Abaramuzi 1 - Ebibulia 2001

Yuda n'abandi nibalya ensi

¹ Yoshua kayabaire yafire, Abaisiraeli babaza Omukama bati, “N'ohai aragenda atwebembeire kutabalira Abakanaani?”

² Omukama agamba ati, “Ab'oruganda rwa Yuda bagende. Leba, ensi nagibanaga omu mikono.”

³ Ab'oruganda rwa Yuda bagambira ab'orwa Simeoni barumuna babo bati, “Ija tugende hamoi omu nsi eyo batuhaire, turashanise Abakanaani; naichwe kwakwo turagenda nainywe omu nsi eyo babahaire.” Kityo ab'oruganda rwa Simeoni bagenda nabo.

⁴ Aho aba Yuda bagenda. N'Omukama anaga Abakanaani n'Abaperizi omu mikono yabo. Basingaho 10,000 omuli Bezeki.

⁵ Bagwamu Adonibezeki omuli Bezeki, bamutera basinga Abakanaani n'Abaperizi.

⁶ Adonibezeki airuka, kyonkai bamubinga bamukwata, bamutemaho ebyara bishaija eby'emikono n'eby'amaguru.

⁷ Adonibezeki agamba ati, “Abakama nshanju abatemirweho ebyara bishaija by'emikono n'eby'amaguru barondaga obuchwagulika ahansi y'emeza yange. Kityo Ruhanga yambonabonyia nantura ebyo nakozire.” Bamuleta Yerusalemu niho yagwire.

⁸ Kandi ab'oruganda rwa Yuda batera Yerusalemu, ekigo bakikwata, abamwo babaisa embanda, n'ekigo bakitaho omuliro.

⁹ Ahanyuma Abayuda batabalira Abakanaani abaturaga omu mabanga, omuli Negebu n'omu mpita.

¹⁰ Batabalira n'Abakanaani abaturaga Heburoni (eirai Heburoni yayetwaga Kiriatiaraba); basinga enganda za Sheshai na Ahimani na Talumai.

¹¹ Kuruga okwo batabalira abanyansi ba Debiri (eirai Debiri yayetwaga Kiriatiseferi).

¹² Kalebu agamba ati, “Alitabalira Kiriatiseferi akagikwata ndimusiigira Akisa muhara wange.”

¹³ Otinieli eya Kenazi, Kenazi murumuna Kalebu, agikwata. Aho amuhangiira Akisa omuhara.

¹⁴ Orwo Akisa yagobire omwa iba, agambira Otinieli kushaba Kalebu endimiro. Akisa akuburuguka aha ndogobeye, Kalebu amubaza ati, “Noyendaki?”

¹⁵ Akisa ahorora ishe ati, “Ompe omugisha aha rw'okuba ontaire omu nsi ya Negebu, ompe n'enchuro z'amaizi.” Aho Kalebu amuha enchuro z'obugyaruguru n'ez'obugyaifo.

¹⁶ Baijukuru ba ishezara Musa, Omukeni, baruga Yeriko omu kigo ky'emikindo, bagenda n'Abayuda omw'irungu lya Yuda omuli Negebu bwatana Aradi; bagenda batura hamoi n'abantu bayo.

¹⁷ Abayuda bagenda n'Abasimeoni barumuna babo basinga Abakanaani abaturaga Zefati, bagisilikiza kimoi. Nikwo ekigo ekyo kwetwa Horima.

¹⁸ Abayuda kwakwo bakwata ekigo kya Gaza n'amataka gakyo, na Ashikeloni n'amataka gakyo.

¹⁹ Omukama akashangwa abemiremu. Balya n'ensi y'amabanga, kyonkai tibashoboire kubinga banyansi ba muteleka, aha rw'okuba bhakaba baina amagali g'ekyoma.

²⁰ Kalebu akahabwa Heburoni nk'okwo Musa yabaire agambire, agibingamu batabani ba Anaki bonshatu.

²¹ Kyonkai Ababenjamini tibabingire Bayebusi abaturaga Yerusalemu. Kityo Abayebusi batura n'Ababenjamini na mambwenu.

Eka ya Yozefu nibalya ensi

²² Ab'oruganda rwa Yozefu nabo batabalira Betheli; n'Omukama hakaba abemiremu.

²³ Ab'oruganda rwa Yozefu babanza batuma ab'okunyomoza Betheli (rulinya ekigo kyayetwaga Luzu).

²⁴ Abanyomozi bagya babona omuntu omoi naruga omu kigo, bamugambira bati, “Batwoleke omuhanda gulikutaha omu kigo, turakuheera.”

²⁵ Aboleka omuhanda gulikutaha omu kigo. Ekigo bakisa embanda. Kyonkai omuntu ogwo n'ekaye babaleka bagenda.

²⁶ Omuntu ogwo agenda omu nsi y'Abahiti, ayombeka ekigo akyeta Luzu; nilyo ibara lyakyo na mambwenu.

Enganda za bikara n'Abaamori nibalya ensi

²⁷ Manase tiyabingire banyansi ba Betisheani na byaro byayo, anga banyansi ba Taanaki na byaro byayo, anga batuzi ba Dori na byaro byayo, anga aba Megido na byaro byayo; kyonkai Abakanaani bakasimbara batura omu nsi egyo.

²⁸ Orwo Abaisiraeli bagizire amani bakoza Abakanaani emilimo y'obwiru, kyonkai tibababingiremu kimoi.

²⁹ Abakanaani abaturaga Gezeri Abaefuraimu tibababingiremu.

³⁰ Abanyansi ba Kitironi n'aba Nahaloli Abazebuluni tibababingire. Bakatura n'Abakanaani abo, kyonkai babakoza emilimo y'obwiru.

³¹ Abanyansi ba Ako, n'aba Sidoni Abaasheri tibababingiremu; kutyo n'aba Ahilabu, n'aba Akizibu, n'aba Heliba, n'Aba Afiki, n'aba Rehobu.

³² Abaasheri bakatura n'Abakanaani abo abanyansi b'ensi egyo; tibababingiremu.

³³ Abanyansi ba Betishemeshi n'aba Betanati Abanafutali tibababingire. Bakatura n'Abakanaani abo abanyansi b'ensi egyo, nahosi babakoza emilimo y'obwiru.

³⁴ Abaamori bafunya Abadani babagarura omu mabanga, tibabajubwire kwija mu muteleka.

³⁵ Abaamori basimbara, batura Horiherezi, omuli Aihaloni n'omuli Shaalibimu, kyonkai ab'oruganda rwa Yozefu babatwaza amani, babakoza emilimo y'obwiru.

³⁶ Orubibi rw'Abaamori rwayemaga aha butemba bwa Akirabimu, rushuba rwema Sela rutemba.