2 Samweli 20 - Ebibulia 2001

Sheba nashenga Daudi

¹ Hakaba haliho omushaija mubi eibaralye Sheba, mutabani wa Bikiri, Omubenjamini; atera orukuli agamba ati, “Daudi ti waitu, mutabani wa Yese tatukweteho; Baisiraeli inywena, buli omoi ashube omuka.”

² Aho Abaisiraeli basigaho Daudi bahondera Sheba. Kyonkai aba Yuda baguma aha Mukama wabo, kwema Yorudani kuhika Yerusalemu.

³ Orwo Daudi yagobire Yerusalemu omu kikaarekye, akwata ensholeke 10 ezo yabaire asigire kulinda ekikaare, azita omu nju emoi aziikwasa omulinzi. Yazilisaga kyonkai tiyabyamire nazo. Bakaikara nk'entumbwakazi bafungirwe kuhika okufa kwabo.

Yoabu naita Amasa

⁴ Ahanyuma Omukama agambira Amasa ati, “Onyetere aba Yuda omu biro bishatu, naiwe wenene obe oli aha.”

⁵ Amasa agenda abeta, kyonkai akelererwa kushaga eibanga elyo yabaire aragiirwe.

⁶ Daudi agambira Abishai ati, “Mbwenu Sheba eya Bikiri naija kutukora kubi kushaga Abusalomu; okwate abairu bange omubinge atakwija akakwata ebigo by'eboma akatwesheleka.”

⁷ Abashaija ba Yoabu aba Kereti, aba Peleti n'abaisherukare bona baruga Yerusalemu bahondera Abishai kubinga Sheba eya Bikiri.

⁸ Orwo babaire bali Gibeoni aha ibare lihango, Amasa abatanganwa. Yoabu hakaba ajwete ekijwaro ky'endashana, akikomesize orufufu, n'embanda omu ruraro rwayo agyekomire aha itako. Kyonkai kayabaire nagenda eshohorogoka eragara.

⁹ Yoabu agambira Amasa ati, “Murumuna wange, ogumire?” Amukwata omuleju n'omukono gwa bulyo nk'aramunywegera.

¹⁰ Kyonkai Amasa tiyafireho mbanda eyo Yoabu yabaire akwete; aho agimuchumita omu rubunda, ashesha amarage ahansi obuzira kugimuchumita lya kabili; afa. Aho Yoabu na Abishai omurumuna, babinga Sheba mutabani wa Bikiri.

¹¹ Omoiho omu baisherukare ba Yoabu ayemelera ahali Amasa agamba ati, “Wena wena alikwenda Yoabu mara ali wa Daudi, ahondere Yoabu.”

¹² Amasa aikara nyaihanda ayekurungire omu bwamba. Buli omoi ayagobagaho akamubona, ayemelera. Omwisherukare okwo kayaboine okwo abantu bona balikugoba aho bakemelera, aihya Amasa nyaihanda amutwara omw'ishwa, amunagaho ekijwaro.

¹³ Aho nikwo abantu bona kuhingura bakahondera Yoabu kubinga Sheba eya Bikiri.

Okwitwa kwa Sheba

¹⁴ Sheba araba omu nganda zona za Isiraeli agoba Abeli eya Betimaka. Ab'oruganda rwa Bikiri bona bahurura, nabo bagenda bamuhondeire.

¹⁵ Abaisherukare abo Yoabu yabaire ainabo, baija bamutangira omuli Abeli eya Betimaka. Batera orusinde aha rukuta rw'ekigo, mara bakaba nibatemba eboma egyo, bagikumbya.

¹⁶ Aho omukazi mugezi ayema omu kigo ayeta ati, “Hulira! Hulira! Mugambire Yoabu ailire hanu mugambire.”

¹⁷ Amwilira haihi; omukazi amubaza ati, “Iwe oli Yoabu?” Agamba ati, “N'inye.” Aho amugambira ati, “Hulira nkugambire.” Yoabu agamba ati, “Nkuhuliliize.”

¹⁸ Aho omukazi agamba ati, “Eira bagambaga bati, ‘Kakuli kwehanuza behanuze omuli Abeli.’ Nikwo bamaraga batyo ekigambo.

¹⁹ Nanye omuli Isiraeli ndi muntu w'emilembe mara ndi mwesigwa. Mbwenu nohiga kusilikya ekigo omuzaire omuli Isiraeli; kubaki oite omutungo gw'Omukama?”

²⁰ Yoabu ahorora ati, “Nikikabure, nikikabure, tinakubaita anga kubasilikya!

²¹ Ekigambo ekyo tikwo kili, shana omushaija omoi w'omu mabanga ga Efuraimu, alikwetwa Sheba eya Bikiri, niwe alikushenga Omukama Daudi. Mube niwe mutaishura wenkai, nduge aha kigo eki.” Omukazi agambira Yoabu ati, “Leba twaija kukurasira omutwegwe tugurabye aha boma eiguru.”

²² Aho omukazi ashara amagezi arabamu abantu bona omu kigo. Sheba mutabani wa Bikiri bamutemaho omutwe, bagurasira Yoabu. Aho atera enzamba baruga omu kigo benaganaga, buli muntu ashuba omuka, Yoabu agaruka Yerusalemu ow'Omukama.

Ab'emiruka omu bukama bwa Daudi

²³ Yoabu hakaba ali mukuru w'eihe lyona lya Isiraeli. Benaya mutabani wa Yehoyada hakaba ali mukuru w'aba Kereti n'aba Peleti.

²⁴ Adoramu hakaba ali mukuru w'emilimo y'ensika. Yehoshafati mutabani wa Ahiludi hakaba ali muhandiki w'eby'amakiro.

²⁵ Sheva hakaba ali muhandiki. Zadoki na Abiatari bakaba bali bakuhani.

²⁶ Ira Omuyairi nawe hakaba ali mukuhani wa Daudi.