2 Abakama 11 - Ebibulia 2001

Atalia omukamakazi wa Yuda

¹ Atalia nyina Ahazia kayaboine okwo omutabani yafa, asilikya oruganda rw'omukama rwona.

² Kyonkai Yehoshebu muhara w'Omukama Yoramu, niwe munyanya Ahazia, akwata Yoashi mutabani wa Ahazia, amwihya omu bana b'omukama ababaire nibaija kwitwa, amutwara n'omuleziwe amuta omu kitabo. Aba nikwo amusheleka atyo Atalia, aha rw'ekyo tiyaisirwe.

³ Yoashi akaikara na Yehosheba, beshelekire omuli Rwensinga y'Omukama emyaka mukaga, orwo Atalia yabaire ali mutwazi w'ensi.

⁴ Kyonkai omu mwaka gwa mushanju, Yehoyada omukuhani, atuma abakuru b'abalinzi b'omukama n'ab'ekikaare kumushanga Rwensinga y'Omukama, mwonene omwo akora nabo endagano ashuba abanahiza, aboleka n'omwana w'omukama.

⁵ Abaragira ati, “Ekyo murakora niky'eki: Etheluti yanyu eraijaga aha mulimo ahali Sabato, balinde ekikaare

⁶ etheluti ya kashatu egye aha kihigi kya Suri kandi etheluti ya kashatu egye aha kihigi enyuma y'abalinzi.

⁷ Ebichweka byanyu ebyo byombili, abalikuragirwa kwija aha mulimo ahali Sabato, barata kulinda Rwensinga y'Omukama,

⁸ kandi bazingore omukama, buli omoi ashangwe akwete ebikwato. Wena wena arayenda kubatahamu mumwite. Mushembe omukama orwo alikuturuka n'okugaruka.”

⁹ Abakuru b'eihe bakora nk'okwo Yehoyada omukuhani yaragira. Aha kiro kya Sabato bamugoba, buli omoi amuletera abantube ab'okugya aha zamu y'okulinda, bakaihyangana.

¹⁰ Omukuhani akwasa abakuru b'eihe amachumu n'engabo eby'Omukama Daudi yasigire, bikaba bibiikirwe omuli Rwensinga y'Omukama.

¹¹ Abalinzi bona bemelera bakwata ebikwato by'endashana, kwema rubaju orwa kasi orwa Rwensinga kuhika rubaju orwa bikara, bazingora ealutare na Rwensinga.

¹² Aho Yehoyada ashohoza omwana w'omukama, amujweka orukinga, amukwasa ekitabo ky'Amateka g'obukama, bamuranga okwo yaba Mukama, bamukora amajuta, batera n'enganga bagamba bati, “Omukama nakamelere.”

¹³ Atalia kayahuliire empundwi z'abalinzi n'abantu, abahondera Rwensinga y'Omukama.

¹⁴ Kugya kunaga amaisho abona omukama ayemeleire aha nyomyo nk'okwo omuchwo gwabaire guli, abakuru b'eihe n'abatezi b'amakondere bamuli aha rubaju, abanyansi bona nibeshanda nibatagya amakondere. Atalia atagura enyambarwaze akunga ati, “Mwanshenga! Mwanshenga!”

¹⁵ Nirwo Yehoyada omukuhani yaragiire abakuru b'eihe kumurabya omu njuru z'abaisherukare bakamuturukya; kandi abagambira kwita kaishe muntu aramuhondera. Yehoyada akanga kumwitira Rwensinga y'Omukama.

¹⁶ Kityo bamukwata, bamurabya omu Kihigi ky'Efarasi, bamugobya omu kikaare baba nimwo bamwitira.

Ebyo Yehoyada yashemeize

¹⁷ Yehoyada akwata omukama n'abantu abakoza endagano n'Omukama Ruhanga okwo baraba bantube, ashuba araganisa omukama n'abantu.

¹⁸ Aho abanyansi bona bagenda rwensinga ya Baali bagikambura, ealutare n'ebishushanibye babyatayata. Matani omukuhani wa Baali bamwitira omu maisho ga ealutare ezo. Omukuhani ashuba ataho ab'okulinda Rwensinga y'Omukama.

¹⁹ Akwata abakuru b'eihe, abalinzi b'omukama n'ab'ekikaare, n'abanyansi bona baihya omukama omuli Rwensinga y'Omukama bamutwara omu kikaare, baletwa omu Kihigi ky'Abalinzi.

²⁰ Aho abanyansi bona bashemelerwa n'ekigo kichulera kabamazire kwitira Atalia omu kikaare.

²¹ Yehoashi kugya kutwara engoma akaba aina emyaka mushanju.