2 Samweli 5 - Ebibulia 2001

Daudi naba Mukama wa Isiraeli na Yuda

¹ Ahanyuma enganda zona za Isiraeli zigya Heburoni owa Daudi zimugambira ziti, “Leba ichwe tuli bwamba bwawe, mubili gwawe.

² Makiro agahingwire orwo Shauli abaire ali Mukama waitu, niwe obaire oyebembera Isiraeli kutabara n'okutabaruka. Kandi Omukama akakuraganisa ati, ‘Iwe oliba mushumba w'abantu bange ba Isiraeli, oliba mwebembezi wa Isiraeli.’ ”

³ Nikwo abagurusi bona ba Isiraeli kushanga Omukama Daudi Heburoni, bakakora nawe endagano omu maisho g'Omukama Ruhanga, bakora Daudi amajuta aba Mukama wa Isiraeli.

⁴ Daudi hakabanza kutwara aina emyaka 30, mara akatwara emyaka 40.

⁵ Akatwara Yuda ayemire Heburoni emyaka mushanju n'emyezi mukaga, kandi yatwara Isiraeli yona na Yuda emyaka 33 ayemire Yerusalemu.

Daudi natera ekikaare kya Yerusalemu

⁶ Daudi n'abaisherukarebe agenda kurashanisa Yerusalemu. Abayebusi abanyansi bamwo bamugambira bati, “Totahemu, shana oihyemu abaigaire amaisho n'abalema,” nibatekeleza bati, “Daudi talikushobora kutahamu.”

⁷ Kyonkai Daudi atera eboma ya Sioni, nikwo kigo kya Daudi.

⁸ Kir'ekyo agamba ati, “Wena wena aratera Abayebusi arabe omu rwina rw'amaizi kurashanisa abalema n'abaigaire amaisho, kuba tindikubenda.” Nikyo bagambira bati, “Abaigaire amaisho n'abalema batalitaha mu nju.”

⁹ Daudi atura omu boma egyo, agyeta kigo kya Daudi. Yakyombeka amaju obuzingora kwema Milo kugaruka omunda.

¹⁰ Mara ayeyongera kugira obushobora okuba Omukama Ruhanga w'amahe hakaba amwemiremu.

¹¹ Ahanyuma Hiramu Omukama wa Tiro, atuma entumwa ahali Daudi mara amutwekera emiti y'emielezi n'abaselemara n'abombeki bamwombekera enju.

¹² Aho Daudi amanya okwo Omukama amutaireho kuba Mukama wa Isiraeli, n'okwo agoshoire obukamabwe aha rw'abantube ba Isiraeli.

Batabani ba Daudi abazaliirwe Yerusalemu

¹³ Daudi kayarugire Heburoni yagya Yerusalemu, yashweleramu ensholeke ezindi n'abakazi abandi, yayeyongera kuzara abana.

¹⁴ Aga nigo mabara g'abo yazaliire Yerusalemu: Shamua, Shobabu, Natani, Solomoni,

¹⁵ Ibihari, Elishua, Nefegi, Yafia,

¹⁶ Elishama, Eliada na Elifeleti.

Daudi nasinga Abafilisiti

¹⁷ Orwo Abafilisiti bahuliire okwo Daudi yakozirwe amajuta kuba Mukama wa Isiraeli, bona bagya kumuhiga. Kyonkai Daudi k'ahulira okwo balikumuhiga agya omu boma.

¹⁸ Abafilisiti bakaba beyaliliire omu Ruhanga rwa Refaimu.

¹⁹ Daudi abaza Omukama ati, “Ngende ntere Abafilisiti aba, orabampa?” Omukama amuhorora ati, “Ogende, ndabakunaga omu mikono.”

²⁰ Daudi agenda Baaliperazimu, aba niyo abatelera. Agamba ati, “Okwo omwijuro gutema, nikwo Omukama yantemera ababisha bange.” Nikwo omwanya gulinya kwetwa Baaliperazimu.

²¹ Abafilisiti banagaho ebihuuku byabo, Daudi n'abaisherukarebe babitwara.

²² Abafilisiti bashuba bagya omu Ruhanga rwa Refaimu beyalilir'omwo.

²³ Ka Daudi yabalize Omukama, amuhorora ati, “Otagenda, shana obarabe enyuma obazingore, obagobe bwatana emiti y'emizeri.

²⁴ Ahanyuma orwo orahulira enshwagara aha mizeri eiguru omanzare, okuba aho nimba nakwebembeire kutera eihe ly'Abafilisiti.”

²⁵ Daudi akora nk'okw'Omukama yamuragira, atera Abafilisiti, ayema Geba agoba Gezeri.