Abaheburania 4 - Ebibulia 2001

Ekyosi kya Sabato

¹ Orwo Ruhanga akyatushuubiza okwo tulihumulira omuli wenene, twelinde omuntu n'omoi omuli inywe atalija akagwerwa mushango akalemwa kuhumulira omuli Ruhanga.

² Kuba evangeli eyo twarangiirwe niyo yonene yonene eyo barangiirwe. Kyonkai ebyo bahuliire tibyabagasire kantu, nobona bakabihulira kushai, tibabikiliize.

³ Tulibona obuhumuro obwo ichwe abaikiliize nk'okwo Ruhanga wenene yagambire ati, “Nkanigara narahira nti, ‘Tibalitaaha mu nsi eyo nakubahaire bakahumuliramu.’ ” Eki akakigamba n'orwo kwema orwo yatonzire ensi akaba agobesheleize byona.

⁴ Kuba aina mbali alikugambaho ekiro kya mushanju ati, “Aha kiro kya mushanju Ruhanga akosha emilimoye yona.”

⁵ Kandi na hanu aha nagamba ati, “Tibalitaaha mu nsi eyo nakubahaire bakahumuliramu.”

⁶ N'orwo bili bityo haliho abalitaaha omu nsi egyo bakahumura, n'orwo abarangiirwe evangeli bali ba mbere batagitahire aha rw'okutahulira kwabo.

⁷ Aha rw'ekyo Ruhanga aina ekiro ekyo yataireho, yakyeta “Kir'eki,” orwo aha nyuma yaizire akagamba omu kanwa ka Daudi, omu bigambo ebyajuliziibwe nk'ebi ati, “Kir'eki kamurahulira eirakalye, mutakugumangana mitima.”

⁸ Abantu abo kuba Yoshua yabahaire ensi egyo, ekiro ekindi Ruhanga tiyakukigambire.

⁹ Kityo n'abali ba Ruhanga bakyainayo Sabato y'ekyosi.

¹⁰ Aha rw'okuba kaishe muntu wena ataaha omu nsi ya Ruhanga akahumura, ayosha n'emilimo nk'okwo Ruhanga yayosire.

¹¹ Ahonu tutemu amani kutaaha omu buhumuliro obwo tukaikya, omuntu n'omoi atalija akagwerwa mushango aha rw'okutahulira nk'okwo.

¹² Kuba ekigambo kya Ruhanga kiina oburora n'amani, nikishara kushaaga embanda y'amogi gabili. Nikichumita nikigoba mbali omwoyo n'amagezi biteranira, mbali engingo ziteranira n'eminoita, kimanya eby'omutima gulikutekeleza n'ebyo gulikugendelera.

¹³ Ekitondwa ekyo Ruhanga atabona tikibayo. Byona nabibona geigeigei, kabutekire. Tulimwetondera obusigire.

Yesu Omukuhani Nyamukuru

¹⁴ Mbwenu orwo twagizire Omukuhani Nyamukuru ayagiire omw'iguru, n'iwe Yesu Omwana wa Ruhanga, tugume muno omu kwesiga kwaitu okwo twebuga.

¹⁵ Twina Omukuhani Nyamukuru alikutumanya obujege bwaitu, akalengesibwa omu ngeli zona nka ichwe, kyonkai tiyakozire bufu.

¹⁶ Tugiire nu obwesige, tugye aha nketo ya Ruhanga mbali ekisha kisingiire, tugende atuganyire, atugilire n'ekisha ky'okutujuna omu bwetage bwaitu.