2 Samweli 11 - Ebibulia 2001

Obufu bwa Daudi

¹ Omu mbandizo y'omwaka, omu makiro ag'abakama batabaliramu, Daudi atuma Yoabu n'abaramatabe n'eihe lyona lya Isiraeli, basilikya Abaamoni, kandi babunda Raba. Kyonkai Daudi aikara Yerusalemu.

² Ekiro kimoi eizoba lyaija kutobera Daudi aimuka aha kitandakye, agendagenda aha rushwi rw'enju y'Omukama. Kayabaire ayemeleireho abona omukazi nayoga. Omukazi ogwo hakaba ali murungi muno.

³ Daudi yatuma kumubaliliza. Omuntu omoi agamba ati, “Ogu ni Batisheba muhara wa Eliamu, ni muka Uria, Omuhiti.”

⁴ Nikwo Daudi kutuma entumwa zikamuleta omwe, yabyama nawe, aha rw'okuba hakaba yazirukire. Ahanyuma agaruka omuka.

⁵ Atwara enda; mara aragiraho Daudi ati, “Nyina enda.”

⁶ Aho Daudi atuma ahali Yoabu ati, “Ontwekere Uria, Omuhiti.” Yoabu amumutwekerakwo.

⁷ Orwo Uria yamugobire, Daudi yamubaza amakuru ga Yoabu n'abaisherukare n'ag'endashana.

⁸ Ahanyuma amugira ati, “Ogende omwawe, onabe amaguru.” Uria aruga nyaruju omw'Omukama, Omukama amuhondeza eby'okumugabira.

⁹ Kyonkai Uria akarara n'abairu ba Mukamawe aha kishasi kya nyaruju y'Omukama, owe tiyagiireyo.

¹⁰ Orwo bagambire Daudi bati, “Uria owe tagiireyo,” Daudi yagambira Uria ati, “Manya iwe orugire omu tabaro, mbwenu kubaki otagiire wawe?”

¹¹ Uria amuhorora ati, “Esanduku na Isiraeli na Yuda bali omu nsisira, mara Mukama wange Yoabu n'abairu ba Mukama wange basisiire omw'ishwa. Aho inye ngende omwange kulya nkanywa nkabyama na mukazi wange? Mwoyo gwawe, ekyo tindikwija kukikora.”

¹² Nikwo Daudi kumugambira ati, “Na kir'eki ikara hanu, nyenkya ndakutaishura.” Kityo kir'ekyo n'ekyahondeireho Uria aikara Yerusalemu.

¹³ Daudi amuraliza, alya nawe, amunyoisa amutamiiza. Bwaigoro ashohora abyama aha kitandakye hamoi n'abairu ba Mukamawe; kyonkai owe tiyagiireyo.

¹⁴ Kabwakeire Daudi ahandikira Yoabu ebarua mara agitweka Uria wenene.

¹⁵ Omu barua ahandika ati, “Ote Uria omu maisho bwatana mbali endashana eina amani, ahanyuma mugaruke enyuma mumusigeho bamutere afe.”

¹⁶ Orwo Yoabu yabaire nabunda ekigo, ata Uria aha mwanya mbali yabaire namanya okwo haliho abashaija emanzi.

¹⁷ Abanyakigo bashohora kurwana na Yoabu; abairu ba Daudi abandi bafa. Uria Omuhiti nawe abugenderanamu afa.

¹⁸ Yoabu atuma entumwa kugambira Daudi amakuru gona g'endashana.

¹⁹ Entumwa yagiragilira ati, “Orwo oramara kugambira Omukama amakuru gona g'endashana,

²⁰ akanigara, akakubaza ati, ‘Kubaki murashaine mukagoba ekigo haihi? Mubaire mutalikumanya okwo bakwemire aha rukuta eiguru bakarasha emyambi?

²¹ Abimeleki eya Yerubesheti akaitw'ohai? Ti mukazi ayayemire aha rukuta eiguru akamutenekera enseiso?’ Iwe aho omugambire oti, ‘Omwiru wawe Uria Omuhiti nawe afire.’ ”

²² Entumwa egenda; kayagobire yagambira Daudi byona ebyo yabaire amutumire kugamba.

²³ Emugambira eti, “Ababisha batushagisize amani bashohora batutelera omu rweya; kyonkai tubafunyire twabagobya omu kishasi ky'ekihigi.

²⁴ Nikwo abarasi b'emyambi kurasha ababisha bawe bemire aha rukuta eiguru. Abairu b'Omukama abandi bafire n'omwiru wawe Uria Omuhiti yabugenderanamu.”

²⁵ Daudi agambira entumwa ati, “Ogye ogambire Yoabu oti, ‘Ekyo kitakwita kubi, okuba embanda eita ogu, eshuba eita oli. Oteho amani kurashanisa ekigo, okikambure.’ Mara omugumisilize.”

²⁶ Orwo muka Uria yahuliire okwo iba afire, amuchulira.

²⁷ Kandi okuteka orufu kakwahoire, Daudi yamutuma yamutahya omwe, yaba mukaziwe, ahanyuma yamuzalira omwana w'omwojo. Kyonkai ekyo Daudi yakozire kikatama Omukama.