2 Samweli 23 - Ebibulia 2001

Ebigambo bya Daudi eby'enzindo

¹ Ebi nibyo bigambo bya Daudi eby'enzindo. Ebigambo bya Daudi mutabani wa Yese, ebigambo by'omushaija ayatungikirwe, enkorwa majuta ya Ruhanga wa Yakobo, omuhoyi w'empoya zinura eza Isiraeli:

² “Mwoyo w'Omukama akangambira omu kanwa kange, ekigambokye kikaba kindi aha rulimi.

³ Ruhanga wa Isiraeli agambire, Rwazi rwa Isiraeli angambiire. Orwo omuntu atwaza abantu amazima, hakabatwara natina Ruhanga,

⁴ abaakiza nk'omushana gwa bwankya, abashamulira nk'eizoba lilikushabuka, ashusha obwankya obutaina bichwi, aba nk'enjura emeza obunyasi omw'itaka.

⁵ Nikwo Ruhanga alitunga baijukuru bange omugisha, okuba akozire nanye endagano y'eirai lyona, egobeleire omuli byona mara ehamire. Alinjunira kimoi antunge n'ebyo ndikwenda.

⁶ Kyonkai ababi bona balinagwa nk'amahwa, agatakwatwa mikono.

⁷ Omuntu wena alyenda kugakwata, agakwase ekyoma n'orubango rw'eichumu, mara baligasosotoza omuliro.”

Abaisherukare emanzi za Daudi

⁸ Aga nigo mabara g'abaisherukare emanzi abo Daudi yabaire ainabo: Yoshebashebeti owa Takemoni; hakaba ali mukuru w'abashatu. Akakwata eichumulye yarashanisa abantu 800, yabaita omu kanya kamoi.

⁹ Alikumuhondera omu baisherukare abashatu emanzi hakaba ali Eleazari eya Dodo, ow'oruganda rwa Ahohi. Akaba ali hamoi na Daudi orwo bakooleize Abafilisiti ababaire batabaire, Abaisiraeli bakairuka.

¹⁰ Wenene akaimuka yatera Abafilisiti kuhika orwo omukonogwe gwalemirwe gukomera aha mbanda; Omukama akakora obujuni bungi kir'ekyo. Abantu bakagaruka kunyaga abaisirwe kwonkai.

¹¹ Alikuhondera Eleazari hakaba ali Shama eya Age owa Arari. Abafilisiti bakaba bateraniire Lehi mbali habaire hali omusiri gwijwire enkore; abantu bakabairuka,

¹² kyonkai wenene yayemelera omugati y'omusiri yagulinda, yaita n'Abafilisiti. Omukama akakora obujuni bungi.

¹³ Haihi n'eigesha abashatu omu bebembezi 30 bagya ahali Daudi aha Nyanja ya Adulamu orwo omutwe gw'Abafilisiti gusisiire omu Ruhanga rwa Refaimu.

¹⁴ Omu kanya ako Daudi hakaba ali omu boma, kandi orusisira rw'Abafilisiti rukaba ruli Betelehemu.

¹⁵ Daudi aija agira eiliho, agamba ati, “K'omuntu yakunyihiire amaizi g'okunywa aha iziba lya Betelehemu bwatana aha kihigi nkaganywa!”

¹⁶ Aho abashaija bashatu emanzi baraba omu rusisira rw'Abafilisiti, bataha amaizi aha iziba lya Betelehemu bwatana aha kihigi, baija bagamuletera. Kyonkai ayanga kuganywa shana agashesha nk'ekihongo ky'okunywa, agahongera Omukama.

¹⁷ Agamba ati, “Nikikabure, waitu Mukama, kunywa amaizi aga! Manya nakushusha ayanywa obwamba bw'abashaija aba abehoiremu bakagenda kugahiiga.” Aha rw'ekyo ayanga kuganywa. Ebi nibyo abashaija bonshatu emanzi bakozire.

¹⁸ Abishai murumuna Yoabu (nyinabo hakaba ali Zeruya) niwe yabaire ali mukuru wa balinya 30. Akakwata eichumulye yarashana n'abantu 30 yabaita, nikwo kugira eibara omu 30 ago.

¹⁹ Omu 30 niwe yaranganwaga muno, yaba mukuru wabo; kyonkai tiyagobire ahali balinya abashatu.

²⁰ Benaya eya Yehoyada, omushaija emanzi ya Kabuzeeli ayakozire eby'amaani bingi, nangu yaita n'emanzi z'amani ibili eza Moabu. Ashuba asongoka aitira entare omu kiina omu bukiro bw'eseluji.

²¹ Akaita Omumisiri, omushaija ekishoka. Omumisiri hakaba akwete eichumu, kyonkai Benaya yamugendera n'enkoni, yamwaka eichumu elye yaba nilyo amwisa.

²² Ebyo nibyo Benaya eya Yehoyada yakozire akabona eibara omu baisherukare 30 emanzi.

²³ Akaba ainakwo eiranga omu 30, kyonkai tiyagobire ahali balinya abashatu. Daudi amuronka amuhindura mukuru w'abalinzibe.

²⁴ Asaheli murumuna Yoabu hakaba ali omu 30; Elihanani eya Dodo owa Betelehemu,

²⁵ Shema owa Harodi, Elika owa Harodi,

²⁶ Helesi Omupeleti, Ira eya Ikeshi owa Tekoa,

²⁷ Abiezeri owa Anatoti, Mebuni Omuhushati,

²⁸ Salumoni Omuhohi, Maharai owa Netofa,

²⁹ Helebu eya Baana owa Netofa, Itai eya Ribai owa Gibea ey'Ababenjamini,

³⁰ Benaya owa Piratoni, Hidai ow'obugera bwa Gaashi,

³¹ Abialiboni Omwarubati, Azimaweti owa Bahurimu,

³² Eliaba owa Shaalaboni, batabani ba Yasheni, Yonatani,

³³ Shama Omuharari, Ahiamu eya Sharari Omuharari,

³⁴ Elifeleti eya Ahasibai owa Maaka, Eliamu eya Ahitofeli Omugiloni,

³⁵ Heziro owa Karimeli, Paarai Omwauribi,

³⁶ Igali eya Natani owa Zoba, Bani Omugadi,

³⁷ Zeleki Omwamoni, Naharai Omubeeroti, omutwazi w'ebikwato bya Yoabu mutabani wa Seruya,

³⁸ Ira Omwitiri, Garebu Omwitiri,

³⁹ na Uria Omuhiti. Bona hamoi bali makumi 37.