2 Samweli 10 - Ebibulia 2001

Daudi nasinga Abaamoni n'Abasiria

¹ Ahanyuma Omukama w'Abaamoni afa, omutabani Hanuni amusikira.

² Daudi agamba ati, “Ndagilira Hanuni mutabani wa Nahashi obufura nk'okwo ishe yangiliire obufura.” Aha rw'ekyo atuma abaramatabe kumumaramara aha rw'okuferwa ishe. Kabagobire omu nsi y'Abaamoni,

³ abebembezi b'Abaamoni bagambira Hanuni Omukama wabo bati, “Nolenga oti okuba Daudi yakutwekera ab'okukumaramara, nakunira sho? Yakutwekera abaramatabe kumanyuruza ekigo n'okukinyomoza kwija akakitera.”

⁴ Aho Hanuni akwata abaramata abo abamoisa ebileju orubaju rumoi, ashara emyendo yabo omugati kugoba omu matako mara abataishura.

⁵ Kababigambiire Daudi atuma ab'okugya kubabuganganwa, kuba bakaba baina enshoni zingi kwija Yerusalemu kugaruka owabo. Omukama abaragiraho ati, “Mwikare Yeriko, mubanze mumerwe ebileju nirwo muragaruka.”

⁶ Abaamoni kababoine okwo bayetamisa Daudi, batuma kukodi Abasiria ba Betirehobu n'aba Zoba. Bakodi abaisherukare b'amaguru 20,000. Bakodi n'Omukama wa Maaka n'abaisherukarebe 1,000, n'aba Tobu 12,000.

⁷ Daudi kubihulira asindika Yoabu n'eihe lyona ly'abaisherukare emanzi.

⁸ Abaamoni baturuka betekatekera endashana aha kishasi ky'ekihigi. Abasiria ba Zoba n'aba Rehobu, n'abaisherukare ba Tobu na Maaka bakaba bali bonkai omw'ishwa.

⁹ Orwo Yoabu yaboine okwo endashana yamutanga enyuma n'omu maisho, omw'ihelye arondamu abaisherukare emanzi za Isiraeli abateka orujuru omu maisho g'Abasiria.

¹⁰ Abasigaireho abakwasa Abishai omurumuna, ogwo abateka orujuru omu maisho g'Abaamoni.

¹¹ Agamba ati, “K'Abasiria barankiza amani aho oije onjune, kandi k'Abaamoni barakukiza amani aho ndaija nkujune.

¹² Omanzare. Tumanzare, turashanire abantu n'ebigo bya Ruhanga waitu; Omukama akore okwo alikwenda.”

¹³ Aho Yoabu n'abaisherukare abo yabaire ainabo bagya omu maisho kutera Abasiria. Abasiria bamwiruka.

¹⁴ Orwo Abaamoni baboine okwo Abasiria bairuka Yoabu, nabo bairuka Abishai, bataha omu kigo. Ahanyuma Yoabu aleka Abaamoni, agaruka Yerusalemu.

¹⁵ Kyonkai Abaramu kababoine okwo Abaisiraeli babasinga, baterana hamoi.

¹⁶ Hadadezeri atuma aha Abasiria ababaire batwire buseli bw'Omwiga Efurati baija Helamu bebembeirwe Shobaki omukuru w'eihelye.

¹⁷ Kabagambire Daudi, nawe yahuruza Abaisiraeli bona, bashabuka Yorudani bataha Helamu. Abasiria bateka enjuru bolekeire Daudi, barashana nawe.

¹⁸ Kyonkai bakaterwa Abaisiraeli bairuka. Omu Basiria abo Daudi akaitamu abaisherukare 700 ababaire nibarwanira omu magali, yaitamu ab'efarasi 40,000, yahutaza na Shobaki omukuru w'eihe lyabo, yafera aho.

¹⁹ Abakama ababaire bali bairu ba Hadadezeri kababoine okwo Abasiria basingwa Abaisiraeli, bayehongera Abaisiraeli abo, mara babakolera. Abasiria batina, tibashubire kujuna Baamoni.