2 Abakama 4 - Ebibulia 2001

Elisha najuna entumbwa omunaku

¹ Omukazi omoi muk'omurangi atakira Elisha ati, “Ibanye, omwiru wawe afire. Kandi nomanya okw'omwiru wawe ogwo abaire ali muntu w'Omukama. Kyonkai omuntu omoi alikumutonga yaija kutwara abana bange bombili kababa bairube.”

² Elisha amubaza ati, “Mbwenu nkukolereki? Ngambira omwawe oinamuki?” Omukazi amuhorora ati, “Omuzana wawe taina kantu mu nju, shana emuga y'amajuta.”

³ Aho Elisha amugambira ati, “Iroko ogye omuli batani bawe otize ebikwato byabo byona ebili bushai mara bingi.

⁴ Aho otahe omu nju oyekingirane hamoi na batabani bawe aho ebikwato ebi byona obifukemu amajuta. Orwo ekimoi kiraijura okiteke aha rubaju.”

⁵ Kityo omukazi amurugaho agya ayekingirana n'abatabani; bamuheleza amajuta, wenene nabifukamu amajuta.

⁶ Kabyaijwire, agambira omutabani ati, “Ndetera ekikwato ekindi.” Omutabani agamba ati, “Taliho kindi.” Aho amajuta galekera kwituruguka.

⁷ Aija agambira omurangi, omurangi amugambira kugenda akaguza amajuta ago akashashura n'amabanja, agarasigaraho gamujune n'abatabani.

Elisha n'Omukazi wa Shunemu

⁸ Ekiro kimoi Elisha agya Shunemu; omuli Shunemu hakaba bhalimu omukazi mutungi, omukazi ogwo amutagiliza kulya akakulya. Orwo yakatwarwaga omuhanda guli yatahagamu alya.

⁹ Omukazi agambira iba ati, “Mbwenu namanya okwo ogu alikwikara naturabaho, mutakatifu wa Ruhanga.

¹⁰ Aha rushwi twombekeyo akayumba, tumuteremu ekitanda, emeza, ekitebe n'etara, k'araba natukyalira abe nimwo ata nagya.”

¹¹ Ekiro kimoi agyayo, ataha omu kayumba ako ahumura.

¹² Agambira omwiruwe Gehazi ati, “Yeta Omushunamikazi ogu.” Kayamwesire aija amwemelera omu maisho.

¹³ Elisha agambira omwiruwe ati, “Mbwenu ogambire omukazi ogu oti, Leba okw'otuhyahyaniire muno oti! Twakukukoleraki? Tukutelere omushango aha Mukama anga aha mukuru w'eihe?” Omukazi ahorora ati, “Chei, inye ndi omu bange.”

¹⁴ Elisha abaza Gehazi ati, “Isi twakumukoleraki?” Gehazi ahorora ati, “Taina mwana, kandi iba yakuzire.”

¹⁵ Elisha agamba ati, “Mwete.” Kayamwesire aija ayemelera omu rwigi.

¹⁶ Elisha amugambira ati, “Omu kirumo nk'eki aha mwaka oraba otoire omwana w'omwojo.” Omukazi agamba ati, “Leka, Rugaba rwange iwe omurangi; kakulemba omuzana wawe.”

¹⁷ Kyonkai omukazi atwara enda, azara omwojo omu kirumo ekyo Elisha yabaire amugambiire.

¹⁸ Omwana kayabaire yakazire ekiro kimoi agenda owa ishe omu bagesi.

¹⁹ Ahanyuma atakira ishe ati, “Omutwe, omutwe!” Ishe agambira omwiruwe ati, “Mutwalire nyina.”

²⁰ Kayamushutwire akamutwalira nyina, nyina amutora kulemwa kuturuka omw'ihangwe, omwana afa.

²¹ Nyina mwana atemba amubyamika aha kitanda ky'omurangi, amukingirana, aturuka.

²² Aho ayeta iba, amugambira ati, “Ontwekere omwiru n'endogobe, nyanguhe ngende ow'omurangi nshube ngaruke bwangu.”

²³ Omushaija amubaza ati, “Ekyakutwara ow'omurangi kir'eki kiki? Tikwaba kwezi kwema handiki tiyaba Sabato.” Omukazi ati, “Birashemera.”

²⁴ Nikwo kwara endogobe, akagambira n'omwiru kugisimbura, mara kwanguha, shana kayakumugambiire kundi.

²⁵ Aba nikwo aimukya atyo akagya aha Ibanga lya Karimeli ow'omurangi. Omurangi kayamulengeire naija agambira omwiruwe Gehazi ati, “Leba olinya Mushunamikazi.

²⁶ Yanguha ogye omwakilire, omubaze oti, ‘Ogumire? Isi baro murungi? Isi omwana murungi?’ ” Omukazi ahorora ati, “Barungi!”

²⁷ Kayagobire omurangi aha ibanga, amukwata amaguru. Aho Gehazi aija kumukururaho, kyonkai omurangi agamba ati, “Omuleke, kuba aina obushasi bungi muno; kandi Omukama yansheleka, tiyangambira.”

²⁸ Aho omukazi agamba ati, “Rugaba rwange, inye nkakushaba omwana w'omwojo. Tinakugambiire nti, ‘Otandemba?’ ”

²⁹ Omurangi agambira Gehazi ati, “Oyekome, okwate enkoni yange ogende ogibyamike aha buso bw'omwana.”

³⁰ Aho nyina mwana agamba ati, “Obuso bw'Omukama, mwoyo gwawe, tindikwija kukurugaho.” Nikwo omurangi kwimuka akahondera omukazi ogwo.

³¹ Gehazi agenda ayebembeire, abyamika enkoni aha buso bw'omwana, nawe omwana tiyaikize anga kwetengya. Aha rw'ekyo agaruka kubuganganwa omurangi, amugambira ati, “Omwana tiyasisimuka.”

³² Elisha kutaha omu nju, abona okwo arambiire aha kitandakye, afire.

³³ Atahamu, ayekingirana n'omwana, ashaba aha Mukama.

³⁴ Aho aimuka amubyamira, omunwagwe aguta aha gw'omwana, n'amaishoge aha g'omwana, n'ebiganjabye aha by'omwana; kayamazire kumwegoroleraho, omwana atagata.

³⁵ Ashuba aimuka, agendagenda omu nju. Ashuba agaruka amwegoroleraho. Omwana ayesaimura emirundi mushanju, aburura.

³⁶ Aho ayeta Gehazi, amugambira kweta Omushunamikazi ogwo. K'omukazi yagobire omurangi amugambira ati, “Twara omwana wawe.”

³⁷ Omukazi aija amugwa omu maguru, ajumara ahansi; ashuba ashutura omwanawe, aturuka.

³⁸ Elisha ashuba agaruka Giligali omu biro eby'ensi yabaire eteirwe eifa. Abarangi kabashangirwe bamushuntamireho, agambira omwiruwe kuteka enyungu mpango aha kyoto kuchumbira abarangi obushera.

³⁹ Omurangi omoi ashohora agenda omu bikamba kushombokya emikubi. Abonayo entobatobo, azinoga, aijuza omwendogwe, aija azisharashalira omu nyungu atamanyire ni bintuki.

⁴⁰ Baihulira abantu obushera kunywa. Kababaire nibanywa obushera obwo bakunga bati, “Iwe murangi, omu bushera halimu obumara!” Tibabunyoire.

⁴¹ Elisha agamba ati, “Leta ensano.” Aginaga omu nyungu, abagambira ati, “Ihulira abantu balye.” Omu bushera tibahuliiremu kabi.

⁴² Omuntu omoi aruga Baalishalisha, aija kuganuza omurangi omukate, emikate 20 y'eshayiri, n'ebikumba bibisi by'engano omu gunia. Elisha agambira omwiruwe kubiha abarangi abo kubilya.

⁴³ Kyonkai omwiruwe agamba ati, “Ebi mbihe ntai abantu aba kikumi?” Elisha ashubamu ati, “Obihe abantu babilye, kuba nikwo omukama alikugamba ati, ‘Baralya babisigeho.’ ”

⁴⁴ Aho nikwo kubibaha; balya babisigaho nk'okwo Omukama yabaire agambiire.