2 Abakama 10 - Ebibulia 2001

Eka ya Ahabu nesilika

¹ Ahabu akaba aina abatabani 70 omuli Samaria. Kityo Yehu ahandikira abatwazi b'ekigo kya Samaria, n'abagurusi bamwo hamoi n'abalezi b'abaana ba Ahabu ati,

² “Mpahonu ebarua egi k'erabagoba eti, nk'okwo mwina batabani ba Mukama wanyu, kandi mwina amagali n'efarasi, kwakwo n'ebigo bizingoirwe eboma n'ebikwato,

³ muronde omuli batabani ba Mukama wanyu alikukira bona mumuteke aha nketo ya ishe, murashanire eka ya Mukama wanyu.”

⁴ Kyonkai batina muno munonga bagamba bati, “Abakama babili tibamushoboire, lero ichwe?”

⁵ Kityo ayabaire nakulira ekikaare, n'ayabaire nakulira ekigo bema n'abagurusi n'abalezi, batuma ahali Yehu bati, “Ichwe tuli bairu bawe, kandi eby'oraturagira turabihikya. Titulikwija kuteka muntu wena wena aha ngoma; iwe okore eky'orayenda.”

⁶ Ashuba abahandikira ebarua ya kabili nagamba ati, “Kamuraba muli bange, kandi kamuraba nimwikiliza kumpulira, batabani ba Mukama wanyu mubatemeho emitwe, nyenkya omw'izoba nk'eli muginshangise Yezireeli.” Batabani b'omukama abo nshanju baturaga n'abashaija enyanwanwa z'ekikaare, ababaleraga.

⁷ Orwo ebarua yagobire, bakwata batabani b'omukama babaita, abantu nshanju, emitwe yabo bagiteka omu bitukuru, bagimutwekera Yezireeli.

⁸ Entumwa kayaizire ekamugambira eti, “Baleta emitwe ya batabani b'omukama,” agamba ati, “Bagituume entuumiro ibili aha kishasi ky'ekihigi kuhika bwankya.”

⁹ Aho bwankya kayashohoire, ayemelera, agambira embaga yona ati, “Timwina ntambara. N'inye nashengire Mukama wange nkamwita, kyonkai aisire aba bona n'ohai?

¹⁰ Ahonu mumanye okwo ataliho kigambo na kimoi eky'Omukama yagambiire aha ka ya Ahabu ekiliba kitabaireho; aha rw'okuba agobesheleize ekyo yagambiire omu kanwa k'omwiruwe Eliya.”

¹¹ Ahanyuma Yehu aita bona ab'eka ya Ahabu ababaire basigaireho omuli Yezireeli. Abashaijabe bona enyanwanwa, banywanyibe n'abakuhanibe, tiyasigireho n'omoi.

Okwitwa kw'aba Ahazia

¹² Aho Yehu aimukya agenda Samaria. Kayabaire akyali omu kihanda, ahali Betiekedi ey'Abashumba

¹³ abuganganwaho abanyaruganda ba Ahazia, omukama wa Yuda, ababaza ati, “Inywe muli bahai?” Bamuhorora abati, “Tuli banyaruganda ba Ahazia; tuzindukiire abarangira, na batabani b'Omukamakazi Yezebeli.”

¹⁴ Abaragira abo kubakwata obunyangaro. Babakwata obunyangaro abantu makumi ganai na babili, babaitira aha kiina kya Betiekedi. Tibasigireho n'omoi.

Okwitwa kw'aba Ahabu abandi

¹⁵ Kayarugire aho, abuganganwa Yehonadabu eya Rekabu, naija kumuchwekera. Yehu amushura, amubaza ati, “Oli mwesigwa ahali inye nk'okwo inye ndi mwesigwa ahali iwe?” Yehonadabu amuhorora ati, “Ndi mwesigwa.” Yehu agamba ati, “K'oraba oli mwesigwa mpa omukono.” Aho amuha omukono. Yehu amukwata omukono bakuuba omu gali.

¹⁶ Amugambira ati, “Ija tugende hamoi obone okw'Omukama arandiire omwoyo.” Mara amugambira kuba niwe abuga egali.

¹⁷ Yehu kugoba Samaria aita aba Ahabu bona ababaire basigaireho alemwa abamaraho nk'okwo Omukama yabaire agambiire Eliya.

Yehu naita aba Baali

¹⁸ Yehu ahuruza abantu bona abagambira ati, “Ahabu akakoleraho Baali; kyonkai Yehu naija kumukolera muno.

¹⁹ Aho mbwenu munyetere abarangi ba Baali bona, abakamaufukamira bona n'abakuhanibe bona; atagira yaburaho; kuba ninyija kutambira Baali ekitambo kihango. Araburaho nafa.” Kyonkai Yehu akabikoza obwenge agendeleire kusilikya abafukamira Baali.

²⁰ Aragira kabashemeza ekiro kikuru ky'ekyosi kya Baali. Bakishemeza.

²¹ Yehu atuma omuli Isiraeli yona n'ahali bona abafukamira Baali baija. Taliho ataizire. Bataha rwensinga ya Baali, bagiijura kwema munwa ogu kugoba munwa ogu.

²² Agambira ayalindaga enju eyabikwagamu enyambarwa kuziletera bona abafukamira Baali.

²³ Aho Yehu ataha omuli rwensinga ya Baali hamoi na Yehonadabu, agambira abaizire kufukamira Baali ati, “Mulebe mwekomeleze okwo aha hataliho mwiru wa Mukama shana abafukamira Baali bonkai.”

²⁴ Aho ataha omunda kuhonga ebitambo n'ebihongo by'okwokibwa. Kyonkai aheru akaba ataireyo abashaija 80, yabagambira ati, “Omuntu aratorokya abo nabakwasa akabura, zamulya.”

²⁵ Niho honkai kayamazire kutamba ekitambo ky'okwokibwa, aragira abalinzi n'abakuru ati, “Taha omunda mubaite; hatagira yahonokaho.” Abalinzi abo n'abakuru b'eihe kabamazire kubaisa embanda babajugunya aheru, bashuba bataha omu kiyumba eky'omundakwakwa ya rwensinga ya Baali,

²⁶ baihyayo enyomyo bagyokya.

²⁷ Enyomyo ya Baali bagishekenyura, rwensingaye bagikumbya, bombekaho ekyoroni, kikyabaho na mwaha.

²⁸ Nikwo Yehu yamazireho atyo Baali omuli Isiraeli.

²⁹ Kyonkai kandi tiyalekeire mafu ga Yeroboamu eya Nebati ago yafakaize Isiraeli, kufukamira enyana z'ezahabu ezabaire zili Betheli na Dani.

³⁰ Kyonkai Omukama amugambira ati, “Orwo okozire ebilikunshemelera, n'eka ya Ahabu okagikora okwo mbaire n'inyenda, ebiizimbire byawe bililya engoma ya Isiraeli.”

³¹ Nawe Yehu tiyabaire mwegendeleza kuhikya Mateka ga Mukama Ruhanga wa Isiraeli na mutimagwe gwona. Tiyalekeire mafu ga Yeroboamu ago yafakaize Isiraeli.

³² Omu biro ebyo Omukama abanza kusharaho Isiraeli ebichweka. Hazaeli akasinga ensi ya Isiraeli yona,

³³ kwema Yourudani oburugaizoba, ensi yona ya Gileadi, n'ey'Abagadi, n'ey'Abarubeni, n'ey'Abamanase; kuruga Aroeri omu Ruhanga rwa Arinoni, niyo Gileadi na Bashani.

³⁴ Mbwenu ebindi byona ebyo Yehu yakozire, n'obushoborabwe bwona, bihandikirwe omu Kitabo ky'Amakuru g'Abakama ba Isiraeli.

³⁵ Kityo Yehu atahya, bamubyalira Samaria. Omutabani Yehoahazi alya engoma, amusikira.

³⁶ Emyaka eyo Yehu yamazire aha ngoma natwara Isiraeli ayemire Samaria eli 28.