2 Abakama 17 - Ebibulia 2001

Hoshea omukama w'enzindo wa Isiraeli

¹ Omu mwaka gwa 12 Omukama Ahazi owa Yuda abaire Mukama, Hoshea eya Ela abanza kutwara Isiraeli ayemire omu kigo kya Samaria.

² Akagokera Omukama, kyonkai ti nka bakama ba Isiraeli abamwebembeire.

³ Shalumanesa omukama wa Asiria aija amutabalira, aho Hoshea ahinduka mwiruwe, ata namusholera n'omushoro.

⁴ Kyonkai Shalumanesa omukama wa Asiria akaija yamubonamu obugobya, aha rw'okuba akaba yatumire entumwa owa So omukama wa Misiri, kandi akaba atakisholera Shalumanesa wenene mushoro nk'okwo yakoraga omwaka aha gundi. Kityo Shalumanesa amuboha, ashuba amufunga.

⁵ Ahanyuma atabalira ensi yona agoba Samaria, agibunda emyaka eshatu.

⁶ Guli mwaka gwa mwendai Hoshea ali aha ngoma, Shalumanesa akwata Samaria, Abaisiraeli abatwara Asiria, agir'abo yateka Hala na Habori, bwatana aha Mwiga gwa Gozani n'omu bigo by'Abamedi.

⁷ Ebi bikaba bityo aha rw'okuba Abaisiraeli bakafakalira Omukama Ruhanga wabo, ayabaihire Misiri omu naku za Farao omukama w'ensi egyo, bafukamira baRuhanga abandi,

⁸ bakwata emichwo y'amahanga ag'Omukama yababingiiremu, bakwata n'emichwo ey'abakama ba Isiraeli babaire betahizemu.

⁹ Kandi Abaisiraeli bagokera Omukama Ruhanga wabo omu kyama, bakora ebizira. Omu bigo byabo byona bakombekamu obuju, kubandiza aha munara gw'abalinzi kugoba aha boma.

¹⁰ Ahali buli rushozi orurai n'ahali buli kigabiro bayombekaho enyomyo, bataho n'ebishushani bya Ashera.

¹¹ Omu buju bwona bata kwoteramu obunuma nk'amahanga ag'Omukama yababingiire. Bakahena banigaza Omukama.

¹² Bafukamira ebihuuku eby'Omukama yabaire abatangire ati, “Mutalikora mutyo.”

¹³ Kyonkai Omukama wenene akaba atatiire Isiraeli na Yuda omu kanwa k'abarangi bona n'ababonekerwa ati, “Mulekere emize yanyu, mwekomye emihango yange n'ebiragiro byange nk'okwo Amateka ago nahaire baisheinywe galikuragira, nkashuba nagatweka n'abairu bange abarangi.”

¹⁴ Kyonkai tibabihuliire. Bakagumangana emitima nka baishebo, abatayesigire Mukama Ruhanga wabo.

¹⁵ Bagaya ebiragirobye n'endaganoye eyo yabaire akozire na baishebo, n'okubatatira okwo yabatatiire. Bahondera ebihuuku bitaina nshonga, na bonene baba bantu abataina nshonga, barondora amahanga agabaire gabataine ag'Omukama yabatangire kurondora.

¹⁶ Emihango y'Omukama Ruhanga wabo tibagifireho, bahesha ebishushani bibili by'enyana, bataho n'ekishushani kya Ashera, bafukamira enyanyinyi, bakolera Baali.

¹⁷ Batabani babo na bahara babo babokya ebitambo, baraguza, baroga, bayehwamu bagokera Omukama bamunigaza.

¹⁸ Aha rw'ekyo Omukama yanigalira muno Isiraeli, yababinga omu maishoge; tihasigairweho muntu shana oruganda rwa Yuda rwonkai.

¹⁹ Aba Yuda nabo tibahikize mihango ya Mukama Ruhanga wabo, kyonkai bahondera emichwo eyo Abaisiraeli babaire beteleireho.

²⁰ Omukama yachwa baijukuru ba Isiraeli bona yabateza enaku, yabanaga omu mikono y'ababisha, yalemwa yababinga omu maishoge.

²¹ K'Omukama yabaire yachwire Isiraeli, ab'eka ya Daudi bakwata Yeroboamu eya Nebati bamuta aha ngoma. Yeroboamu yabaihya aha Mukama, yabakoza entambara mpango.

²² Amafu ago Yeroboamu yakozire, Abaisiraeli bakagakora gona, tibagelinzire.

²³ Aho Omukama yalemwa yababinga omu maishoge nk'okwo yabaire agambiire omu kanwa k'abairube abarangi. Aho Abaisiraeli babatwara endore, babaihya omu nsi yabo babatwara Asiria, batura okwo kuhika mwaha.

²⁴ Omukama wa Asiria akwata abantu abaihya Babiloni, Kuta, Ava, Hamati na Sefarivaimu, abateka omu bigo bya Samaria, balya omwanya gw'Abaisiraeli. Samaria bagilya, batura omu bigo byabo.

²⁵ Aha mbandizo y'okutura kwabo okwo tibatinaga Mukama; nikwo Omukama kubatwekera entare, abandi zabaita.

²⁶ Kityo omukama wa Siria bamugambira amahanga ago yatwete akateka omu bigo bya Samaria batalikumanya Mateka ga Ruhanga wa nsi egyo, okwo Ruhanga ogwo niwe abasindikire entare zikabaita aha rw'okutamanya Matekage.

²⁷ Aho abaragira kutwekayo omukuhani omoi omuli balinya abo baihire omu nsi egyo.

²⁸ Kityo omukuhani omoi omuli balinya abo babaire baihire Samaria agenda atura Betheli, abegesa okwo barataga kutina Omukama.

²⁹ Kyonkai buli ihanga likaguma likozire baRuhanga balyo n'okubateka omu buju obwabaire bwombekirwe Abaisiraeli omuli Samaria, buli ihanga omu bigo ebyo lyaturagamu.

³⁰ Abantu ba Babiloni bakakora Ruhanga wabo Sukotibenoti; aba Kuti bakora Nerigali; aba hamati bakora Ashima;

³¹ Abaavi bakora Nibuhazi na Taritaki; Abasefarivi bakwata abana babo babokeza Adurameleki na Anameleki baRuhanga babo.

³² Amahanga aga kwakwo gakaba nigatina Omukama, nangu omuli bonene barondamu abantu aba buli ngeli ab'okuba bakuhani b'obuju, bata nibatambilira ebitambo omu buju obwo.

³³ Nikwo batinire Omukama, kyonkai bashuba bafukamira baRuhanga ababo nk'okwo amahanga gabo mbali babaire barugire bakoraga.

³⁴ Emichwo yabo ey'eirai niyo bakyahondera na mwaha. Tibafukamira Mukama anga kukwata biragirobye anga Matekage anga mihango eby'Omukama y'ahangire baijukuru ba Yakobo, owo yayesire Isiraeli.

³⁵ Omukama akakora endagano nabo, mara yabaragira ati, “Mutalifukamira baRuhanga bandi anga kubabandamira, anga kubakolera, anga kubatambira bitambo.

³⁶ Shana mutine Omukama ayabaihire Misiri n'amani gangi n'obushobora bwona. Ogwo mube niwe mubandamira, mube niwe mutambira ebitambo.

³⁷ Ebiragiro n'emigenzo n'aMateka n'emihango ebyo yabahandikiire mwegendeleze kubikwata. Mutalifukamira baRuhanga bandi,

³⁸ kandi mutalyebwa ndagano eyo naragaine nainywe. Mutalifukamira baRuhanga bandi.

³⁹ Mutinega Omukama Ruhanga wanyu, alibarokora omu mikono y'ababisha.”

⁴⁰ Kyonkai tibahulire; bakahondera emichwo yabo eya karai.

⁴¹ Kityo amahanga aga gakatina Omukama, kyonkai gashuba gafukamira n'ebishushani byago ebiheshano. Abana babo nabo kutyo, na baijukuru babo, nk'okwo baishebo bakozire, nabo baikara nibakora batyo na kir'eki.