2 Yohana 1 - Ebibulia 2001

Ebishuuro

¹ Inye omugurusi n'inye ndikukuhandikira iwe Omwamikazi endonkwa hamoi n'abaana bawe, abo ndikugonza kakimoi. Mara t'inye nyenkai, kyonkai n'abandi bona abalikumanya amazima,

² aha rw'enshonga y'amazima agasingiire omuli ichwe mara galiguma gatusingiiremu eirai lyona.

³ Ruhanga Isheichwe na Yesu Kirisito Omwanawe basinge babagilire ekisha, batutunge ekisha n'emilembe, batugilire n'obuganyizi omu mazima n'engonzi.

Amazima n'engonzi

⁴ Nkashemelerwa muno kanashangire abaana bawe abamoi nibakora eby'amazima, nk'okwo Ruhanga Isheichwe yatuhangiire.

⁵ Mbwenu Mwamikazi ninkutagiliza, tikugir'oti ninkuhandikira muhango guhya, ninkuhandikira ogwo tutura nagwo kwema karai, ogw'okugonzangana.

⁶ Engonzi ezo ndikugamba nikwo kugamb'oti tukwate emihango. Kandi omuhango gwonene nigw'ogu nk'okwo wakaguhuliire kuruga aha mbandizo: Mwekomye engonzi.

⁷ Abagambi b'ebishuba bangi bemaliire ensi zona, nibo bantu abalikwanga okwo Yesu Kirisito yaizire ali muntu. Omuntu nk'ogu mugambi w'ebishuba mara mushengi wa Kirisito.

⁸ Murayemanya mutakuferwa ebyo mutura mukolera, nirwo mulibona empeerwa egobire.

⁹ Kaishe muntu alikupapaara akaburwa kuguma aha byo Kirisito alikwegesa ogwo naba atali wa Ruhanga. Ayakaguma aha bilikwegesibwa ebyo, ogwo aba wa Isheichwe n'omwana bombili.

¹⁰ K'omuntu wena wena yakwija okwo akabegesa ebitali ebi ebyo ndikugamba, mutamunyegeza mu nju yanyu, nangu n'okumukeisa mutaziza.

¹¹ Manyasi alikumukeisa naba nashemelerwa ebikorwabye ebibi.

¹² N'orwo eby'okukuhandikira nyina bingi, tinakugondize kukoza karatasi na bwino. Shana ninshubira kwija kukubona, tukabonangana omu maisho tukafumora, ebyera bibone kugobeelera.

¹³ Abaana bawe aba murumuna wawe endonkwa nibakushura.