2 Samweli 19 - Ebibulia 2001

Yoabu nakabukira Daudi

¹ Bagambira Yoabu bati, “Leba Omukama nalira, nachulira Abusalomu.”

² Aho abantu bachura, ebyera by'okusinga endashana bilekera, okuba bakahulira okwo Omukama Daudi okufa kw'omutabani kwamujunaize.

³ Kir'ekyo abantu bakagaruka omu kigo nibashooba nk'abagaruka bajunaire aha rw'okusingwa endashana.

⁴ Omukama ayebunda aha maisho atongya n'eiraka lihango ati, “Yo, mwana wange Abusalomu, yo Abusalomu mwana wange, mwana wange!”

⁵ Yoabu ataha omu nju, agoba Omukama amugambira ati, “Kir'eki washonaza abairu bawe bona abakurokora kir'eki batakwita, bakarokora na bakazi bawe, abana bawe n'ensholeke zawe; manya nabo bakubaisire.

⁶ Wagonza abakunoba, wanoba abakugonza. Wayolekera kimoi okwo abakuru b'eihe n'abaramata bawe batalikukugasha kantu. Nanye kir'eki namanya okwo ka Abusalomu yakuhungiire, kandi ichwe chwena tukafa, iwe wakushemeleirwe.

⁷ Mbwenu aha oshohore, ofumore n'abairu bawe obaihyemu entima mbi. Obuso bw'Omukama k'otashohoire kir'eki tolikusigara na muntu, kandi ekyo kirakurugiramu akabi kushaga buli kabi akarakugwireho kwema buto kugoba mbwenu.”

⁸ Omukama Daudi nikwo kwimuka akabandaara omu kihigi. Bagambira abantu bona okwo Omukama abandaire omu kihigi. Bona baija omu mabonage. Abaisiraeli bona bakaba bairukire, buli muntu agarukire omwe.

Okutekateka kw'okugaruka kwa Daudi

⁹ Enganda zona omuli Isiraeli bikaba bibashobeize, bati, “Omukama akatuhungya omu mikono y'ababisha baitu, Abafilisiti, mbwenu wenene airukire Abusalomu yaruga aha ngoma.

¹⁰ Kandi Abusalomu owo twakozire amajuta k'atutwara agwire omu ndashana. Mbwenu kubaki inywe mutalikugamba kantu aha kugarura Omukama?”

¹¹ Omukama Daudi atuma ahali Zadoki na Abiatari abakuhani ati, “Mubaze abagurusi ba Yuda muti, ‘Omukama yamanyire okwo Abaisiraeli bona bagambire kumugarura omwe, mbwenu inywe n'inywe mwaija kuba b'enzindo?

¹² Inywe muli barumuna bange, muli bwamba bwange, mubili gwange; kiki inywe kuba b'enzindo kungarura?’

¹³ Mumbalize Amasa muti, ‘Iwe toli bwamba bwange, mubili gwange? Ruhanga n'akanyite kantakuhindwire mukuru w'eihe lyange aha mwanya gwa Yoabu.’ ”

¹⁴ Agweleza atyo abantu bona ba Yuda bagamba eiraka limoi, bamutumaho bati, “Ogaruke n'abaramata bawe bona.”

¹⁵ Omukama agaruka, agoba Yorudani. Aba Yuda baija Giligali kumuchwekera n'okumushabura Yorudani.

Shimei nayetonganira

¹⁶ Shimei eya Gera, Omubenjamini wa Bahurimu, ayanguha asongoka n'abashaija ba Yuda kuchwekera Omukama Daudi.

¹⁷ Akagenda n'abashaija 1,000 ab'oruganda rwa Benjamini. Ziba omusigire w'omwa Shauli, nawe agenda n'abatabani 15 n'abairube 20, basongoka Yorudani bebembeire Omukama.

¹⁸ Bashabuka ekyambu kushabura eka y'Omukama, n'okumukolera eby'alikwenda. Orw'Omukama yabaire yaija kushabuka Yorudani, Shimei amugwa omu maisho,

¹⁹ amugambira ati, “Mukama wange, singa otankwata ntambara, otaijuka na kyo nakukozire, nkakushenga kiro ekyo waruga Yerusalemu; oyebwe, osingire.

²⁰ Nomanya okwo nafakaire, kyonkai olebe okwo omu ruganda rwona rwa Yozefu n'inye naija ndi wa mbere kukuchwekera!”

²¹ Kyonkai Abishai eya Zeruya ahorora ati, “Shimei bamwite azire ekyo yakozire, kuba akakeena enkorwa majuta y'Omukama.”

²² Nawe Daudi agamba ati, “Mbagiire ntai inywe batabani ba Seruya, nka mwambera Sitani? Mbwenu aha Omukama wa Isiraeli n'inye; kir'eki taliho Mwisiraeli alikwija kwitwa.”

²³ Aho arahilira Shimei ati, “Tofe.”

Mefibosheti nayetongorora

²⁴ Mefibosheti eya Shauli nawe asongoka kuchwekera Omukama. Kwema orwo Omukama yarugire Yerusalemu kulemwa kugaruka eli milembe, Mefibosheti hakaba atakanabaga maguru, atakasharaga bileju anga kufura myendoye.

²⁵ Orwo yarugire Yerusalemu kuchwekera Omukama, Omukama amugambira ati, “Mefibosheti, kubaki otagenzire nanye?”

²⁶ Amuhorora ati, “Rugaba Mukama wange, omwiru wange akambeiya. Nkamugambira nti, ‘Nyalira endogobe ngikuube ngende n'Omukama,’ kuba mba mulema.

²⁷ Wenene ogwo akampangilira ahali iwe, kyonkai kandi Rugaba Mukama wange oshusha omumalaika wa Ruhanga; aha rw'ekyo singa okore okw'orayenda.

²⁸ Ab'omwaitu wakubaisire bona, kyonkai okandonkamu kuta nindya aha kiihuro kyawe. Mbwenu nkutongeki ekishagireho?”

²⁹ Omukama amugambira ati, “N'orwo wakuba otagambire bindi; naramwire. Iwe na Ziba murabegana ensi ya Shauli.”

³⁰ Mefibosheti agambira Omukama ati, “Ziba agitware yona, orwo wagaruka omwawe n'emilembe, Rugaba Mukama wange.”

Daudi nasiima Barizilai

³¹ Na Barizilai Omugileadi hakaba arugire Rogelimu yashendekeleza Omukama yamugobya Yorudani, yasiga yashabuka.

³² Akaba ali mugurusi muno ow'emyaka 80. Yahaga Omukama Daudi ekyakulya orwo yaikaraga Mahanaimu, okuba hakaba ali mushaija mushongore muno.

³³ Omukama amugambira ati, “Tushabuke hamoi tugye Yerusalemu, ndakugabira, nkumanye.”

³⁴ Kyonkai Barizilai amuhorora ati, “Nkyaina emyaka engahai y'okurora, inye kugenda naiwe Yerusalemu?

³⁵ Inye aha nyina emyaka 80, tinkiina kya kunshemelera. Na kulya na kunywa tinkishemelerwa kantu. Na bashaija na bakazi tibakizina bikantaha. Mbwenu aho Rugaba Mukama wange, nakushasizaki?

³⁶ Yorudani turagishabuka hamoi; kyonkai kubaki ondongore erongoro etyo?

³⁷ Ninkushaba onjubure ngaruke, nfere omu kigo kyange, banziike omu nziiko ya tata na mawe. Omwiru wawe Kimuhamu murashabuka hamoi, okw'orayenda obe nikwo omukora.”

³⁸ Omukama agamba ati, “Kimuhamu turashabuka hamoi, ekiranshemelera kyona kyona ndakimukolera; kandi naiwe eky'orayenda ndakikukolera.”

³⁹ Aho abantu bona bashabuka Yorudani, n'Omukama ashabuka; anywegera Barizilai, mara amuha omugisha, Barizilai agaruka omuka.

⁴⁰ Omukama ashabuka na Kimuhamu, bagya Giligali, aba Yuda bona enusu y'abantu ba Isiraeli bamushendekeleza.

Yuda na Isiraeli nibahakanira Omukama

⁴¹ Ahanyuma Abaisiraeli bona baija aha Mukama, bamubaza bati, “Kubaki barumuna baitu aba Yuda bakwibire, bakakushabura Yorudani n'eka yawe n'abashaija bawe?”

⁴² Aba Yuda bahorora aba Isiraeli bati, “Okuba Omukama w'oruganda rwaitu. Aho kubaki ekyo nikibanigaza? Haliho eky'Omukama kyona kyona ekyo tuliire, anga aina eky'atuhaire?”

⁴³ Abaisiraeli bahorora aba Yuda bati, “Omukama Daudi waitu emirundi ikumi nangu n'okushaga. Aho kubaki mutugahire? T'ichwe tutabaire tuli ba mbere kugamba kugarura Omukama waitu?” Kyonkai aba Yuda bakakiza Abaisiraeli amani aha rulimi.