2 Amakuru 6 - Ebibulia 2001

Solomoni naha embaga ehotuba

¹ Aho Solomoni agamba ati, “Waitu Mukama, okagamba okwo olisingira omu mwilima lindindi.

² Kyonkai inye nkwombekeire Rwensinga y'ekitinwa, mbali olisingira eirai lyona.”

³ Solomoni akebuka alebire aheru, enteko yona ya Isiraeli okwo elebire agiha omugisha.

⁴ Agamba ati, “Ahaisilizibwe Omukama Ruhanga wa Isiraeli, omu bushoborabwe agobesheleize ekyo yaraganisize tata Daudi, ati,

⁵ ‘Kwema kiro ekyo naihire abantu bange Misiri, omu nganda zona za Isiraeli tinaronziremu kigo kya kwombekamu Rwensinga kuba nimwo banfukamira; kandi tinaronzire muntu wa kuba mukama wa Isiraeli eihanga lyange.

⁶ Kyonkai mbwenu ndonzire Yerusalemu kuba nimwo banfukamira, nashuba naronda Daudi kuba mukama wa Isiraeli eihanga lyange!’

⁷ Tata Daudi yagonzaga kwombekera Omukama Ruhanga wa Isiraeli Rwensinga mbali arafukamirwa.

⁸ Kyonkai Omukama agambira tata Daudi ati, ‘Okozire kugonza kunyombekera Rwensinga.

⁹ Kyonkai iwe Rwensinga togyombeke. Omwana w'olizara niwe aliginyombekera.’

¹⁰ Mbwenu Omukama yagobesheleza ekyo yaragaine; aha rw'okuba nsikiire tata Daudi, natwara engoma ya Isiraeli nk'okwo Omukama yaragaine, Omukama Ruhanga wa Isiraeli namwombekera Rwensinga.

¹¹ Omwo nimwo ntaire Esanduku einamu endagano ey'Omukama yakozire na Isiraeli eihangalye.”

Enshara ya Solomoni

¹² Solomoni ayemelera omu maisho ga ealutare y'Omukama, enteko yona ya Isiraeli eli aho, aimukya emikono.

¹³ Akashangwa akozire ekituuti ky'omulinga, oburai bwakyo mita 2 n'okushagamu, obukika mita 2 n'okushagamu, n'obwemi mita 1 n'okushagamu, akita nyakabuga akyemeleraho. Ateka amajwi enteko yona ya Isiraeli eli aho, aimukya emikono,

¹⁴ agamba ati, “Waitu Mukama Ruhanga wa Isiraeli, tabayo Ruhanga ondijo alikushusha omw'iguru anga omu nsi. Iwe ohikya endagano mara abairu bawe abakuhulira n'omutima gwabo gwona obagilira ekisha.

¹⁵ Ekyo waraganisize tata Daudi omwiru wawe wakigobesheleza. Kir'eki omu bushobora bwawe wagobesheleza ekigambo kyawe.

¹⁶ Mbwenu aha rw'ekyo, waitu Mukama Ruhanga wa Isiraeli, ijuka okwo waraganisize tata Daudi omwiru wawe, oti, ‘Omuli baijukuru bawe toliburwamu mukama wa kutwara Isiraeli, ekikuru kabalyegendeleza bakahulira Amateka gawe nka iwe.’

¹⁷ Kityo mbwenu, waitu Mukama Ruhanga wa Isiraeli, singa ekyo waraganisize omwiru wawe Daudi kigobelere.”

¹⁸ “Kyonkai nikwo, waitu Ruhanga, noija kutura n'abantu omu nsi? Eiguru lyona okwo likali tilyakukubumbatira, lero Rwensinga egi eyo nyombekire!

¹⁹ Shana iwe singa ohulire enshara yange n'okutaka kwange, waitu Mukama Ruhanga wange. Hulira okutaka kw'omwiru wawe n'enshara ey'alikushoma ahali iwe.

²⁰ Singa olinde Rwensinga egi kiro na mushana. Okaragana okwo omu nimwo balikufukamira, kityo bampulire orwo ndebire Rwensinga egi ninshoma enshara.

²¹ Hulira okutaka kw'omwiru wawe n'okw'eihanga lyawe lya Isiraeli orwo barashomaga enshara balebire Rwensinga egi. Omw'iguru omu businge bwawe otuhulirega mara otugarulirega.”

²² “K'omuntu arafakaliraga mutahiwe bakamutoijera, bakamuleta ahali ealutare yawe omu Rwensinga kumunahiza okwo balikumubeiyelera,

²³ Waitu Mukama omw'iguru mbali osingiire, ohulire abairu bawe mara obaramulire. Ow'omushango guligwera omubonabonyie, kandi nyakatetere omurongore nk'okwo oburungibwe buliba buli.”

²⁴ “Ka Isiraeli eihanga lyawe barasingwaga ababisha babo aha rw'enshonga y'okushangwa bakufakaliire, kabalyeshubaho bakakutonganaho, bakaija munu omuli Rwensinga bakakushaba nibakutakaho,

²⁵ singa mbali osingiire okwo omw'iguru obahulire, ogarulire Isiraeli eihanga lyawe entambara yabo, obagarule omu butaka obwo wabatungire na baish'enkurubo.”

²⁶ “K'enjura eraburaga aha rw'okushangwa bakufakaliire, kabarayechuzaga bakashoma enshara balebire Rwensinga egi nibakutonganaho, n'orwo orashangwaga obahaire ekibonabonyio,

²⁷ singa omw'iguru okwo mbali osingiire ogarulire abairu bawe eihanga lya Isiraeli entambara yabo, obegese okukora ebili birungi, n'ensi eyo wasikisize eihanga lyawe ogitunge enjura.”

²⁸ “K'ensi eraterwaga eifa, endwara ekaija, emyaka ekaterwa ekisiisi, enzige n'ebihuka bikatabara, ababisha bakababunda omu bigo byabo, kibe kibundoki anga ndwara nyabaki;

²⁹ omuntu wena wena anga eihanga lyawe lyona lya Isiraeli kabalishoma enshara bakataka baimukize emikono balebire Rwensinga egi buli omoi nataka nakuze,

³⁰ aho singa omw'iguru okwo omu businge bwawe obahulire, obagarulire, mara buli muntu nk'okw'olikumanya emirolereye (aha rw'enshonga iwe mara iwe wenkai n'iwe omanya emitima y'abantu);

³¹ baije bakutine, bakuhulire muno ebiro byona ebyo balitura omu nsi egi eyo watungire baish'enkurubo.”

³² “Kumoi n'omunyamahanga atalikuruga muli Isiraeli eihanga lyawe, k'aliruga harai akaletwa ekitinwa kyawe, amani gawe n'obushobora bwawe, k'alija akashoma enshara alebire Rwensinga egi,

³³ singa omw'iguru okwo mbali osingiire omuhulire, omutunge byona ebyo yakutakaho, nirwo amahanga gona g'ensi galimanya ekitinwa kyawe mara bakakutina nk'okwo Isiraeli eihanga lyawe balikukutina. Aho bashube bamanye okwo Rwensinga egi eyo nyombekire nimwo abantu basaine balikuragirwa kukufukamira.”

³⁴ “K'oligira okwo wahangira eihanga lyawe kurwana n'ababisha babo, kabarakushabaga balebire ekigo eki ekyo waronkire, na Rwensinga egi eyo nkwombekeire,

³⁵ singa omw'iguru mbali osingiire ohulire enshara zabo n'okutaka kwabo, mara obememu basinge ababisha babo.”

³⁶ “Kandi kabarakufakaliraga, orwo hatabaho atafakara, okabanigalira, okabaanaga omu mikono y'ababisha, bakabatwara endore harai anga haihi,

³⁷ kabaliba bali omu buzahe baketekeleza, bakechuza, orwo balikutakaho nibagamba bati, ‘Tukozire kubi, twafakara,’

³⁸ omu buzahe okwo kabalyechuza n'amagezi gabo gona n'omutima gwabo gwona, bakashoma enshara balebire ensi yabo eyo watungire baishebo, n'ekigo ekyo waronkire, na Rwensinga eyo nkwombekeire,

³⁹ aho olisinga omw'iguru okwo omu businge bwawe ohulire enshara zabo n'okutaka kwabo, obememu, ogarure eihanga lyawe abalishangwa bakufakaliire.”

⁴⁰ “Mbwenu waitu Ruhanga wange, otulebe ichwe mara ohulire enshara ezashomerwa hanu aha.

⁴¹ Waitu Mukama Ruhanga, imuka osingiire omu kikaare kyawe, iwe n'Esanduku emanyisa amani gawe. Singa, waitu Mukama Ruhanga, orokore abakuhani bawe; otunge abantu bawe emilembe bashemelerwe.

⁴² Waitu Mukama Ruhanga, enkorwa majuta yawe otaginagirana! Ijuka ekisha kyawe ekyo wagiliraga Daudi omwiru wawe.”