2 Amakuru 7 - Ebibulia 2001

Okuhongwa kwa Rwensinga

¹ Orwo Solomoni yamazire enshara, omuliro guhanantuka omw'iguru gwokya ekihongo ky'okwokibwa n'ebitambo, n'ekitinwa ky'Omukama kisingira Rwensinga.

² Abakuhani tibatahire Rwensinga aha rw'enshonga y'ekitinwa ky'Omukama ekyabaire kisingiiremu.

³ Orwo Abaisiraeli bona baboine omuliro niguhanantuka omw'iguru, n'ekitinwa ky'Omukama nikisingira ahali Rwensinga, bainama obuso bugoba aha itaka, bafukamira Omukama, bamusiima bati, “Omukama aba murungi, ekishakye kiba ky'eirai lyona.”

⁴ Aho Omukama Solomoni n'embaga yona batambira Omukama Ruhanga ebitambo.

⁵ Omukama Solomoni akatamba ekitambo ky'ente 22,000, n'entaama 120,000. Nikwo omukama n'embaga yona bahongeire Ruhanga Rwensingaye.

⁶ Abakuhani bakemelera omu myanya yabo; n'Abalevita kwakwo bakwete ebikwato by'okuhoyera Omukama Ruhanga, eby'Omukama Daudi yabaire akozire kumusiimisa, bati, “Ekishakye kiba ky'eirai lyona,” nk'okwo Daudi yabaire abaragiire. Embaga eyemeleire ekaba elebangaine n'abakuhani nibatera amakondere.

⁷ Solomoni akaha endaragati ya nyakabuga ey'omu maisho ga Rwensinga omugisha; ahakuba honene aho niho yatambiire ekihongo ky'okwokibwa n'ebishaju by'ebihongo by'emilembe, nobona ealutare y'omulinga eyo yabaire akozire tiyashoboire kugibwaho kihongo kya kwokibwa, n'ekihongo ky'emyaka n'ebishaju.

⁸ Omu biro ebyo Solomoni na Isiraeli yona, enteko mpango muno kwema aha butahiro bwa Hamati, bakora obugenyi bw'ebiro mushanju.

⁹ Obugenyi bw'okuha ealutare omugisha bakabukora ebiro mushanju; aho aha kiro kya munana bakora obw'okumaliira.

¹⁰ Aha kiro kya makumi gabili na bishatu eky'omwezi gwa mushanju, Omukama Solomoni ataishura abantu bashuba omuka nibashemelerwa muno aha rw'ebirungi eby'Omukama yakoleire Daudi na Solomoni na Isiraeli eihangalye.

Ruhanga nashuba kubonekera Solomoni

¹¹ Oku nikwo Solomoni yamazire Rwensinga y'Omukama n'ekikaarekye. Byona ebyo yabaire ategekire kukora omuli Rwensinga n'omu kikaarekye akabigobesheleza kurungi.

¹² Aho nirwo Omukama yamubonekeire omu kiro akamugambira ati, “Enshara zawe nzihuliire na Rwensinga egi nagikiliza kuba nimwo bantambilira ebitambo.

¹³ Kanditanga enjura kugwa anga nkasindika enzige zikalya ebimera, anga nkasindikira abantu rubunga,

¹⁴ k'abantu bange abo, abamanyika okwo baba bange balyetohya, bakashoma enshara, bakampiga, bakalekera emize yabo, aho omw'iguru ndibahulira, mbagarulire obufu bwabo n'ensi ngiramurure.

¹⁵ Rwensinga ndigilinda kandi n'enshara ezilishomerwamu ndizihulira.

¹⁶ Aha rw'okuba Rwensinga egi ngironkire nagiha omugisha kuba nimwo nfukamirwa eirai lyona. Ndigilinda mara ngigonze obukiro bwona.

¹⁷ Kandi iwe k'olimpulira nk'okwo sho Daudi yampuliraga, okakora byona ebyo nkuragiire noyekomya ebiragiro byange n'emigenzo yange,

¹⁸ aho ndagumisa obukama bwawe nk'okwo naraganisize Daudi nti, ‘Toliburwa mwijukuru wa kutwara Isiraeli.’ ”

¹⁹ “Kyonkai kamulyeiza mukebwa ebiragiro byange n'emihango yange eyo mbahaire, mukagenda mukehongera baruhanga abandi mukaba nibo mufukamira,

²⁰ aho mbatambye omu nsi eyo mbahaire; na Rwensinga yange egi eyo nyeheleire omugisha ngihwemu, amahanga gona gagichweho omugani.

²¹ Rwensinga egi n'ekitinwa kyayo buli muhinguzi aligyebazaho ati, ‘Ensi egi na Rwensinga egi Omukama akabituraki?’

²² Nirwo baligamba bati, ‘Enshonga bakasigaho Omukama Ruhanga wa baishebo ayabaihire Misiri, bayekwata baruhanga abandi, baba nibo bafukamira bakakolera. Nikyo Omukama abateleize enaku ezi.’ ”