2 Samweli 14 - Ebibulia 2001

Yoabu nanama kugarura Abusalomu

¹ Yoabu eya Seruya amanya okwo Omukama aina orushusho rwa Abusalomu.

² Atuma Tekoa aihyayo omukazi omugezi, amugambira ati, “Ninshaba oyehindure ntumbwakazi, ojware emyendo y'obuferwa. Otesiiga majuta, obe nk'omukazi ayatekire ekibi ebiro bingi.

³ Otahe omw'Omukama omugambire ekigambo eki.” Aho amuragira eby'aragamba.

⁴ Orwo omukazi ogwo wa Tekoa yagobire aha Mukama, ajumara ahansi amushura, ashuba ati, “Waitu Mukama juna!”

⁵ Omukama amubaza ati, “Wabaki?” Omukazi ati, “Waitu inye ndi ntumbwakazi, ibanye akafa.

⁶ Mbaire nyina batabani bange babili, bombili baija bakunganira omw'ishwa. Habaire hataliho n'omoi wa kubaramura, nikwo omoi kutera ondijo akamwita.

⁷ Mbwenu oruganda rwona rwangeleka nibagamba bati, ‘Otaishure aisire omurumuna tumwite, tumuture ow'aisire.’ Mbwenu nibenda kwita n'omusika. Nikwo baraba banchweleire kimoi, kuba ibanye araba ataina wa kumusikira.”

⁸ Omukama amuhorora ati, “Ogaruke owawe, ebigambo byawe ndabimara.”

⁹ Omukazi amugambira ati, “Rugaba eky'orakora, abange nanye n'ichwe turakwatwa omushango, iwe n'eka yawe muraba mutaina ntambara.”

¹⁰ Omukama agambira omukazi ogwo ati, “K'omuntu arakugambaho omundetere, araba atakikukoraho rundi.”

¹¹ Omukazi amugarukamu ati, “Mbwenu Rugaba Omukama, ninkushaba orahire obuso bw'Omukama Ruhanga wawe okwo hatakwija muntu ondijo ow'okushuba akehora enzigu, akaita omwana wange.” Omukama ati, “Obuso bw'Omukama, taliho kashoke na kamoi aka mutabani wawe akararagara aha itaka.”

¹² Aho omukazi agamba ati, “Rugaba Mukama wange, ninshaba nkubazeho akagambo.” Omukama agamba ati, “Mbaza.”

¹³ Omukazi abaza ati, “Kubaki okozire kubi oti abantu ba Ruhanga? Orwo otalikujubura mwana wawe kuruga mu buzahe, nikwo kugir'oti omu by'olikugamba naiwe noyeramura.

¹⁴ Abantu ichwena tuba b'okufa, tuli nk'amaizi agasheshekire ahansi, agatakuyorwa rundi; kyonkai Ruhanga talikwija kukwita ngu orwo waguma oyenzire kwikara oshenzire omwana wawe.

¹⁵ Rugaba Mukama wange, naija kukugambira, okuba abantu bantinisize. Aho nabona nkugambire, ninshubira ekyo ndakugambira okwo orakikora.

¹⁶ Singa okihulire, onkize n'omwana wange omu mikono y'omuntu alikwenda kutwita kutuchwa omu bantu ba Ruhanga abo yayeronkeire.

¹⁷ Ntekeleize nti eky'Omukama Rugaba wange aragamba kirantebekanisa, kuba nomanya ebirungi n'ebibi nk'omumalaika wa Ruhanga. Omukama Ruhanga wawe abe naiwe.”

¹⁸ Nikwo Omukama Daudi kugira omukazi ogwo ati, “Otansheleka kantu kona kona ako ndakubaza.” Omukazi agamba ati, “Bagambe Mukama wange.”

¹⁹ Omukama agamba ati, “Ebyo wagamba byona ebi Yoabu tabyemiremu?” Omukazi amuhorora ati, “Rugaba Mukama wange, mwoyo gwawe! Okwo wagamba nikwo kwonene, taliho muntu yakukihindura kundi. Ebigambo ebi byona omwiru wawe Yoabu niwe abindagiire.

²⁰ Akozire atyo aha rw'okwenda kwiza ekyemba eki. Kyonkai kandi naiwe, Rugaba oina obumanyi obw'omumalaika wa Ruhanga, nomanya ebili omu nsi byona.”

²¹ Ahanyuma Omukama Daudi agambira Yoabu ati, “Mbwenu leba naikiliza ekigambo eki; iroko ogarure omusigazi ogwo Abusalomu.”

²² Yoabu ajumara ahansi, ahabukya, asiima Omukama ati, “Kir'eki Rugaba Mukama wange, namanya okwo wansingira, orwo wantunga ekyo nataka.”

²³ Yoabu aimukya agenda Geshuri agarura Abusalomu Yerusalemu.

²⁴ Omukama Daudi agamba ati, “Agaruke omwe; kyonkai atalimbona buso.” Kityo Abusalomu agya omwe; nikwo ataboine Mukama buso.

Daudi nagarulira Abusalomu

²⁵ Omuli Isiraeli yona hakaba hatalimu muntu wa kuhaisilizibwa muno aha rw'oburungibwe nka Abusalomu. Kumwema aha mutwe kumuturuka aha kalenge hakaba ataina kamogo.

²⁶ Kayamoisaga eishoke (kuba limazire omwaka gumoi lyamusikiliraga) yalipimaga obusikizi; likaba lishagamu ekilo ibili aha munzani gw'Omukama.

²⁷ Abusalomu akazara abana b'abojo bashatu n'omwisiki omoi, eibaralye Tamari; hakaba ali mukazi murungi.

²⁸ Aho Abusalomu atura Yerusalemu emyaka ebili eijwire atabonekire mu maisho ga Mukama.

²⁹ Aho atumaho Yoabu kumutuma aha Mukama, kyonkai Yoabu tiyakunzire kwija owe. Amutuma omurundi gwa kabili kyonkai tiyakunzire kwija.

³⁰ Aho agambira abairube ati, “Leba omusiri gwa Yoabu gw'eshayiri gwataine ogwange, mugende muguteho omuliro.” Abairube endimiro bagitaho omuliro.

³¹ Yoabu aimukya agenda omwa Abusalomu amubaza ati, “Kubaki abairu bawe bayokya omusiri gwange?”

³² Abusalomu amuhorora ati, “Nkutumireho nti, ‘Ogobe kunu nkutume aha Mukama kumumbaliza ekyanyihire Geshuri. Hakili kanakwikaireyo. Ningonza kugoba omu mabonage, kandaba nyina entambara anyite.’ ”

³³ Aho Yoabu agenda aha Mukama amugambira; Omukama ayeta Abusalomu aija amugoba, amubandama omu maisho obuso bukanga aha itaka. Omukama amunywegera.