2 Amakuru 16 - Ebibulia 2001

Isiraeli omu biyengo

¹ Omu mwaka gwa 36 Asa atwete, Baasha omukama wa Isiraeli atabalira Yuda, ayombeka Rama kutanga ab'okugya owa Asa omukama wa Yuda anga kurugayo.

² Nirwo Asa yaihire efeza n'ezahabu omw'itunga lya Rwensinga y'Omukama n'ely'ekikaare akazitwekera Benihadadi omukama wa Siria ayaturaga Damasiko, nagamba ati,

³ “Tukore endagano nk'okwo tata yabaire agikozire na sho. Leba nakutwekera efeza n'ezahabu, ogende ohindure endagano yawe na Baasha omukama wa Isiraeli, andugeho.”

⁴ Benihadadi aikiliza Omukama Asa, atweka abakuru b'amahege kutabalira ebigo bya Isiraeli. Batera Iyoni, Dani, Abelimaimu n'ebigo bya Nafutali byona ebyagiragamu esitoa.

⁵ Baasha kukihulira alekera kwombeka Rama, elyombekalye alyemeleza.

⁶ Omukama Asa agenda na Yuda yona, amabare ga Rama bagatwara n'emiti yaho, ebyo Baasha yabaire nayombekesa abyombekesa Geba na Mizipa.

Omurangi Hanani

⁷ Omu makiro ago, Hanani kaboni aija ahali Asa omukama wa Yuda, amugambira ati, “Orwo oyesigire omukama wa Siria, tiwayesiga Mukama Ruhanga wawe, eihe lya Siria lyakunagaho.

⁸ Abaetiopia n'Abalibya babaire batali ihe lihango, bataina amagali ekinje n'ab'efarasi? Kyonkai iwe okesiga Omukama yabakunaga omu mikono.

⁹ Kuba Omukama abona hona omu nsi yona, kwoleka abesigwabe obushoborabwe. Orwo okozire otyo obaire mulenga; kwema mbwenu oraikaraga omu ndashana.”

¹⁰ Asa kandi anigalira kaboni, amukoma empingo amunaga mabusi, yamutamwa n'akanihi namutura ekyo yamugambira. Omu kanya konene ako n'abantu abandi ababonabonyia.

¹¹ Ebyo Asa yakozire, kwema aha mbandizo kugoba aha nzindo, bihandikirwe omu Kitabo ky'Abakama ba Yuda na Isiraeli.

¹² Omu mwaka gwa 39 ali aha ngoma agya arwara amaguru agobayo; kyonkai omu burwairebwe obwo tiyairukiire Mukama, yairukira abatambi.

¹³ Atahya, agwa omu mwaka gwa 41 aha ngoma.

¹⁴ Bamubyalira omu nyanga eyo yabaire ayeshokoleire wenene omu Kigo kya Daudi. Bamuta aha kiliba ekyabaire kisiigirwe amarasi agarungirwe omubuya wago engeli zingi; bashuba bahemba omuliro gungi kumukunisa.