2 Amakuru 2 - Ebibulia 2001

Entekateka y'okwombeka Rwensinga

¹ Omukama Solomoni agira omugendelero gw'okwombekera Omukama Rwensinga, kandi na wenene kutema ekikaare.

² Ajaraba abagata 70,000 ab'okushomba ebintu n'ab'okushokora amabare omu mabanga 80,000; n'abanyampara 3,600.

³ Aragiraho Huramu omukama wa Tiro ati, “Nk'okwo wakoleire tata Daudi okamutwekera emyelezi y'okwombeka ekikaare ky'okuturamu, nanye obe nikwo onkolera.

⁴ Leba, ndi haihi kwombekera Omukama Ruhanga wange Rwensinga nkagimuhongera kumwotelezamu obunuma bw'omugaju, kumuhongera omukate gw'obusinge ogw'orubelera, ebihongo by'okwokibwa ebya bwankya na bwaigoro, ahali Sabato n'aha kwezi kwema n'aha biro bikuru bya wenene ebitairweho, nk'okwo Abaisiraeli balikuragirwa ebiro byona.

⁵ Ninyija kwombeka Rwensinga mpango, Ruhanga waitu mukuru kukira baruhanga abandi bona.

⁶ Kyonkai n'ohai ashobora kumwombekera Rwensinga orwo eiguru, nangu eiguru elya kaleire litashobora kumubumbatira? Nab'ohai inye kumwombekera Rwensinga? Shana omwanya gw'okumwotelezaho obunuma!

⁷ Mpahonu ontwekere omuhesi omubuya w'ezahabu, n'efeza n'omulinga n'ekyoma, n'omushuki w'emyendo ya zambarau, elikutukura, n'eya kibururu. Ontwekere n'omubuya w'okuchonga aije ayeme n'ababuya abo nyinabo omuli Yuda na Yerusalemu abo tata Daudi yasigire agizire.

⁸ Ontwekere n'embaho z'emyelezi, emiberoshi n'emisandari ya Lebanoni, kuba nimanya okwo abairu bawe balikumanya kushara embaho omuli Lebanoni. Abairu bange barayema n'abawe,

⁹ banshalire embaho zingi muno kuba Rwensinga eyo ndikwija kwombeka mpango mara y'okutangaza.

¹⁰ Inye ndakuhera aha rw'abairu bawe abashazi b'embaaho, nkuhe amapipa 450,000, amapipa 450,000 g'eshayiri, n'amapipa 4,500 g'edivai n'amapipa 4,500 g'amajuta.”

¹¹ Aho Huramu omukama wa Tiro, ahandikira Omukama Solomoni ebarua amuhorora ati, “Omukama akuhindwire mukama w'abantube aha rw'enshonga nabagonza.

¹² Ahaisilizibwe Omukama Ruhanga wa Isiraeli, ayatonzire eiguru n'ensi, ayatungire Omukama Daudi omwana w'obumanyi, ow'amagezi n'obubuya ow'okumwombekera Rwensinga, akashuba na wenene akatema ekikaare.”

¹³ Ati, “Mbwenu nakutwekera Huramabi, omubuya w'amani.

¹⁴ Nyina kimuzara Mudanikazi, kandi ishe hakaba ali wa Tiro. Akega okuhesha ezahabu, efeza, omulinga, ekyoma, okubaija amabare, okusomora embaho; n'okushuka emyendo ya zambarau, eya kibururu, elikutukura na kitani nyhakabara. Nakora emilimo yona y'okuchonga na buli mulimo ogwo bakumuha hamoi n'ababuya bawe ababuya ba mukama wange, Daudi sho.

¹⁵ Aha rw'ekyo, engano n'eshayiri, amajuta n'edivai, eby'ogambire, mukama wange, singa obintwekere.

¹⁶ Ichwe turatema emiti yona ya Lebanoni ey'olikwetaga. Turagikomerana tugyeleeze omu nyanja egobe Yopa, ogihye aho ogitware Yerusalemu.”

Elyombeka lya Rwensinga nilibanza

¹⁷ Omukama Solomoni abara abanyamahanga bona ababaire bali omuli Isiraeli. Obubere bakaba babazirwe Daudi, ishe; bakagoba 153,600.

¹⁸ Omuli abo akajarabamu 70,000 ab'okushutura ebintu, ab'okushokora amabare omu mabanga bantu 80,000, n'abanyampara b'okubakoza 3,600.