2 Samweli 2 - Ebibulia 2001

Daudi naba Mukama wa Yuda

¹ Ebyo kabyahoire, Daudi abaza Omukama ati, “Ngye omu kigo kimoiho omu bigo bya Yuda.” Omukama amuhorora ati, “Ogende.” Daudi abaza ati, “Ngye omuli kihai?” Omukama ati, “Heburoni.”

² Aho Daudi agya Heburoni, agenda na bakazibe bombili, Ahinoamu owa Yezireeli na Abigaili entumbwakazi ya Nabali owa Karimeli.

³ Daudi abashaijabe abo yabaire ainabo abatwara buli omoi n'ekaye, batura omu bigo bya Heburoni.

⁴ Ahanyuma ab'oruganda rwa Yuda baija bakolerayo Daudi amajuta kuba Mukama w'oruganda rwa Yuda. Orwo bagambire Daudi bati, “Abantu ba Yabeshigileadi nibo baziikire Shauli,”

⁵ abatumaho entumwa abaragiraho ati, “Omukama abatunge omugisha aha rw'okuba mwolekire obwesigwa obu ahali Shauli Mukama wanyu, mukamuziika.

⁶ Omukama abagilire ekisha n'amazima. Orwo mukozire mutyo nanye ndabakolerage.

⁷ Aha rw'ekyo mube manzi mumanzare; kuba Shauli Omukama wanyu afire, kandi ab'oruganda rwa Yuda bankozire amajuta kuba Mukama wabo.”

Ishibosheti Omukama wa Isiraeli

⁸ Abuneri eya Neri, omukuru w'eihe lya Shauli, hakaba yakwete Ishibosheti mutabani wa Shauli yamutwete Mahanaimu;

⁹ yamutendekire kuba Mukama wa Gileadi, n'Abaashuri, na Yezireeli, n'oruganda rwa Efuraimu, n'orwa Benjamini na Isiraeli yona.

¹⁰ Ishibosheti mutabani wa Shauli akatwara Isiraeli aina emyaka 40. Akatwara emyaka ebili. Oruganda rwa Yuda rwagwera owa Daudi.

¹¹ Daudi akatwara oruganda rwa Yuda emyaka mushanju n'emyezi mukaga ayemire Heburoni.

Endashana ya Isiraeli na Yuda

¹² Abuneri eya Neri, n'abashaija ba Ishibosheti mutabani wa Shauli, baruga Mahanaimu bagya Gibeoni.

¹³ Yoabu eya Zeruya n'abashaija ba Daudi, batabara babatanganwa aha Rutunga rwa Gibeoni; bashuntama ahansi, abamoi rubaju oru rw'orutunga n'abandi aha rubaju orundi.

¹⁴ Aho Abuneri agambira Yoabu ati, “Abasigazi baije batuzanire, bazanise ebikwato by'endashana.” Yoabu agamba ati, “Baimuke.”

¹⁵ Baimuka babarwamu 12 ab'oruganda rwa Benjamini na Ishibosheti eya Shauli, 12 abandi babarwa ab'omu bashaija ba Daudi.

¹⁶ Buli omoi akwata omubishawe omutwe ashuba amuchumisa embanda omu rubaju. Kityo bombili bagwa hamoi ahansi. Nikwo omwanya ogwo kugweta Halikatihazurimu, guli Gibeoni.

¹⁷ Kir'ekyo endashana ekura muno. Abuneri n'Abaisiraeli baterwa abashaija ba Daudi.

¹⁸ Batabani ba Zeruya bonshatu, Yoabu, Abishai na Asaheli bakaba baliho. Asaheli hakaba ali mwangu omu maguru nk'engabi.

¹⁹ Abinga Abuneri obutahindukira bulyo anga bumosho, amubinga obutamutaishukaho.

²⁰ Abuneri kayahindukire enyuma abaza ati, “Asaheli niwe?” Asaheli ati, “N'inye.”

²¹ Abuneri amugambira ati, “Olekere kumbinga. Ihaho omwisherukare omoi obe niwe obinga okamwaka ebikwatobye.” Kyonkai Asaheli tiyamurugireho.

²² Abuneri ashuba amugambira ati, “Oshubeyo otampondera, kanakukutera okagwa ahansi, oziraki? Nakuboneka ntai omu maisho ga murumuna wawe Yoabu?”

²³ Asaheli ayanga kugaruka. Nikwo Abuneri kumuchumisa omuhunda gw'eichumulye omw'ibunda, gumuturukira omu mugongo, ayetura ahansi aferaho. Kaishe muntu ayagobaga aho ayemelera.

²⁴ Yoabu na Abishai babinga Abuneri. Eizoba kalyabaire nilitobera bagoba aha kabanga ka Amma omu maisho ga Gia aha muhanda gw'Eibanga lya Gibeoni.

²⁵ Ababenjamini bahikana bagya rubaju orwa Abuneri, baba nteko emoi, bemelera aha kabanga eiguru.

²⁶ Aho Abuneri ayeta Yoabu agamba ati, “Twikare turwaine? Tolikumanya okwo hararugwamu enaku zibi? Tolikutaisa bantu bawe kubinga barumuna babo?”

²⁷ Yoabu agamba ati, “Obuso bwa Ruhanga, kawakuba otagamba mazima abantu bawe bakubingire barumuna babo obwire bukya.”

²⁸ Aho Yoabu atera enzamba abantu bona bemelera; bakaba batakibinga Baisiraeli rundi anga kushuba kurwana.

²⁹ Abuneri n'abashaijabe bagenda omu kiro ekyo kyona, baraba Araba, bashabuka Yorudani, baraba Bitironi bagoba Mahanaimu.

³⁰ Yoabu aruga kubinga Abuneri; kayabaire yahikanisize abantu bona, haburaho abairu ba Daudi ikumi na mwenda, otatairemu Asaheli.

³¹ Abairu ba Daudi bakaita Ababenjamini bikumi bishatu mwo nkaga, nibo babaire bali ba Abuneri.

³² Batwara Asaheli bamuziika Betelehemu omu nziiko ya ishe. Yoabu n'abashaijabe batambuka ekiro kyona, bubakeraho omuli Heburoni.