2 Samweli 3 - Ebibulia 2001

¹ Ahanyuma bhakabaho endashana y'ebiro bingi ahagati y'amahe ga Shauli n'aga Daudi. Daudi agendelera kugira amani kushagaho, kandi aba Shauli bagendelera kuhwa amani.

Batabani ba Daudi abazaliirwe Heburoni

² Batabani ba Daudi abazaliirwe Heburoni: Omuzigaijogwe ni Amunoni, owo yazaire ahali Ahinoamu owa Yezireeli.

³ Owa kabili ni Kileabu, ogu akamuzara ahali Abigaili entumbwakazi ya Nabali owa Karimeli. Owa kashatu ni Abusalomu, ogu namuzara ahali Maaka muhara wa Talumai Omukama wa Geshuri.

⁴ Owa kanai ni Adoniya, ogu namuzara ahali Hagiti. Owa katanu ni Shefasia, ogu namuzara ahali Abitali.

⁵ Owa mukaga ni Itireamu, ogu namuzara ahali Egila. Batabani ba Daudi aba bona bakazalirwa Heburoni.

Abuneri nashengera owa Daudi

⁶ Orwo aba Shauli babaire bakyarashana n'aba Daudi, Abuneri yagira amani omu baisherukare ba Shauli.

⁷ Shauli hakaba aina ensholeke, muhara wa Aiya, eibaralye Rizipa. Ishibosheti agambira Abuneri ati, “Kubaki norara n'ensholeke ya tata?”

⁸ Kurug'aho Abuneri atamwa muno aha rw'ebigambo ebyo Ishibosheti yamugambira, yamushubamu ati, “Nolenga inye nakubanja Shauli? Notekeleza oti ninkolera oruganda rwa Yuda? Kwema akarai kona mba mwesigwa ninkolera aba sho Shauli, nkolera n'abarumuna, n'abatabani, kandi iwe tinkunagire mu mikono ya Daudi; iwe mbwenu wankomaho obufu aha mukazi.

⁹ Ruhanga nakanyite bwita kandaba ntakoleire Daudi eky'Omukama yamuraganisize,

¹⁰ obukama kubwaka eka ya Shauli akabuha eka ya Daudi, akatwara Isiraeli na Yuda kwema Dani kugoba Beerisheba!”

¹¹ Ishibosheti tiyashoboire kuhorora rundi Abuneri kigambo kuba akamutina.

¹² Abuneri atuma entumwa ahali Daudi mbali yabaire ali, amuragiraho ati, “Ensi egi y'ohai? Tukore endagano, mara ndakwemamu, Isiraeli yona ngigarure owawe.”

¹³ Daudi ati, “Kurungi. Ndakora endagano naiwe, kyonkai ninkwenza ekintu kimoi, nakyo niky'eki: Tolikwija kuntahamu otalesire Mikali muhara wa Shauli.”

¹⁴ Ahanyuma Daudi atuma entumwa ahali Ishibosheti eya Shauli ati, “Ompe Mikali mukazi wange owo najugire obushunshu 100 bw'Abafilisiti.”

¹⁵ Ishibosheti nikwo kumutuma, akamwihya omwa iba Palisieli mutabani wa Laishi.

¹⁶ Iba agenda amuhondeire nalira omuhanda gwona kuhika Bahurimu. Abuneri amugambira ati, “Genda, shubayo.” Palisieli ashubayo.

¹⁷ Abuneri afumora n'abagurusi ba Isiraeli ati, “Yahingwirweho ebiro mwezire Daudi k'aba Mukama wanyu.

¹⁸ Mbwenu obushango nibw'obu: Omukama akamuraganisa ati, ‘Ndikoza omwiru wange Daudi kurokora abantu bange ba Isiraeli omu mikono y'Abafilisiti, n'omu mikono y'ababisha babo bona.’ ”

¹⁹ Abuneri ashuba afumora n'Ababenjamini, amara agenda Heburoni kugambira Daudi ekyo Isiraeli yona n'oruganda rwa Benjamini balikugonza kukora.

²⁰ Abuneri n'abashaija 20 bagya Heburoni owa Daudi, abakolera obugenyi.

²¹ Abuneri agambira Daudi ati, “Ninyija kugenda nkahikanisa Abaisiraeli bona babe bawe Rugaba Omukama wa Isiraeli, bakore endagano naiwe, obatware okw'olikwenda.” Aho Daudi amujubura, agenda omu milembe.

Yoabu naita Abuneri

²² Omu kanya ako abaramata ba Daudi batabaruka na Yoabu, baija n'eminyago nyingi. Nawe Abuneri hakaba atakili Heburoni owa Daudi, okuba hakaba yamujubwire yagenzire.

²³ Orwo Yoabu n'eihe lyona elyo yabaire ainalyo bagobire, Yoabu bamugambira bati, “Abuneri mutabani wa Neri abaire aizire ow'Omukama mara yamujubura yagenda n'emilembe.”

²⁴ Yoabu nikwo kugya ow'Omukama akamubaza ati, “Wakoraki? Abuneri aizire owawe wamutaishura yagenda?

²⁵ Nomanya okwo aizire kukubeiya, kunyomoza byona eby'olikukora?”

²⁶ Yoabu kayarugire owa Daudi, atuma entumwa kuhondera Abuneri, zimugarulira aha iziba lya Sira, kyonkai Daudi hakaba atalikumanyaho kantu ahali ebyo.

²⁷ Orwo Abuneri yagarukire Heburoni, Yoabu amutwara aha rubaju omugati y'ekihigi kufumora nawe omu kyama, amuchumitiraho eibunda, afa, amwehora atyo aha rwa Asaheli omurumuna.

²⁸ Ahanyuma Daudi kubimanya agamba ati, “Inye n'obukama bwange titwina ntambara eirai lyona omu maisho g'Omukama aha rw'okwitwa kwa Abuneri eya Neri.

²⁹ Bururukire Yoabu n'eka ya ishe yona. Eka ya Yoabu etaliburwamu wa kwitwa, anga omubembe, anga akwetwe ensiso, anga ow'okugwa omu ndashana, anga omwanje abuzirwe ekyakulya.”

³⁰ Nikwo Yoabu na Abishai omurumuna baisire Abuneri okuba akaita Asaheli murumuna wabo omu ndashana ya Gibeoni.

³¹ Daudi agambira Yoabu n'abantu bona abo yabaire ainabo ati, “Temura emyendo yanyu mwekome engunia, muchulire Abuneri.” Omukama Daudi agenda ahondeire orwino.

³² Abuneri bamuziika Heburoni. Omukama Daudi achulira muno Abuneri aha nyanga, abantu bona bachura.

³³ Akamuchulira namutongya ati, “Abuneri yakufire nk'omufera?

³⁴ Waba otabohirwe mikono, n'omu maguru waba otainamu mpingo. Wafa nk'omuntu aisirwe ababi.” Abantu bona bashuba kumuchulira.

³⁵ Mara ahanyuma batagiliza Daudi kulya ekyakulya likyali bwamushana, kyonkai ayangira kimoi ati, “Ruhanga nakanyite bwita kandaroza aha kyakulya anga ekindi kyona kyona eizoba litakatobeire!”

³⁶ Abantu kabakimanyire kibashemelera; nk'okwo buli kintu eky'Omukama yakoraga kyashemeleraga abantu bona.

³⁷ Abantu na Isiraeli yona kir'ekyo bashobokerwa okw'Omukama Daudi tiwe yaisire Abuneri eya Neri.

³⁸ Agambira abaramatabe ati, “Timulikumanya okwo kir'eki omutwazi w'ekitinwa omuli Isiraeli bamwita.

³⁹ Kir'eki tinyina mani n'orwo ndi Mukama enkorwa majuta. Batabani ba Zeruya nibangumira muno. Omukama abonabonyie omuntu mubi nk'okwo obubibwe buli.”