2 Samweli 7 - Ebibulia 2001

Ruhanga naragana kwombekera Daudi

¹ Omukama Daudi atura omwe omu milembe, kandi Omukama Ruhanga yamulinda ababishabe bona abamwataine.

² Omukama Daudi agambira Natani omurangi ati, “Leba, nintura omu nju y'emielezi, kyonkai Esanduku ya Ruhanga netura omw'ihema.”

³ Natani agambira Omukama Daudi ati, “Ogende okore okw'olikutekeleza, okuba Omukama Ruhanga akwemiremu.”

⁴ Kyonkai omu kiro ekyo mwonene Omukama Ruhanga agambira omurangi Natani ati,

⁵ “Ogende ogambire Daudi omwiru wange oti, ‘Omukama nabaza ati: Iwe wakunyombekera enju y'okuturamu?

⁶ Kwema nyihire Abaisiraeli Misiri kuhika kir'eki tinkaturaga mu nju. Mbali nkagya hona ntura omw'ihema.’

⁷ Hona mbali ndagiire n'Abaisiraeli, nyina omuramuzi omu baramuzi ba Isiraeli, owo ndaragiire kushumba abantu bange ba Isiraeli nti, ‘Kubaki mutakanyombekeraga nju ya mielezi?’

⁸ Aha rw'ekyo oragambira omwiru wange Daudi oti, ‘Omukama w'amahe nagamba ati: Nkakwihya omw'ilisizo nolisa entama, nakuhindura mwebembezi w'abantu bange ba Isiraeli.

⁹ Nakwemagamu hona mbali wagyaga, nakwitira ababisha bawe bona, kandi ndakuha eibara lihango nk'ely'ab'eiranga omu nsi.

¹⁰ Abantu bange ba Isiraeli ndabarondera omwanya mbatemu, babone kugira obutaka bw'okuturamu obwo bataliihwamu rundi. Kandi abantu ababi tibakibagingiza rundi nk'obubere,

¹¹ kwema orwo nataireho abaramuzi kubatwara. Mara ndakulinda ababisha bawe. Ekindi Omukama nakumanyisa okwo arakuha oruzaro.

¹² K'ebiro byawe biligoba okafa, bakakuziika omuli bashwenkuru, omu bana bawe nyina owo ndihindura Mukama mara nkamugumisiza obukamabwe.

¹³ Ogwo niwe alinyombekera enju; kandi ndigumisa obukamabwe ebiro byona.

¹⁴ Ndiba ishe, na wenene aliba mwana wange. K'alikora kubi ndimubonabonyia okwo ishemuntu mwana abonabonyia omwanawe.

¹⁵ Kyonkai tindilekera kumugilira kisha nk'okwo nalekeire kukigilira Shauli.

¹⁶ Oruzaro rwawe rulirama, n'obukama bwawe buliikaraho ebiro byona. Engoma yawe elimelera.’ ”

¹⁷ Natani akagambira Daudi byona ebyo Ruhanga yamushuruliire.

Enshara ya Daudi

¹⁸ Aho Omukama Daudi ataha omw'ihema ashuntama omu maisho g'Omukama, ashoma enshara ati, “Inye ndi ohai, waitu Mukama Ruhanga, n'eka yange yab'ehai, kulemwa kundeta kugoba aha?

¹⁹ Kyonkai ekyo ahali iwe kike waitu Mukama Ruhanga. Mbwenu wayongeraho n'okugamba ebiliba aha ka y'omwiru wawe, omuntu wamubonesa ekyab'eki, waitu Mukama Ruhanga.

²⁰ Daudi yakukugambiraki ekishagireho? Kuba iwe, waitu Mukama Ruhanga nomanya omwiru wawe!

²¹ Aha rw'endagano yawe okakora ebihango ebyo byona nk'okwo watekeleize, mara wabimanyisa omwiru wawe.

²² Nikyo obera muhango, waitu Mukama Ruhanga; aha rw'okuba taliho n'omoi akushusha, kandi taliho Ruhanga ondijo atali iwe, nk'okwo tukahulira.

²³ Ni ihangaki omu nsi elilikushusha abantu bawe ba Isiraeli, abo wayechunguliire kuba bantu bawe. Okabona eiranga aha rw'okubakolera ebihango mara eby'okutiinisa, wababingira amahanga na baruhanga bago.

²⁴ Okataho Abaisiraeli kuba bantu bawe eirai lyona; mara naiwe waitu Mukama waba Ruhanga wabo.

²⁵ Mbwenu, waitu Mukama, eirai lyona hamisa ekigambo ekyo wagamba aha mwiru wawe n'aha ka ye.

²⁶ Eibara lyawe balilikuza eirai lyona bati, ‘Omukama w'amahe niwe Ruhanga wa Isiraeli,’ n'engoma y'omwiru wawe Daudi oligigumisa eirai lyona.

²⁷ Kuba iwe waitu, Omukama w'amahe, Ruhanga wa Isiraeli, oshuruliire omwiru wawe oti, ‘Ndikwombekera enju;’ nikyo omwiru wawe yagilira obumanzi bw'okukushaba amatungwa aga.

²⁸ Aho mbwenu waitu Mukama Ruhanga, niwe Ruhanga, n'ebigambo byawe by'amazima, kandi oraganisize omwiru wawe ekintu eki ekirungi.

²⁹ Aha rw'ekyo mbwenu, osinge otunge eka y'omwiru wawe omugisha, eikareho eirai lyona, okuba, waitu Mukama Ruhanga, niwe wakigamba. Eka y'omwiru wawe egume etungwe omugisha eirai lyona.”