Abaramuzi 13 - Ebibulia 2001

Okuzarwa kwa Samusoni

¹ Abaisiraeli bashuba bagokera Omukama, abanaga omu mikono y'Abafilisiti emyaka 40.

² Hakaba bhaliho omuntu wa Zora ow'oruganda rw'Abadani, eibaralye Manoa. Mukaziwe hakaba ali mugumba ataina bana.

³ Omumalaika w'Omukama abonekera omukazi ogwo amugambira ati, “Oba mugumba, togira bana. Kyonkai oratwara enda ozare omwana w'omwojo.

⁴ Aha rw'ekyo oyelinde, otakunywa divai anga marwa, kandi otakulya muziro gwona gwona.

⁵ Omwana ogwo orumoiso rutalimugya mu mutwe aha rw'okuba aliba nyehonge ya Ruhanga kwema okuzarwa. Niwe alibanza kuyuguruza Isiraeli omu mikono y'Abafilisiti.”

⁶ Aho omukazi aija agambira iba ati, “Omuntu wa Ruhanga yanyijaho, obusobwe nibushusha obw'omumalaika wa Ruhanga, natinisa muno; tinamubaza mbali yaruga kandi tiyangambira ibaralye.

⁷ Kyonkai yangambira ati, ‘Noija kutwara enda ozare omwana w'omwojo, kityonu otakunywa divai anga marwa, mara otakulya muziro gwona gwona, enshonga omwana aliba nyehonge ya Ruhanga kwema okuzarwa kuturuka aha kufakwe.’ ”

⁸ Aho Manoa atagiliza Omukama ati, “Waitu Mukama, ninkutagiliza, omushaija wa Ruhanga ow'obaire otumire atugarukire, atwegese ebyo turakolera omwana arazarwa.”

⁹ Ruhanga ahulira eiraka lya Manoa, omumalaikawe ashuba aizira omukazi orwo yabaire ashuntamire omu musiri; kyonkai Manoa iba hakaba atainawe.

¹⁰ Omukazi airuka bwangu bwangu agambira iba ati, “Omushaija nyizireho kiro kili yambonekera.”

¹¹ Manoa aimuka agenda amuhondeire agoba omushaija amubaza ati, “Niwe mushaija ayafumoleire omukazi ogu?” Agamba ati, “N'inye.”

¹² Manoa agamba ati, “Mbwenu aho k'ebigambobye birabakwo emirolere y'omwana ebe etai mara akoreki?”

¹³ Omumalaika w'Omukama amuhorora ati, “Byona ebyo nagambire omukazi abe nibyo ayelinda.

¹⁴ Kyona kyona ekiliruga aha muzabibu atalikilya, nangu na kunywa divai handiki marwa. N'omuziro atagulya. Byona ebyo namuragiire abihikye.”

¹⁵ Manoa agambira omumalaika w'Omukama ati, “Osingire tukukelerezeho tukwitire akabuzi.”

¹⁶ Omumalaika w'Omukama amugambira ati, “N'orwo orankelerezaho, tindye kyakulya kyawe; k'oraba orahongera Omukama ekihongo ky'okwokibwa okimuhongere.” (Manoa hakaba atamanyire okwo yabaire ali mumalaika w'Omukama.)

¹⁷ Manoa abaza omumalaika w'Omukama ati, “Eibara lyawe oli ohai? Orwo ebigambo byawe birabakwo tubone kukukunisa!”

¹⁸ Omumalaika w'Omukama amugambira ati, “Kubaki nobaza eibara lyange? Leka, ly'okutangaza!”

¹⁹ Kityo Manoa akwatirana akabuzi n'ekihongo ky'emyaka, akahongera Omukama aha rwazi, akahongera ogwo akora eby'okutangaza.

²⁰ Orwo orulimi rw'omuliro rwarugire ahali elutare rukolekera omw'iguru, omumalaika w'Omukama agenderana omu rulimi rw'omuliro gwa elutare, Manoa na mukaziwe balebire. Aho bagwa ahansi bajumaire.

²¹ Omumalaika w'Omukama tiyabonekeire Manoa na mukaziwe rundi. Aho Manoa amanya okwo yabaire ali mumalaika w'Omukama.

²² Manoa agambira mukaziwe ati, “Nitwija kufa orwo twabona Ruhanga.”

²³ Kyonkai mukaziwe amugambira ati, “Kuba Omukama yaba agendeleire kutwita tiyakukunzire kihongo kya n'ekihongo ky'emyaka ebyo twamuhongera, handiki kutwoleka ebintu ebi byona. Nabyo ebyab'ebi tiyakubiturangiire.”

²⁴ Omukazi azara omwana w'omwojo, amuruka eibara amweta Samusoni; omwana akura mara Omukama amutunga omugisha.

²⁵ Mwoyo wa Mukama hakabanza kumubandira Mahanedani omugati ya Zora na Eshitaoli.