2 Abakama 2 - Ebibulia 2001

Eliya natwarwa omw'iguru

¹ Orwo Omukama yabaire ali haihi kutwaza Eliya akazimu omw'iguru, Eliya na Elisha baija bashangwa bali hamoi nibaruga Giligali.

² Eliya agambira Elisha ati, “Wakuba oli aha, enshonga Omukama yantuma Betheli.” Kyonkai Elisha amugambira ati, “Obuso bw'Omukama, mwoyo gwawe, tindikwija kukurugaho.” Aho bagenda hamoi Betheli.

³ Ab'omuteko gw'abarangi ababaire bali Betheli bagoba Elisha, bamubaza bati, “Nomanya okwo kir'eki Omukama Ruhanga alikukwihyaho Mukama wawe?” Elisha ahorora ati, “Ego, nimanya, kyonkai mwesize.”

⁴ Eliya amugambira ati, “Elisha, wakuba oli aha, aha rwokuba Omukama yantuma Yeriko.” Kyonkai Elisha agamba ati, “Obuso bw'Omukama, mwoyo gwawe, tindikwija kukurugaho.” Aho bagoba Yeriko.

⁵ Ab'omuteko gw'abarangi ababaire bali Yeriko bagoba Elisha bamubaza bati, “Nomanya okwo kir'eki Omukama alikukwihyaho Mukama wawe?” Elisha abahorora ati, “Ego, nimanya, kyonkai mwesize.”

⁶ Eliya ashuba amugambira ati, “Wakuba oli aha enshonga Omukama yantuma aha Mwiga gwa Yourudani.” Kyonkai Elisha amugambira ati, “Obuso bw'Omukama, mwoyo gwawe, tindikwija kukurugaho.” Aho bombili bagendelera n'orugendo.

⁷ Abarangi amakumi gatanu nabo bagenda, bemelera akatambi kuruga ahali bonene, aho bombili bashangwa bemeleire aha Mwiga gwa Yourudani.

⁸ Eliya ajura ebeboye agizingazinga, atera amaizi, gabeganukamu kabili, bombili bashabuka, baraba aha rukaru.

⁹ Kababaire bashabukire Eliya agambira Elisha ati, “Ogambe eky'olikwenda kankukolera ntakakusigireho.” Elisha agamba ati, “Ninkushaba, nsike amani gawe aganyamwoyo emirundi ebili.”

¹⁰ Agamba ati, “Washaba ekigumire, kyonkai orwo ndaba ninkusigaho k'orambona, aho ekyo washaba orakihabwa; kyonkai k'otambone, aho tokihabwe.”

¹¹ Kababaire bakyagenda nibafumora, bechura egali y'omuliro n'efarasi z'omuliro, bombili bibataishurana, akazimu katembya Eliya omw'iguru.

¹² Elisha kubona ebyo ataka ati, “Tata, tata! Amagali ga Isiraeli n'ab'efarasi bayo!” Mara tiyamuboine rundi. Akwata emyendoye agitaguramu kabili.

¹³ Atwara orufufu rwa Eliya orwamuragaire; akubuka agenda ayemelera aha mwegego gwa Yourudani.

¹⁴ Aho akwata orufufu rwa Eliya atera amaizi nagamba ati, “Omukama Ruhanga wa Eliya alihai?” Kayateire amaizi, gabekanukamu kabili, Elisha ashabuka.

¹⁵ Ab'omuteko gw'abarangi ababaire bali Yeriko kabamuboine naija, bagamba bati, “Eliya yabanda Elisha.” Baija kumwakilira mara bamubandamira.

¹⁶ Bamugambira bati, “Aha leba abairu bawe baina abantu b'amani 50, nitukushaba bagende bahige Mukama wawe; rundi Mwoyo wa Mukama yamukwata yamunaga aha ibanga anga omu Ruhanga.” Agamba ati, “Mutabatwekayo.”

¹⁷ Kabamukaliliize orurai akalemwa akakwatwa enshoni, abagambira ati, “Batweke.” Kityo batweka abantu 50 abo. Bamuhiga ebiro bishatu kyonkai tibamuboine.

¹⁸ Bagaruka bashanga akyali Yeriko, bamugoba; abagambira ati, “Timbagambiire nti, ‘Mutagyayo?’ ”

Elisha nakora ebitangazo

¹⁹ Abanyakigo bagambira Elisha bati, “Rugaba rwange, olebe okwo ekigo kyemirege, kyonkai kiina amaizi gabi, n'eitaka tililikuleta.”

²⁰ Abagambira kumuletera epakuli mpya mara bagitemu omwonyu. Bagimuletera.

²¹ Agenda aha nchuro y'amaizi asheshamu omwonyu ogwo, ashuba agamba ati, “Omukama nagamba ati, ‘Amaizi aga ndagahindura maizi g'oburora; tigaliita muntu anga kumunagisa nda.’ ”

²² Na mambwenu amaizi ago gaba maizi g'oburora nk'okwo Elisha yagambiire.

²³ Aruga okwo, agenda agiire Betheli. Kayabaire akyagenda, obwana buruga omu kigo bumushekelera buti, “Iroko iwe kahara, iroko iwe kahara.”

²⁴ Akubuka, aleba oku n'oku; kayababoine abaraama omw'ibara ly'Omukama. Aho emishega ebili emikazi eruga omu kibira, etagatagura obwana obwo 42.

²⁵ Aruga aho agya aha Ibanga lya Karimeli, ashuba arugayo agya Samaria.