2 Samweli 17 - Ebibulia 2001

Hushai nahabisa Ahitofeli

¹ Ahitofeli agambira Abusalomu ati, “Kandonde abaisherukare 12,000 ngye mbinge Daudi omu kiro omu.

² Mubunde akyalemirwe akyasharaire n'emikono, muhukure, n'ab'ainabo bona bairuke. Ndaita Omukama wenkai,

³ abantube mbakugarulire bona nk'okw'omukazi agaruka omwa iba. Iwe nohiga kwita omuntu omoi kyonkai abantu bona bakagira emilembe.”

⁴ Abusalomu n'abagurusi bona ba Isiraeli bashemelerwa entegeka egyo.

⁵ Aho Abusalomu agamba ati, “Mwete na Hushai Omwariki, tuhulire nawe eky'aragamba.”

⁶ Orwo Hushai yamugobire, amubaza ati, “Leba okwo Ahitofeli yatuhanulira; tube nikwo tukora? Kakitali kityo iwe gamba.”

⁷ Aho Hushai agambira Abusalomu ati, “Lero mbwenu entegeka eyo Ahitofeli yategeka ti nungi.”

⁸ Ashuba ati, “Iwe nomanya okwo sho n'abashaijabe bali baisherukare emanzi, n'okwo balikushanshamuka nk'edubu enyagirwe ebyana byayo omw'ishwa? Kandi sho muntu w'endashana, tarara na bantu.

⁹ Mbwenu aha aliho orwo wakushanga ayeshelekire omu kina anga ahandi. Orwo Daudi aramara kutahamu ati abashaija bawe, omuntu arakihulira aragamba ati, ‘Aba Abusalomu baitwa bangi.’

¹⁰ Aho n'omushaija emanzi ow'omutima nk'ogw'entare, aratina muno kuba Isiraeli yona nemanya okwo sho aba manzi, n'abantu ab'ainabo manzi.

¹¹ Inye entegeka yange eli eti: Isiraeli yona kwema Dani kugoba Beerisheba, ehurulire ahali iwe, obungi baigane omushenye gw'omwaro gw'enyanja mara naiwe otabare nabo.

¹² Aho turamubundira omu mwanya gumoi ogwo turamushangamu, tumutonyere nk'orume nirutonya aha itaka; wenene n'abashaija bona ab'ainabo taliho arasigaraho.

¹³ K'arahungira omu kigo, Abaisiraeli balete emiguha tusike ekigo tukinage omu ruhanga kugoba aha kutashangaho kabare.”

¹⁴ Abusalomu n'Abaisiraeli bona bagamba bati, “Entegeka ya Hushai Omwariki nungi kushaga eya Ahitofeli.” Omukama Ruhanga akalibisa entegeka nungi ya Ahitofeli kunaga Abusalomu omu kabi.

Nibatatira Daudi nairuka

¹⁵ Aho Hushai agambira Zadoki na Abiatari abakuhani okwo Ahitofeli ategekeire Abusalomu n'abagurusi ba Isiraeli n'okwo na wenene abategekeire.

¹⁶ Ashuba ati, “Mutume bwangu ahali Daudi muti, ‘Omu kiro omu otarara aha bushabukiro bwa kugya mw'irungu. Oshabuke n'abantu bona ab'oinabo bataija bakabakwata bakabaita.’ ”

¹⁷ Yonatani na Ahimaazi baikaraga Enirogeli balindiliire. Omuzana niwe yagendaga nabaha amakuru, nabo nibagenda nibagagambira Omukama Daudi; okuba tibakushoboire kuboneka nibataha mu kigo.

¹⁸ Kyonkai omusigazi omoi ababona, agambira Abusalomu. Aho bombili banguha bagya Bahurimu omw'omushaija omoi ayabaire aina eiziba omu kibugakye, balitaahamu.

¹⁹ Muk'omushaija ogwo ashweka omunwa gw'eiziba ayanjaraho engano, mara taliho kintu kyamanyikire.

²⁰ Abairu ba Abusalomu bagobamu, babaza omukazi bati, “Ahimaazi na Yonatani bali nkahai?” Omukazi abahorora ati, “Bashabuka obwiga bw'amaizi.” Kababahigire bakabura, bagaruka Yerusalemu.

²¹ Kababaire bagenzire, Ahimaazi na Yonatani baruga omw'iziba, bagenda babarulira Omukama Daudi amakuru ago. Bamugambira bati, “Mwimuke mushabuke bwangu omwiga.” Bamugambira n'ebyo Ahitofeli ategekireho.

²² Aho Daudi n'abo yabaire ainabo bona baimukya bashabuka Yorudani. Obwire kukya buli omoi hakaba yashabukire.

Ahitofeli nayeita

²³ Orwo Ahitofeli yaboine okwo entegekaye etahonderwa, ayara endogobeye, aimukya ashuba omwe omu kigo ky'owabo. Kayamazire kutebekanisa eby'ekaye, ayehanika ayeita. Bakamuziika omu nziiko ya ishe.

Daudi omuli Mahanaimu

²⁴ Daudi agoba Mahanaimu, Abusalomu ashabuka Yorudani n'Abaisiraeli bona.

²⁵ Abusalomu hakaba yataireho Amasa kutwara eihe aha mwanya gwa Yoabu. Amasa hakaba ali mutabani wa Itira, Omwishimaeli, nyina hakaba ali Abigaili, muhara wa Nahashi kandi murumuna Zeruya nyina Yoabu.

²⁶ Abaisiraeli na Abusalomu basisira Gileadi.

²⁷ Orwo Daudi yagobire Mahanaimu, Shobi eya Nahashi owa Raba ey'Abaamoni, na Makiri eya Amieli owa Lodebari, na Barizilai Omugileadi wa Rogelimu,

²⁸ baleta ebitanda, ebeseni, ebikwato ebibumbano, engano, eshayiri, ensano, engano ekarangire, empelege, enkore,

²⁹ obwoki, amajuta, entaama n'esamuli y'ente, babiletera Daudi n'abantu abo yabaire ainabo. Bakamanya okwo babaire balemeirwe omw'irungu, baina enjara n'eiliho.