2 Amakuru 1 - Ebibulia 2001

Solomoni nashaba obumanyi

¹ Solomoni eya Daudi aguma omu ngomaye. Omukama Ruhangawe amwemamu mara amukuza muno.

² Omukama Solomoni ahuruza Isiraeli yona, abakuru b'enkumi n'ebikumi, n'abatwazi bona omuli Isiraeli hamoi n'abakuru b'amahiga.

³ Solomoni n'enteko yona eyo yabaire ainayo, agya Gibeoni omu mwanya gutakatifu mbali Eihema ly'Omukama ly'Omuterano elyo Musa omwiru w'Omukama yabaire akoleire omw'irungu lyabaire lili.

⁴ (Kyonkai Daudi hakaba yaihire Esanduku ya Ruhanga Kiriatiyearimu yagilesire Yerusalemu mbali yabaire agiteleire eihema.)

⁵ Kandi na ealutare y'omulinga eyo Bezaleli eya Uri, Uri eya Huri yabaire ahesire, ekaba eli yonene omu maisho g'Ekiikaro ky'Omukama. Solomoni n'enteko bafukamira Omukama.

⁶ Agoba aha ealutare y'omulinga omu maisho g'Omukama omw'Ihema ly'Omuterano omu maisho, agihongaho ebihongo rukumi by'okwokibwa.

⁷ Kir'ekyo omu kiro Ruhanga amubonekera, amugambira ati, “Gamba ekyo ndakuha.”

⁸ Solomoni agambira Ruhanga ati, “Iwe okagilira tata Daudi ekisha, kandi inye wampindura musikawe.

⁹ Waitu Mukama Ruhanga, singa mbwenu ekyo waraganisize tata Daudi kigobelere aha rw'okuba ompindwire mukama w'abantu enkumbititi.

¹⁰ Mbwenu singa ontunge obumanyi n'amagezi mbone kubatwara. Ni muntuki ayakushobora kutwara abantu bawe aba abangi bati?”

¹¹ Ruhanga amuhorora ati, “Orwo wayenda obumanyi, tiwashaba bintu, itunga, kitinwa anga kwita babisha bawe, kandi tiwashaba burora bungi, washaba kugira oburora n'amagezi kutwara abantu bange abo nkuhaire okaba mukama wabo;

¹² obumanyi n'amagezi nabikuha. Kandi ndakuha n'eitunga, ebintu n'ekitinwa eby'omukama n'omoi atakabonaga mara taliho n'omoi alibona nk'ebyo.”

Obushobora n'eitunga lya Solomoni

¹³ Solomoni aruga Gibeoni, aha Ihema ly'Omuterano, agaruka Yerusalemu. Atwara Isiraeli.

¹⁴ Ahiga amagali n'ab'efarasi. Akaba aina amagali 1,400, n'ab'efarasi 12,000. Akabateka omu bigo abandi yaikara nabo Yerusalemu.

¹⁵ Solomoni akatunda efeza n'ezahabu okw'obona amabare omuli Yerusalemu, yakanyisa emielezi okw'obona emisikomori ya Shefela.

¹⁶ Efarasi yazihya Misiri na Kue. Abatunzi ba wenene bazitundaga Kue.

¹⁷ Egali ya Misiri bagiguraga eshekeli 600 z'efeza. Efarasi emoi bagiguraga eshekeli 150 z'efeza. Bonene bonene nibo bashubaga bakaziguza abakama bona b'Abahiti n'abakama ba Siria.