2 Abakama 7 - Ebibulia 2001

¹ Elisha agamba ati, “Hulira okw'Omukama alikugamba, ‘Nyenkya omw'izoba nk'eli aha kihigi kya Samaria ekipimo ky'ensano enungi kiragura eshekeli emoi; ebipimo bibili by'eshayiri biragura eshekeli emoi.’ ”

² Aho omukuru w'eihe mara katikiro agambira omurangi ati, “N'orwo Omukama yakukingura eiguru, eki kyakuba?” Kyonkai Elisha agamba ati, “Orakyebonera iwe n'amaisho gawe, kyonkai tobilyeho.”

Abasiria nibairuka

³ Hakaba haliho ababembe banai abaikaraga aha kihigi omu kishasi. Begeya bonkai bati, “Ekitushuntamisa aha, tulemwe tufe, kiba kiki?

⁴ Katuragira tuti, ‘Tutahe omu kigo,’ omu kigo halimu eifa, aho twagwamu; katurashuntama aha, byona bimoi turafa. Kityo mbwenu mwije tushabuke tugye omu rusisira rw'Abasiria. Kabaratuganyira twarora, kabaratwita twafa.”

⁵ Aha kalemba bazana baimukya bagoba aha mbandizo y'orusisira rw'Abasiria. Tibashangiremu muntu.

⁶ Kuba Omukama akaha Abasiria okuhilira akahiliro k'amagali, n'efarasi, n'eihe lihango, aho begeya bati, “Muramanya, omukama wa Isiraeli yatuletera abakama b'Abahiti n'abakama b'Abamisiri kutubunda.”

⁷ Bairuka aha kalemba bazana, amahema gabo baganagaho, n'efarasi zabo, n'endogobe zabo, orusisira barunagaho okwo rukali, bairuka bahungya emyoyo.

⁸ Ababembe kabagobire aha mbandizo y'orusisira bataha omw'ihema, balya, banywa, batwara efeza n'ezahabu n'emyendo, bagenda babisheleka. Bashuba bagaruka, bataha omw'ihema elindi, baihyamu ebintu, bagenda babisheleka.

⁹ Bagambirangana bati, “Nitushobya. Kir'eki kiro ky'amakuru garungi; katurayesiza kulemwa obwire kukya, nitwija kubona ekibonabonyio. Aha rw'ekyo tugende tumanyise omutungo gw'omukama.”

¹⁰ Baija, beta abakumilizi b'ekihigi ky'ekigo, babagambira bati, “Tugiire omu rusisira rw'Abasiria, kyonkai titwina wotuboinemu anga kuhuliramu, shana efarasi n'endogobe zisibikirwe, n'amahema gali aho kushai.”

¹¹ Aho abakumilizi beta omutungo gw'omukama babagambira.

¹² Omukama aimuka omu kiro agambira abaramatabe ati, “Kambagambire eky'Abasiria balikugonza kutukora. Nibamanya okwo twina enjara; aha rw'ekyo basigaho orusisira bagya kwesheleka omw'irungu nibagira ngu katuraruga omu kigo batukwate obunyangaro, bashube batahe omu kigo eki.”

¹³ Omuramata omoi agamba ati, “Harugweho abantu bakwate efarasi itanu ezasigaramu tumanye ekyaba; kuba abantu abasigara munu nibaija kushusha embaga yona ya Isiraeli abafire.”

¹⁴ Baleta abantu babili abakuubire efarasi, omukama abatuma kuhondera eihe ly'Abasiria ati, “Mugende mulebe.”

¹⁵ Babahondera kulemwa kugoba Yourudani. Omu muhanda bashangamu ekinje ky'emyendo n'ebikwato eby'Abasiria bajugunyire nibairuka. Entumwa zigaruka zibarulira omukama.

¹⁶ Nirwo abantu bashohoire bakanyaga orusisira rw'Abasiria. Aho ekipimo ky'ensano nungi kigura eshekeli emoi; n'ebipimo bibili by'eshayiri bigura eshekeli emoi, nk'okwo Omukama yabaire abagambiire.

¹⁷ Aho omukama ataho omukuru w'eihe mara katikirowe kulinda ekihigi. Embaga emulibatilira aha kihigi ekyo, afa nk'okwo omurangi yabaire agambiire omukama orwo yagire kumubona.

¹⁸ Bikaba bityo, kuba orwo omurangi yagambiire omukama ati, “Ebipimo bibili by'eshayiri biragura eshekeli emoi, n'ekipimo ky'ensano nungi kiragura eshekeli emoi nyenkya omu izoba nk'eli aha kihigi kya Samaria,”

¹⁹ omukuru w'eihe akahorora omurangi ogwo ati, “N'orwo Omukama yakukingura eiguru, eki kyakuba?” Elisha akaba amugambiire ati, “Orayebonera n'amaisho gawe, kyonkai tobilyeho.”

²⁰ Nikwo yabaire atyo, kuba abantu bakamulibatilira aha kihigi, yafa.