2 Samweli 1 - Ebibulia 2001

Daudi namanyisibwa okufa kwa Shauli

¹ Shauli kayabaire yafire, Daudi atabaruka naruga kwita Abaamaleki, aikara Zikilagi ebiro bibili.

² Aha kiro kya kashatu aija omushaija naruga omu rusisira rwa Shauli, emyendoye etemwire, aina eitaka omu mutwe. Orwo yagobire ahali Daudi agwa ahansi amuramya.

³ Daudi amubaza ati, “Noruga nkahai?” Ogu amugambira ati, “Nahunga omu rusisira rwa Isiraeli.”

⁴ Aho Daudi amubaza ati, “Bibaire bitai? Ngambira.” Ahorora ati, “Abantu bairuka omu ndashana, kandi bangi bafa. Shauli na Yonatani omutabani nabo bafa.”

⁵ Daudi abaza omusigazi ogwo ayamumanyisize ebyo ati, “Nomanya otai okwo Shauli na Yonatani omutabani bafire?”

⁶ Ogu amuhorora ati, “Nshangirwe ndi aha Ibanga lya Giliboa mbona Shauli ayetungire aha ichumulye, mara amagali n'ab'efarasi babaire bamufundize.

⁷ K'alebire enyuma ambona, anyeta. Mporora nti, ‘Kaboneke Rugaba!’

⁸ Ambaza ati, ‘Oli ohai?’ Muhorora nti, ‘Ndi Muamaleki.’

⁹ Aho angambira ati, ‘Ngoba haihi onyite, kuba obushasi bundi kubi n'orwo nkyarora.’

¹⁰ Aho mugoba haihi mwita; kuba okwo abaire agwire mbaire nimanyage okwo atakili wa kukira. Mwihyaho orukinga orubaire rumuli aha mutwe n'omulinga ogubaire gumuli aha mukono, niby'ebi nabiletera Mukama wange.”

¹¹ Aho Daudi akwata emyendoye agitemura; n'abashaija bona abo yabaire ainabo bagira batyo.

¹² Bachulira Shauli na Yonatani omutabani n'abantu b'Omukama, n'eihanga lya Isiraeli mara basiba kugoba bwaigoro, bachulira batyo abagwire aha mbanda.

¹³ Daudi abaza omusigazi ayamumanyisize ebyo ati, “Iwe oli wa nkahai?” Ogu amuhorora ati, “Ndi mutabani w'Omuamaleki omoi omufuruki.”

¹⁴ Daudi amubaza ati, “Wayemera otai kwimukya omukono kwita enkorwa majuta y'Omukama?”

¹⁵ Ahanyuma ayeta omusigazi omoi amugambira ati, “Ija omwite.” Amutera afa.

¹⁶ Daudi amugambira ati, “Obwamba bwawe bukururukire iwe wenene; kuba akanwa kawe niko kakuropa orwo wagamba oti, ‘Naita enkorwa majuta y'Omukama.’ ”

Daudi nachulira Shauli na Yonatani

¹⁷ Daudi achulira Shauli na Yonatani omutabani, abatongya.

¹⁸ Mara aragira ekitongyo eki kabyakyegesa ab'oruganda rwa Yuda; nikwo kihandikirwe omu kitabo kya Yashari. Akatongya ati,

¹⁹ “Ekyebugo kyawe iwe Isiraeli, bakitira aha nshozi zawe; emanzi zaitwa zitai!

²⁰ Omuli Gati mutakukigambamu, n'omu mihanda ya Ashikeloni mutakukirangamu; abatatahiliirwe bataija bakashanduka.

²¹ Inywe mabanga ga Giliboa, mutakugira rume anga njura, mutaligira na ndimiro za kurugwamu bihongo; okuba okwo niyo engabo y'emanzi bagihagaliize, engabo ya Shauli tekisiigwa majuta.

²² Obuta bwa Yonatani bukaba butagaruka nyuma, buchumita omubisha bumwita; n'embanda ya Shauli ekaba etagaruka bushai.

²³ Shauli na Yonatani babaire bali barungi nibagonzibwa! Omu burora n'omu kufa tibataishukaine; babaire barahuka kushaga enkwaju, amani nibakira entare.

²⁴ Baisiraeli inywe, chulira Shauli, ayabajwekire emyendo kaliza elikutukura, akagibateraho emilengyo y'ezahabu.

²⁵ Emanzi zaitwa zitai, kugwa omu ndashana! Yonatani bamwitira aha nshozi zawe.

²⁶ Yonatani murumuna wange ninkushasibwa, obaire oli mugonzibwa muno ahali inye, engonzi zawe ahali inye zibaire zili katangaza kushaga engonzi ez'abakazi.

²⁷ Emanzi zafa zitai, n'ebikwato by'endashana kusilika!”