3 Yohana 1 - Ebibulia 2001

Ebishuuro

¹ Inye omugurusi n'inye ndikukuhandikira iwe Gayo omugonzibwa, owo ngonza kakimoi.

² Omugonzibwa, ninkushabira egoshoko n'amani. Nimanya okwo aha mwoyo ogumire.

³ Nkashemelerwa muno orwo barumuna baitu abamoi baizire nibakugambahoge aha mirolere yawe, okw'olikurora geigeigei eby'amazima.

⁴ Tinaikubona byera bihango kushaaga ahali ebi, kuhulira okwo abaana bange balikukora eby'amazima.

Eibara lirungi lya Gayo

⁵ Omugonzibwa, nokora kurungi omulimo gw'obwesigwa ahali byona byona eby'olikukolera barumuna baitu, obwa muno abagenyi

⁶ abakugambiire omu nteko okw'oina engonzi. Oraba okozire kurungi kubakomera entanda, manyasi ekyo kigiro ekilikushemelera Ruhanga.

⁷ Etabaro eyo balimu bagilimu aha rwa Kirisito mara tibakatoraga bujuni bwona bwona kuruga omu batakansi.

⁸ Kityo tuli b'okujuna abantu aba, tushobore kuhwerana nabo aha aha rw'okujulira amazima.

Dioterefe na Demetirio

⁹ Haliho ekyo nahandikiire enteko; kyonkai Dioterefe agonza okweshutuura, takunda kubonakwo nyina bushobora.

¹⁰ Kityo kandaija, ebyo alikukora ndabigamba. Nangambaho ebigambo ebijunzire. Talikugarukir'aho honkai. Nayanga kyere n'okunyegeza barumuna baitu, n'abandi abalikwenda kubanyegeza nabatanga mara ashuba abashenda omu nteko.

¹¹ Mugonzibwa, otalirondora muntu mubi, orondore omurungi. Omuntu akora kurungi aba wa Ruhanga; kandi akora kubi ogwo takabonaga Ruhanga.

¹² Demetirio ogwo najulirwa buli omoi, n'amazima gonene nigamujulira, kandi nanye nyenene nimujulirakwo, mara nainywe nimumanya okwo ngamba amazima.

¹³ Naba nkyaina bingi eby'okukuhandikira, kyonkai tinakugondize kuhandikisa kalamu na bwino.

¹⁴ Ninshuubira kukubona juba, twije tubonangane tufumore.

¹⁵ Ogire emilembe. Banywanyi baitu nibakukeisa. Naiwe onshulire banywanyi baitu bona.