2 Abakama 9 - Ebibulia 2001

Yehu nakorwa amajuta naba Mukama wa Isiraeli

¹ Omurangi Elisha ayeta omurangi omoi, amugambira ati, “Yekome okwate echupa y'amajuta, ogye Ramotigileadi.

² K'oragobayo ohige Yehu eya Yehoshafati, Yehoshafati eya Nimushi, otahe omu nju omugambire aruge omu barumuna, omutware omu kiyumba eky'omunda.

³ Aho okwate echupa y'amajuta ogamusheshe aha mutwe, ogambe oti, ‘Omukama nagamba ati, “Nakukora amajuta k'oba Mukama wa Isiraeli.” ’ Aho okingure orwigi oiruke, otakelererwa.”

⁴ Aho omurangi muto ogwo akwata omuhanda agya Ramotigileadi.

⁵ Kayagobireyo, ashanga abakuru b'eihe baina orukiko, agambira Yehu ati, “Nyina ekyo bantuma kukugambira.” Yehu ati, “Ohai omuli ichwe ow'olikwija kugambira?” Omurangi ati, “Iwe, omukuru w'eihe.”

⁶ Aho abanduka, ataha omu nju; omusigazi amushesha amajuta omu mutwe nagamba ati, “Omukama Ruhanga wa Isiraeli nagamba ati, ‘Nakukora amajuta k'oba Mukama w'abantu b'Omukama, otware Isiraeli.

⁷ Oite eka ya Mukama wawe Ahabu, inye nyije mbone kwehoroza Yezebeli aha rw'abairu bange abarangi abo yaisire, ngeholere n'abairu bange abandi bona abo baisire.

⁸ Enshonga eka ya Ahabu neija kusilika yona; kandi omu ka egyo ninyija kwita buli mushaija, omwiru n'omwegeleere, omuli Isiraeli.

⁹ Eka ya Ahabu ninyija kugishusa eya Yeroboamu mutabani wa Nebati, ngishuse eka ya Baasha mutabani wa Ahiya.

¹⁰ Yezebeli embwa ziramulira omu nsi ya Yezereeli, kandi taliho araziika mukazi ogwo.’ ” Akingura orwigi airuka.

¹¹ Yehu kayashohoire akagoba abairu ba Mukamawe, bamubaza bati, “Milembe? Omuraru ogu yaba nakwenzaki?” Abahorora ati, “Aga wenene nimugamanya.”

¹² Bamugambira bati, “Ebyo bishuba, otugambire.” Abagambira ati, “Yangambira ati, ‘Omukama nagamba ati, Nakukora amajuta k'oba Mukama okatwara Isiraeli.’ ”

¹³ Niho honkai buli muntu akwata ekijwarokye, akyara aha matembero mbali alibasire, batera eikondere kurangira abantu okwo Yehu yaba Mukama.

Yehu naita Yoramu na Ahazia

¹⁴ Oku nikwo Yehu eya Yehoshafati, Yehoshafati eya Nimushi yabanzire Yoramu. (Omu kanya ako Yoramu n'Abaisiraeli bona bakaba bali Ramotigileadi omu rugamba, nibagonza kurashanisa Hazaeli omukama wa Siria.

¹⁵ Kyonkai Omukama Yoramu akaba ashubire Yezireeli kutambirwa amahuta ag'Abasiria bamuhutaize orwo alikurashana n'Omukama wabo.) Kityo Yehu agamba ati, “Kamuraba nimutekeleza mutyo, aho omuntu n'omoi ataruga mu kigo kugya Yezireeli kubarura amakuru aga.”

¹⁶ Nikwo Yehu kukuuba egaliye akagya Yezireeli mbali Yoramu yabaire arwaliire. Ahazia omukama wa Yuda ashangwa agiire Yezireeli yonene kuleba Yoramu.

¹⁷ Omulinzi akaba ayemeleire aha munara gwa Yezireeli, abona Yehu n'abantube nibaija, agamba ati, “Nimbona omutwe gw'abantu.” Yoramu ati, “Kwata ow'efarasi omutume agye abatanganwe, ababaze ati, ‘Milembe?’ ”

¹⁸ Ow'efarasi aba nikwo agenda atyo kubatanganwa, abagambira ati, “Omukama nabaza ati, ‘Milembe?’ ” Yehu agamba ati, “Emilembe ekukweteki? Shuba enyuma oije aha farasi ompondeire.” Omulinzi aija agamba ati, “Entumwa yabagoba kyonkai tiyagaruka.”

¹⁹ Aho atweka ow'efarasi owa kabili, aija abagoba ababaza ati, “Omukama nabaza ati, ‘Milembe?’ ” Yehu amuhorora ati, “Emilembe ekukweteki? Shuba enyuma oije aha farasi ompondeire.”

²⁰ Omulinzi ashuba agamba ati, “Ow'efarasi owa kabili yabagoba kyonkai tiyagaruka,” ati, “Kandi emibugire y'omukuru w'abaisherukare yashusha eya Yehu mutabani wa Nimushi aha rw'okuba egali agibingire kubi.”

²¹ Yoramu agamba ati, “Tekateka egali.” Batekateka egaliye. Aho Yoramu omukama wa Isiraeli na Ahazia omukama wa Yuda baimukya, buli muntu omu galiye, bagya kubuganganwa Yehu, bamushanga omu butaka bwa Naboti Omuyezireeli.

²² Aho Yoramu kayaboine Yehu, amubaza ati, “Yehu, milembe?” Amuhorora ati, “Emilembe erugehai orw'olikubona ebihuuku n'amarogo ga nyoko Yezebeli gakyaliho gangi!”

²³ Nikwo Yoramu kukubura egaliye akairuka nagambira Ahazia ati, “Ahazia, batushenga!”

²⁴ Yehu ananura obutabwe n'amani arasha Yoramu omu bikogoto, omwambi gumushenshera omu mutima, akabaituka omu galiye.

²⁵ Yehu agambira Bidikari omukuru w'eihelye ati, “Mwihyemu mumunage omu butaka bwa Naboti Omuyezireeli, kuba noijuka okwo inye naiwe twabaire tuli aha farasi tuhondeire Ahabu ishe, Omukama akamuraguraho ekigambo eki ati,

²⁶ ‘Mazima okwo nyeigoro mboine noita Naboti n'abatabani, nikwo ndikweholera omu butaka obu.’ Aha rw'ekyo mushuture, mumunage omu butaka obwo nk'okwo Omukama yagambiire.”

²⁷ Ahazia omukama wa Yuda kayaboine ebyo, airuka ayolekeire Betihagani. Yehu amubinga, aragira nawe kabamurasha. Bamurasira omu gali omu butemba bwa Guri bwatana Ibuleamu. Airukira Megido, niyo yagwire.

²⁸ Abaramatabe bamutwara omu gali, baija Yerusalemu, bamubyalira omu nyangaye omu magashani ga baishe omu Kigo kya Daudi.

²⁹ Ahazia akalya engoma ya Yuda guli mwaka gwa 11 Yoramu eya Ahabu atwete.

Okufa kwa Yezebeli

³⁰ Yehu kayaizire Yezireeli, Yezebeli akihulira. Omukazi ogwo ayeziga amaisho, ayelengya omutwe, alinguliza omw'idirisha.

³¹ Yehu akaba yaraba ati omu kihigi, Yezebeli abaza ati, “Iwe Zimuri, ayaita Mukama wawe, milembe?”

³² Yehu anaga amaisho omw'idirisha agamba ati, “Ali aha rubaju rwange n'ohai? N'ohai?” Abakobe babili anga bashatu bamuleba wenene Yehu.

³³ Abagambira ati, “Muteneke ahansi.” Bamuteneka, obwambabwe bushaimukira eboma, n'efarasi; bamulibatilira.

³⁴ Aho Yehu ataha omu nju, alya, anywa; ashuba ati, “Gya mulebe omukazi ogu omuraamwa, mumuziike, kuba mumbeija.”

³⁵ Kyonkai kabagenzire kumuziika, tibashangireho kantu shana akahanga k'omutwe n'ebilenge n'ebiganja.

³⁶ Kabagarukire bakamugambira, abagambira ati, “Nikwo Omukama yagambiire omu kanwa k'omwiruwe Elisha owa Tishibi ati, ‘Yezebeli embwa zilimulira omu nsi ya Yezireeli,

³⁷ n'omutumbigwe gulishusha obusha bw'ente omu nsi egyo; taliho alishobora kugamba ati ogu niwe Yezebeli.’ ”