2 Amakuru 11 - Ebibulia 2001

Oburangi bwa Shemaya

¹ Rehoboamu kayagobire Yerusalemu, ahuruza ab'oruganda rwa Yuda n'orwa Benjamini, abaisherukare elaki emoi n'enkumi kinana kurashanisa Isiraeli, kunyaguruza engomaye.

² Kyonkai Omukama agambira Shemaya enganziye ati,

³ “Ogambire Rehoboamu eya Solomoni omukama wa Yuda, na Isiraeli yona omu ruganda rwa Yuda n'orwa Benjamini

⁴ oti, ‘Omukama nagamba ati, mutakutemba kurashana na barumuna banyu. Buli muntu agaruke omuka, inye n'inye nyenzire ebyo kabiba bityo.’ ” Ekigambo ky'Omukama bakihulira, baba batakitabalira Yeroboamu.

Rehoboamu nagumisa ebigo

⁵ Rehoboamu atura Yerusalemu, kandi omuli Yuda ayombekamu eboma ez'okwelindiramu ababisha.

⁶ Ayombeka Betelehemu, Etamu, Tekoa,

⁷ Betizuri, Soko, Adulamu,

⁸ Gati, Maresha, Zifu,

⁹ Adoraimu, Lakishi, Azeka,

¹⁰ Zora, Aihaloni na Heburoni. Ebi nibyo bigo ebyo yayombekeire eboma omuli Yuda na Benjamini.

¹¹ Eboma azigumisa, atamu abakuru b'amahe, atamu esitoa z'ebyakulya, amajuta n'edivai.

¹² Ebigo byona abitamu engabo n'amachumu, amara abigumisa muno. Aba nikwo ayekwata atyo Yuda na Benjamini.

Abakuhani n'Abalevita nibaija Yuda

¹³ Abakuhani n'Abalevita omuli Isiraeli yona mbali bakaturaga barugayo bamuhondera mbali ali.

¹⁴ Abalevita bakasigaho amalisizo gabo n'amataka gabo, baija Yuda na Yerusalemu Yeroboamu n'abatabani bakababinga omu bukuhani bw'Omukama.

¹⁵ Yayeteraho abe abarakora omu buju bw'aha mabanga obw'okufukamiramu abazimu n'ebihuuku by'enumi bibili ebyo yakozire.

¹⁶ Omu nganda zona za Isiraeli abagonzaga Omukama Ruhanga wa Isiraeli bakabahondera Yerusalemu kutambira Omukama Ruhanga wa baish'enkurubo ebitambo.

¹⁷ Obukama bwa Yuda bakaburamira, Rehoboamu eya Solomoni bamulinda, emyaka egyo yonshatu bakaguma bali besigwa, barondora Daudi na Solomoni.

Eka ya Rehoboamu

¹⁸ Rehoboamu ashwera Mahalati muhara wa Yerimoti eya Daudi, nyina ni Abihaili muhara wa Eliabu eya Yese.

¹⁹ Amuzaraho abaana b'abojo abhalimu Yeushi, Shemaria na Zahamu.

²⁰ Amuhondezaho Maaka muka Abusalomu, nawe amuzaraho Abiya, Atai, Ziza na Shelomiti.

²¹ Omu bakazibe bona n'omu nsholekeze, Rehoboamu owo yagonzaga kushaga ni Maaka muhara wa Abusalomu (hakaba aina abakazi 18 n'ensholeke 60, abaana b'abojo 28 n'abaana bahara 60).

²² Abiya owo yazaraga ahali Maaka, aba niwe aha obukuru omu barumuna, kuba niwe yabaire nagonza k'aba muragwa w'engoma.

²³ Akakoza amagezi, abatabani abandi yabagabira ewilaya za Yuda na Benjamini, yabaha ebigo by'eboma, yabateraho ebyakulya bingi, yabashwelerera n'abakazi.