2 Abakama 21 - Ebibulia 2001

Manase omukama wa Yuda

¹ Manase akaba aina emyaka 12 kayaliire engoma. Aha ngoma akamaraho emyaka 55 ayemire Yerusalemu. Nyina eibaralye ni Hefuziba.

² Manase ayagokera Omukama, yakora amahano ag'Omukama yabingire Abaisiraeli.

³ Kuba akombeka obuju obwo Hezekia ishe yabaire akambwire. Yayombekera Baali ealutare, yakora Ashera, nk'eby'Omukama Ahabu owa Isiraeli yabaire akozire. Yafukamira enyanyinyi yazikolera.

⁴ Yayombeka ealutare ezindi omuli Rwensinga y'Omukama, ey'Omukama yagambiireho ati, “Ndafukamirwagamu.”

⁵ Enyanyinyi yazombekera ealutare etali emoi omuli nyakabuga zombili eza Rwensinga y'Omukama.

⁶ Omutabani yamwokya, yamutamba ekitambo; yaragura, yabasha, yashuba yata naraguza aha balikugambisa ebizimu, yayekwata n'abarogi. Yagokera Omukama yamunigaza.

⁷ Ekishushani kya Ashera ekibaijano ekyo yabaire abaizire yakiteka omuli Rwensinga ey'Omukama yabaire nagamba orwo yagambiire Daudi na Solomoni omutabani ati, “Omuli Rwensinga egi n'omuli Yerusalemu eyo naronkire omu nganda zona za Isiraeli nimwo nditura eirai lyona.

⁸ Kandi Abaisiraeli tindibaihya mu nsi eyo nahaire baish'enkurubo kubenjeza, kabalyegendeleza bakakora ebyo nabaragiire byona, n'ebyo Musa omwiru wange yabaragiire.”

⁹ Kyonkai tibahuliire, na Manase yabohya, bahena kushagaho amahanga ag'Omukama yasilikize.

¹⁰ Omukama agambira omu kanwa k'abairube abarangi ati,

¹¹ “Orwo Manase omukama wa Yuda yakora amahano aga, akakora ebibi kushaga eby'Abaamori abamwebembeire bakozire, akafakaza na Yuda aha rw'okufukamira ebihuuku bya wenene,

¹² Omukama Ruhanga wa Isiraeli nagamba ati, Yerusalemu na Yuda ninyija kubateza enaku ezo buli omoi alizihulira amatwi galimwana.

¹³ Yerusalemu ngibonabonyie nk'okwo nabonabonyize Samaria, nkabonabonyia Omukama Ahabu n'abaijukuru. Yerusalemu ngite akayaba nk'okwo omuntu aragaza eshahani akagijumika.

¹⁴ Ab'eihanga lyange abaruhonokireho nabo mbaihemu emikono, mbanagire ababisha babo, babaite babanyage,

¹⁵ enshonga bangokeire banigaza, kwema kiro ekyo baish'enkurubo barugire Misiri kugoba mwaha.”

¹⁶ Kandi Manase akaita abantu bangi abataina ntambara, Yerusalemu kugyema rubaju oru kugituruka rubaju oru yagijuza obwamba, lekanu obufu bw'okufukamira ebihuuku obwo yafakaize Yuda bakagokera Omukama.

¹⁷ Mbwenu ebindi byona ebyo Manase yakozire, n'obufu obwo yafakaire, bihandikirwe omu Kitabo ky'Amakuru g'Abakama ba Yuda.

¹⁸ Manase atahya, bamubyalira omu busitani ya Uza omu kikaare. Amoni omutabani alya engoma, amusikira.

Amoni omukama wa Yuda

¹⁹ Amoni akalya engoma aina emyaka 22. Aha ngoma akamaraho emyaka ebili ayemire Yerusalemu. Nyina eibaralye ni Meshulemeti. Akaba ali muhara wa Haruzi owa Yotiba.

²⁰ Akagokera Omukama nk'okwo Manase, ishe yamugokeire.

²¹ Akamurondora omu bigiro byona, yakolera ebihuuku ebyo ishe yakoleire, yabifukamira.

²² Akebwa Omukama Ruhanga wa baish'enkuru, tiyakozire bilikushemelera Mukama.

²³ Abaramata ba Amoni bamushenga, bamwitira omu kikaare.

²⁴ Kyonkai abamushengire bona abanyansi bakabaita. Yosia omutabani baba niwe bateka aha ngoma, amusikira.

²⁵ Mbwenu ebindi byona ebyo Amoni yakozire, bihandikirwe omu Kitabo ky'Amakuru g'Abakama ba Yuda.

²⁶ Bakamubyalira omu magashani omu busitani ya Uza. Yosia omutabani alya engoma, amusikira.