2 Samweli 15 - Ebibulia 2001

Abusalomu nashenga Daudi

¹ Ahanyuma Abusalomu ataho egali n'efarasi n'abashaija 50 kugenda bamwebembeire.

² Kandi yaimukaga karai ayemelera aha rubaju rw'ekihigi. K'omuntu yakubaire aina omushango nagya ow'Omukama kuramurwa, Abusalomu amweta amubaza ati, “Iwe noruga kigoki?” Ogu amuhorora ati, “Ndi w'oruganda nanka omuli Isiraeli.”

³ Aho Abusalomu amugambira ati, “Omushango gwawe gurungi mara guli aha mazima; kyonkai Omukama taliho w'agusigire kuguhuliliza.”

⁴ Ashuba ayeyongera kugamba ati, “Kubasi ndi muramuzi omu nsi egi! Aho buli muntu aina omushango anga ekigambo yakwizire ahali inye, omushangogwe nguramurage.”

⁵ Buli muntu ayamugobaga kumuramya, Abusalomu aimukya omukono amukwata, amunywegera.

⁶ Nikwo yagiraga Abaisiraeli bona ababaga nibagya ow'Omukama kuramurwa; nikwo yanyurwire atyo Abaisiraeli rubaju orwe.

⁷ K'emyaka yabaire yakya enai, Abusalomu agambira Omukama Daudi ati, “Ninshaba ngende Heburoni ngobesheleze ekiragano kyange ekyo naraganisize Omukama.

⁸ Orwo nabaire nintura Geshuri omuli Aramu nkaragana nti, ‘K'Omukama alingarurakwo Yerusalemu, ndimufukamira.’ ”

⁹ Omukama Daudi amugambira ati, “Genda n'emilembe.” Aho aimukya agenda Heburoni.

¹⁰ Kyonkai atuma abanyomozi omu nganda zona za Isiraeli ati, “Orwo murahulira muti enzamba, mugambe muti, ‘Abusalomu yaba Mukama omuli Heburoni!’ ”

¹¹ Ashuba wenene aruga Yerusalemu n'abashaija 200 abo yayesire, kyonkai bafa gagenda, batainayo kyo balikumanya.

¹² Ahanyuma Abusalomu kayabaire akyatamba ekitambo, atuma kweta Ahitofeli, Omugiloni, omuhanuzi wa Daudi omu kigo ky'owabo Gilo. Aho obushengi bugira amani, n'abantu beyongera kukanya orubaju rwa Abusalomu.

Daudi nairuka Abusalomu

¹³ Entumwa egoba Daudi emugambira eti, “Abaisiraeli bagweleire rubaju orwa Abusalomu.”

¹⁴ Nikwo Daudi kugambira abaramatabe abo yabaire ainabo Yerusalemu ati, “Imuka twiruke, kuba titukire ahali Abusalomu. Mwanguhe tugende atakwija akatubunda tutetegeire, akatuteza enaku n'abantu omu kigo hakabaisa embanda.”

¹⁵ Abaramatabe bamugambira bati, “Ichwe twayetekatekire kukora kyona kyona eky'oraramura.”

¹⁶ Aho Omukama ashohora n'ekaye yona emuhondeire, shana akasigamu ensholeke 10 kumulindira enju.

¹⁷ N'abantube bamuhondera bona, bagya bemelera aha nju y'enzindo.

¹⁸ Abaramatabe bamuhinguraho Abakereti bona, Abapeleti bona n'Abagiti bona; bona hamoi bantu 600 abarugire Gati bamuhondeire, nabo bamuraba omu maisho.

¹⁹ Aho Omukama abaza Itai Omugiti ati, “Kubaki naiwe nogenda naichwe? Shubayo oikare n'Omukama muhya, kuba oli munyamahanga mara bakakubinga owanyu.

²⁰ Oizire juba, nshube nkujenjeze ntalikumanya na mbali ndikugya? Oshubeyo, n'abawe oshubeyo nabo; Omukama akugilire obuganyizi n'obwesigwa.”

²¹ Kyonkai Itai amuhorora ati, “Mwoyo gwawe, Rugaba Mukama wange, hona hona mbali oragya niyo ndagya, kandaba ninfa nfe.”

²² Daudi amugambira ati, “Aho iroko hingura.” Itai ahingura hamoi n'abashaijabe bona n'abana bona abo yabaire ainabo.

²³ Abantu bakalira muno kubona Daudi n'abamuhondeire nibasingwa. Omukama ashabuka Akaiga ka Kidironi, n'abantu bona bashabuka bakwete muhanda ogw'eirungu.

²⁴ Abiatari aija, Zadoki nawe aija n'Abalevita bona bashutwire Esanduku y'Endagano ya Ruhanga. Esanduku bagihumuza ahansi, kuhika abantu bona orwo barugire omu kigo.

²⁵ Aho Omukama Daudi agambira Zadoki ati, “Esanduku ya Ruhanga ogigarure omu kigo. K'Omukama Ruhanga alinsingira alingarura ngibone, mbone na mbali eliba etwire.

²⁶ Kyonkai k'araba atansingiire, ninyikiliza ankore nk'okwo alikwenda.”

²⁷ Ashuba agambira Zadoki omukuhani ati, “Leba iwe na Abiatari mugaruke omu kigo n'emilembe hamoi na batabani banyu bombili, Ahimaazi mutabani wawe na Yonatani mutabani wa Abiatari.

²⁸ Inye ndalindira aha bushabukiro bw'okugya omw'irungu kuhika orwo murantumaho kummanyisa.”

²⁹ Aho Zadoki na Abiatari bagarura Esanduku y'Endagano Yerusalemu; mara baikarayo.

³⁰ Daudi atemba eibanga ly'emizeituni amaguru gali bushai, ayebunzire omutwe nalira. Abo yabaire ainabo bona bayebunda emitwe batemba eibanga nibalira.

³¹ Bamugambira bati, “Ahitofeli nawe ashengire na Abusalomu.” Daudi agamba ati, “Waitu Mukama, ninkushaba ebyo Ahitofeli arahanuura bitagasha kantu.”

³² Orwo Daudi yagobire aha ibanga eiguru mbali bafukamira Ruhanga, Hushai Omwariki aija kumutanganwa, ekijwarokye kitemwirwe n'eitaka limuli omu mutwe.

³³ Daudi amugambira ati, “Katuragenda hamoi noija kundema iwe.

³⁴ Kandi k'oragaruka omu kigo okagambira Abusalomu oti, ‘Waitu Mukama, ndaba mwiru wawe nk'okwo mbaire ndi mwiru wa sho kwema karai,’ aho oranyitira enama za Ahitofeli.

³⁵ Leba oinayo Zadoki na Abiatari abakuhani. Aho kyona kyona eky'orahulira omu kikaare ky'Omukama, okigambire bonene abakuhani.

³⁶ Baina batabani babo bombili: Ahimaazi eya Zadoki na Yonatani eya Abiatari; abo nibo murantumaho kungambira ebyo muraba muhuliire byona.”

³⁷ Hushai munywanyi wa Daudi agya atyo omu kigo, ashanga Abusalomu nataha Yerusalemu.