2 Samweli 12 - Ebibulia 2001

Natani namanyisa Daudi obufubwe na Daudi nayechuza

¹ Omukama atuma Natani ahali Daudi. Amugoba amugambira ati, “Omu kigo kimoi habaire halimu abantu babili, omoi mutungi ondijo mworo.

² Omutungi abaire aina amahyo g'entaama n'embuzi n'ente zingi muno.

³ Nawe omworo abaire ataina kantu shana akahagazi k'entama kamoi konkai akabaire aguzire. Abaire akagabire kakulira omwe nk'abaanabe, kabaire kalya obukunkumukwabwe, kanywa aha kikompekye, kamurara omu kifuba. Kabaire nikamushusira omwana muhara.

⁴ Ekiro kimoi omutungi ogwo aizire yaralilirwa omugenyi, kyonkai tiyagonza kumubagira ntama anga mbuzi omu mahyoge. Akwete akataama k'omworo yaba niko amwitira.”

⁵ Aho Daudi agilira omushaija ogwo ekiniga kingi muno. Agambira Natani ati, “Ninahira obuso bw'Omukama, omushaija akozire eki mazima afe.

⁶ Mara akataama abanze akalihe emirundi enai aha rw'okuba tagizire buganyizi, akozire kubi.”

⁷ Natani agambira Daudi ati, “Omushaija ogwo niwe. Omukama Ruhanga wa Isiraeli nagamba ati, ‘Nkakukora amajuta kuba Mukama wa Isiraeli, mara nakuhungya omu mikono ya Shauli.

⁸ Nkakuha enju ya Mukama wawe n'abakazibe kukutagasa. Nakuha engoma ya Isiraeli n'eya Yuda. Ebi kabyakubaire bili bike nakukwongeireho ebindi nk'ebi n'okushagaho.

⁹ Kubaki ogahire emihango yange okanfakalira? Uria Omuhiti omwitire omu ndashana washuba washwera mukaziwe. Omwisize Abaamoni omu ndashana.

¹⁰ Mbwenu orwo ongahire, okashwera na muka Uria, baijukuru bawe balita kugwa omu ndashana.’

¹¹ Kandi Omukama nashuba nagamba ati, ‘Ndarahura omuntu omu ka yawe akutabangure. Ekyo orakimanya orwo ndakwaka abakazi bawe nkabaha mutahi wawe, abyame nabo omushana gujwire.

¹² Iwe okikozire bwesheleke, kyonkai inye ndakikora omushana gujwire omu maisho ga Isiraeli yona.’ ”

¹³ Daudi agambira Natani ati “Nfakaliire Omukama.” Natani amugambira ati, “Omukama nawe yakugarulira obufu bwawe, tofe.

¹⁴ Kyonkai orwo ofakaire otyo okamunigaza, omwana ow'omukazi azaire arafa.”

¹⁵ Ahanyuma Natani ashuba owe. Omwana owo muka Uria yazaliire Daudi, Omukama akamuteza endwara yaba kubi.

Okufa kw'omwana wa Daudi

¹⁶ Orw'ekyo Daudi atagiliza Ruhanga kumukiliza omwanawe. Abyama ahansi n'okulya ayanga.

¹⁷ Abaramatabe bamwemelera aha rubaju kumwimukya ahansi, kyonkai tiyakunzire, mara tiyaliire nabo kyakulya.

¹⁸ Aha kiro kya mushanju omwana afa. Abaramatabe batina kukimugambira, bati, “Leba orwo omwana abaire akyarora tumugambiire tiyatuhorora, aho twakumugambira tutai okw'omwana yafa? Yakwekora kubi.”

¹⁹ Kyonkai orwo Daudi yaboine nibafumora omu kahwe, ashobokerwa okw'omwana yafire. Ababaza ati, “Isi omwana yafa?” Bamuhorora bati, “Yafa.”

²⁰ Aho aruga ahansi, ayoga, ayesiiga amajuta, ahindura emyendoye, agya nyaruju y'Omukama afukama. Ahanyuma agya omwe, aragira kabamwihulira ekyakulya, alya.

²¹ Abaramatabe bamubaza bati, “Kiki eki ekyo wakora? Oyangire kulya, mara walira aha rw'omwana orwo abaire akyarora; mbwenu orwo yafa nirwo waimuka okalya?”

²² Abashubamu ati, “Orwo omwana abaire akyarora nyangire kulya mara nalira, aha rw'enshonga mbaire nintekeleza nti rundi Omukama yakungilira ekisha omwana wange akira.

²³ Mbwenu yafire, kubaki nyange kulya? Ninshobora kumugarura? Mbali yagya ndimuhonderayo, kyonkai wenene tiyakungarukira.”

Okuzarwa kwa Solomoni

²⁴ Ahanyuma Daudi amaramara omukaziwe Batisheba. Arara nawe; azara omwana w'omwojo, Daudi amuruka eibara amweta Solomoni. Omukama Ruhanga amugonza,

²⁵ amukwasa omurangi Natani mara amuragira kumuruka eibara akamweta Yedidia.

Daudi nakwata ekigo kya Raba

²⁶ Yoabu arashanisa Raba ekigo kikuru ky'Abaamoni, akikwata.

²⁷ Atuma entumwa ahali Daudi namumanyisa ati, “Ndashanisize ekigo kya Raba, n'amaizi gakyo nagakwata.

²⁸ Aho mbwenu oteranise abaisherukare abasigaireho, basisiire omu maisho gakyo oije obe niiwe okikwata, ntakikwata kiketwa ibara lyange.”

²⁹ Nikwo Daudi kuteranisa abaisherukare bona akagenda Raba, agitera agikwata.

³⁰ Aihya Omukama w'Abaamoni orukinga omu mutwe, mara rwinamu eibare ly'eiguzi, kandi obusikizi bwarwo nk'ekilo 35. Orukinga orwo akarwejwalira. Kandi omu kigo ekyo akanyagamu ebintu bingi muno.

³¹ Abantu bamwo yabaihyamu, yabajaraba eikora ly'emishumeno n'esururu n'endyamiti, n'okukora etanuru z'amatofali. N'ebigo ebindi eby'Abaamoni nikwo yabigizire atyo. Ahanyuma agaruka Yerusalemu n'abaisherukarebe bona.