2 Samweli 16 - Ebibulia 2001

Daudi na Ziba

¹ Orwo Daudi yabaire yagendaho kake aha ibanga eiguru, Ziba omwiru wa Mefibosheti amutanganwa, aina endogobe ibili eziliho amatandiko, zitwete emikate 200, engoobe 100 z'ezahabu zomire, engoobe 100 z'ebiraba by'ekyanda, n'enshaho y'oruhu y'edivai.

² Omukama amubaza ati, “Ebi waleta byaki?” Ziba ahorora ati, “Endogobe z'eka yawe z'okukuuba, emikate n'ebiraba by'ekyanda by'abasigazi bawe by'okulya, n'edivai yabo y'okunywa orwo baraba balemirwe omw'irungu.”

³ Omukama amubaza ati, “Mutabani wa Mukama wawe alihai?” Ziba amuhorora ati, “Yasigara Yerusalemu, okuba nagamba ati, ‘Kir'eki Abaisiraeli nibangarura aha ngoma ya tata.’ ”

⁴ Omukama Daudi agambira Ziba ati, “Byona ebibaire bili bya Mefibosheti mbwenu byawe.” Ziba amushubamu ati, “Rugaba, inye ndi mwiru wawe, nsingira Mukama wange.”

Shimei nakeena Daudi

⁵ Orwo Omukama Daudi yagobire Bahurimu, harugwamu omushaija eibaralye Shimei mutabani wa Gera, omunyaruganda wa Shauli, aija amutahiremu namukeena.

⁶ Ateza Daudi n'abaramatabe amabare, n'orwo Daudi yabaire ali omugati y'abalinzibe.

⁷ Shimei akeena Daudi ati, “Chwekaho, chwekaho, iwe omwisi, iwe muntu mubi!

⁸ Omukama Ruhanga yayeholera ab'eka ya Shauli abo waisire, kandi wenene okamwihya aha ngoma. Mbwenu engoma egyo yagikwasa Abusalomu mutabani wawe. Akashengo kakugwera iwe omwisi.”

⁹ Aho Abishai eya Seruya abaza Omukama ati, “Kubaki embwa egi efire nekeena Rugaba Omukama wange? Onjubure nshabuke mwihyeho omutwe!”

¹⁰ Kyonkai Omukama amugarukamu ati, “Mumbeleireki inywe batabani ba Zeruya? K'araba nankeena okuba Omukama yamugambira ati, ‘Keena Daudi,’ aho n'ohai ayakugamba ati, ‘Kubaki wakora otyo?’ ”

¹¹ Daudi agambira Abishai n'abaramatabe bona ati, “Leba omwana owo nyezaliire nahiga kunyita, isi Omubenjamini! Mumuleke ankeene; okuba Omukama amugambiire atyo.

¹² Shana Omukama arabona obushasi bwange andongore ebirungi orw'ogu yankeena.”

¹³ Kityo Daudi n'abashaijabe baguma bagenzire, kandi Shimei araba aha kakunakune k'eibanga buseli namukeena namuteza amabare, natuntumura n'echuchu.

¹⁴ Ahanyuma Omukama Daudi n'abantu bona abo yabaire ainabo, bagoba Yorudani balemirwe; baba niho bahumulira.

Abusalomu nataha Yerusalemu

¹⁵ Abusalomu n'Abaisiraelibe bona bagoba Yerusalemu, Ahitofeli nawe abulimu.

¹⁶ Orwo Hushai Omwariki munywanyi wa Daudi yagobire Abusalomu, amuramya ati, “Kamelere Mukama! Kamelere Mukama!”

¹⁷ Abusalomu amushubamu ati, “Munywanyi wawe ezi nizo ngonzi zowamugonza? Kubaki otagenzire nawe?”

¹⁸ Hushai amuhorora ati, “Chei, inye ndaba rubaju rw'ow'Omukama aronzire, akarondwa n'abantu aba n'Abaisiraeli bona, mara niwe ndaikara nawe.

¹⁹ Kandi nkolere ohai kantakoleire mutabani? Okwo nakoleire sho nikwo ndakolera na iwe.”

²⁰ Ahanyuma Abusalomu agambira Ahitofeli ati, “Mututegekere tukoreki?”

²¹ Ahitofeli amugambira ati, “Ogende obyame n'ensholeke za sho, ez'asigire kulinda enju. Aho Abaisiraeli bona baramanyir'aho okw'onobire sho, n'ab'oinabo bona baragira amani.”

²² Aho batelera Abusalomu eihema aha rushwi rw'ekikaare; abyama n'ensholeke za ishe omu maisho ga Isiraeli yona.

²³ Omu bir'ebyo ekyo Ahitofeli y'ahanuraga kyashushaga eky'omuntu agambiirwe Ruhanga wenene. Nikwo empanuraye yasiimwaga Daudi, kandi na Abusalomu.