2 Amakuru 9 - Ebibulia 2001

Omukamakazi wa Sheba

¹ Omukamakazi wa Sheba kayahuliire eiranga lya Solomoni aija Yerusalemu kumulenga; yamubaza ebigumire muno. Akaija n'abashagazi bangi muno n'engamia zetwekire ebirungo n'ezahabu ekinje n'amabare g'eiguzi. Orwo yagobire Solomoni yamubaza buli kantu ako yabaire natekeleza.

² Solomoni yamuhorora byona ebyo yamubalize, taliho na kimoi ekyamugumire.

³ Omukamakazi wa Sheba kayaboine obumanyi bwa Solomoni, akabona ekikaare ekyo yabaire ayombekire,

⁴ enkorogoye, emishuntamire y'abaramatabe, emikolere y'abairube n'ekijwaro kyabo, n'ebihongo by'okwokibwa ebyo yahongaga Rwensinga y'Omukama, ayechura muno, atangara.

⁵ Agambira Solomoni ati, “Ebyo nakuhulireho, ebikorwa byawe n'obumanyi bwawe, nibakugambaho owaitu by'amazima.

⁶ Kyonkai amakuru ago tinagaikiliize kuhika orwo nyizire nkabyebonera n'amaisho gange. Obumanyi bwawe bakabungambiraho orubaju; okwo mpuliire tikwo oli, noshagaho.

⁷ Abakazi bawe baberwa. Abaramata bawe aba nabo baberwa abakwikaraho bakahulira obumanyi bwawe.

⁸ Omukama Ruhanga wawe asingizibwe, ayakuronkire akakuta aha nketo okaba mukama aha rwa wenene! Ruhanga wawe akuhaire obukama kutwara Isiraeli n'okubaramura eiramu ly'amazima n'obugorogoki, aha rw'okuba nagonza batachweka eirai lyona.”

⁹ Nirwo yahaire omukama ekilo 4,000 n'omushobyo z'ezahabu, n'ebirungo bingi muno, n'amabare g'eiguzi. Hakaba hatakazokwagayo birungo nka bilinya eby'omukamakazi wa Sheba yahaire Solomoni.

¹⁰ Kandi abairu ba Huramu n'aba Solomoni abaihyaga ezahabu Ofiri, baletaga emiti, n'emiti y'emisandari n'amabare g'eiguzi.

¹¹ Emiti y'emisandali solomoni akagikoza amatembero ga Rwensinga y'Omukama n'ag'ekikaarekye, yagikoza eningili n'enanga z'abahoyi. Bikaba bitakabonekaga mu nsi ya Yuda.

¹² Omukama Solomoni aha omukamakazi wa Sheba byona ebyo yayenzire. Ebyo yashabire byona, bitali bilinya ebyo yabaire agemuliire omukama, akabimuha. Aho akwata omuhanda ashuba owe n'abaramatabe.

¹³ Omu mwaga gumoi baleteraga Solomoni ezahabu y'obusikizi bw'ekilo nka 23,000.

¹⁴ Eyo yaleteirwe abachuruza n'abatunzi egyo etabulimu. Abakama ba Buarabu bona n'abagavana b'emikoa nabo bamuleteraga ezahabu n'efeza.

¹⁵ Omukama Solomoni ahesha engabo z'ezahabu zihango 200, buli emoi ekaba ekozirwe ezahabu ejugusirwe ey'ekilo nka mushanju.

¹⁶ Ashuba ahesha engabo ez'ezahabu nka 300, buli emoi ekaba ekozirwe ezahabu y'ekilo nka ishatu. Omukama aziteka Nyaruju y'Ekibira kya Lebanoni.

¹⁷ Yahanga enketo y'omwino gw'enjoju, yamara yagisiiga ezahabu enchenkure.

¹⁸ Enketo egyo ekaba eina amatembero mukaga n'akatebe k'okuhumuzaho amaguru ak'ezahabu kongeirwe aha nketo. Buli rubaju rw'enketo hakaba haliho obuhumulizo bw'emikono, obwo bukaba bwina entare ibili aha rubaju.

¹⁹ Entare 12 zili aho. Amatembero gona mukaga, buli itembero lina entare emoi oku n'oku. Enketo nk'egyo ekaba etakahangwaga mu ngoma yona yona.

²⁰ Ebikwato by'okunyweramu byona eby'Omukama Solomoni bikaba bili by'ezahabu. N'ebikwato byona bya Nyaruju y'Ekibira kya Lebanoni bikaba bili by'ezahabu enchenkure. Omu makiro ga Solomoni efeza yagaywaga.

²¹ Nikwo kyabaire kili, aha rw'okuba abairu ba Huramu basabaraga Tarishishi n'emeli. Omu myaka eshatu limoi emeli za Tarishishi zaletaga ezahabu, efeza, emino y'enjoju, enkobe, n'ebinyonyi ebyetwa tausi.

²² Oku nikwo Omukama Solomoni yashagize abakama bona b'ensi eitunga n'obumanyi.

²³ Abakama bona b'ensi baitaniraga kubona Solomoni, kuhulira obumanyibwe obwo Ruhanga yabaire amutungire.

²⁴ Abakama abo buli omoi yaijaga n'ekigemuro: Ebikwato by'efeza n'ezahabu, emyendo, emigaju, ebirungo, efarasi n'endogobe, bingi bityo buli mwaka.

²⁵ Solomoni wenene hakaba aina ebiraro 4,000 by'efarasi n'amagali, ab'efarasi 12,000 abo yabaire ataire omu bigo ebibikirwemu amagali, abandi yaikara nabo Yerusalemu.

²⁶ Abakama bona kwema Efurati kugoba Filisitia na Misiri bakaba bali omu manige.

²⁷ Omu butwazibwe, omuli Yerusalemu akatahyamu efeza yashusha amabare, emyelezi egyo yashusha emikuyu ya Shefela.

²⁸ Efarasi ezo yazihyaga Misiri n'omu nsi ezindi zona.

Solomoni natahya

²⁹ Ebindi byona ebyo Solomoni yakozire kwema aha mbandizo kugoba aha nzindo bihandikirwe omu makuru g'omurangi Natani, n'omu byo Ahia Omushilo yarangire, n'omu byo Ido kaboni yabonekeirwe ahali Yeroboamu eya Nebati.

³⁰ Solomoni akatwara Isiraeli yona emyaka 40 ayemire Yerusalemu.

³¹ Aho atahya, abyalirwa omu kigo kya Daudi ishe. Omutabani Rehoboamu amusikira.