi, aha rw'enshonga nikwo abasigazi bagiraga.

¹¹ Orwo abantu bamuboine bamuletera batahi babo 30 kumushemba.

Ekikoikyo kya Samusoni

¹² Samusoni abagambira ati, “Kambakoikeze ekikoikyo, kamurakinyitira omu biro mushanju by'obugenyi obu mukakimanya, ndabaha ebijwaro 30 bya kitani n'ebindi kaliza makumi gashatu.

¹³ Kyonkai kamutashoboire kukinyitira, murampa ebijwaro 30 bya kitani kaliza n'ebindi 30 kaliza.” Bamugambira bati, “Koikya ekikoikyo kyawe tukihulire.”

¹⁴ Abagambira ati, “Rulya arugirwemu ekyakulya, kandi omunyamani arugirwemu ekilikunura.” Omu biro bishatu tibashoboire kwita kikoikyo ekyo.

¹⁵ Aha kiro kya kanai bagambira muka Samusoni bati, “Lembalemba baro atwitiire ekikoikyo ekyo tutakukwokya na muliro iwe n'eka ya sho. Muturaliize kwija hanu kutwinaza?”

¹⁶ Muka Samusoni amulilira omu maisho agamba ati, “Nonnoba, tolikungonza; okoikeize ab'omwaitu ekikoikyo kyonkai tiwakinyitira.” Amugambira ati, “Leba, tinakitira tata na mawe?”

¹⁷ Omukazi amulilira omu maisho ebiro mushanju by'amagenyi gabo. Orwo yamujogire muno aha kiro kya mushanju akimwitira. Aho omukazi nawe aitira ab'owabo ekikoikyo.

¹⁸ Aha kiro kya mushanju eizoba litakatobeire abanyakigo bamugambira bati, “Ni kihai ekilikunura kushaga obwoki? Ni kihai ekina amani kushaga entare?” Abagambira ati, “Kuba mutalimisize nyana yange y'enkiraiziba, timwakwisire kikoikyo kyange.”

¹⁹ Mwoyo wa Mukama amubanda n'amani, asongoka Ashikeloni aita abanyakigo 30, abanyaga; abaisire ekikoikyo abaha ebijwaro kaliza. Agaruka omwabo ekiniga kimuli kubi.

²⁰ Muka Samusoni bamusiigira mutahiwe ayabaire ali muragazawe orwo yashwera.