2 Abakama 1 - Ebibulia 2001

Eliya n'Omukama Ahazia

¹ Ahabu kayabaire yatahize, ensi ya Moabu eshenga eya Isiraeli.

² Omu biro ebyo nirwo Ahazia yarabire omw'idirisha ly'ekiyumbakye eky'omu gorofaye omuli Samaria, akagwa, akarwara. Aho atuma entumwa aziragira ati, “Mugende muraguze ahali Baalizebubu, Ruhanga wa Ekironi, nka ndakira oburwaire obu.”

³ Kyonkai omumalaika w'Omukama agambira Eliya owa Tishibi ati, “Imukya ogende obuganganwe entumwa z'omukama wa Samaria, ozigambire oti, ‘Inywe kugya kuraguza ahali Baalizebubu, Ruhanga wa Ekironi, omuli Isiraeli Ruhanga thalimu?’

⁴ Mbwenu aha rw'ekyo Omukama nagamba ati, ‘Ahazia talikwija kukuburuguka aha kitanda kyo abyamireho, ekiliho amanye okwo alikwija kufa.’ ” Eliya agenda.

⁵ Entumwa ezo zigaruka ow'omukama, omukama azibaza ekyazigarura.

⁶ Zimuhorora ziti, “Haliho omuntu owo twabuganganwa, akatugambira ati, ‘Mushube ow'omukama ayabatuma mumugambire muti, Omukama Ruhanga nagamba ati: Iwe kugya kugira abo watuma kuraguza ahali Baalizebubu, Ruhanga wa Ekironi, omuli Isiraeli Ruhanga thalimu? Aha rw'ekyo tokuburuguke aha kitanda ky'obyamireho, mara nofa.’ ”

⁷ Ababaza ati, “Omuntu ogwo wa ngeliki ayaija kubabuganganwa akabagambira ebigambo ebyo?”

⁸ Bamuhorora bati, “Yaba ajwete ekijwaro ky'obwoya, ayekomire omushumi gw'oruhu omunda.” Abagambira ati, “Ni Eliya Owa Tishibi.”

⁹ Aho Omukama Ahabu amutumaho omukuru w'omutwe gw'abaisherukare 50, n'amakumi gatanuge ago. Agya owa Eliya amushanga ashuntamire aha rushozi eiguru, amugambira ati, “Iwe mushaija wa Ruhanga, ogwo n'Omukama ngu ogyeyo.”

¹⁰ Nawe Eliya ahorora omukuru w'omutwe gw'abaisherukare makumi gatanu ati, “Kandaba ndi mushaija wa Ruhanga omuliro nigukaruge omw'iguru gukwokye n'abaisherukare makumi gatanu gawe ago.” Aho omuliro guruga omw'iguru gumwokya n'amakumi gatanuge.

¹¹ Omukama Ahabu ashuba amutumaho omukuru ondijo ow'omutwe gw'abaisherukare 50 hamoi n'abaisherukare abo. Amugoba amugambira ati, “Iwe mushaija wa Ruhanga, omukama nakuragira ngu osongoke bwangu.”

¹² Nawe Eliya abahorora ati, “Kandaba ndi mushaija wa Ruhanga, omuliro nigukaruge omw'iguru gukwokye n'agatanu gawe ago.” Aho Ruhanga ayema omw'iguru ataishura omuliro, gumwokya n'amakumi gatanuge.

¹³ Ahazia ashuba atuma omukuru wa kashatu ow'agatanu n'agatanuge. Ogwo nawe agenda, agoba Eliya, amugwa omu maguru, amutagiliza ati, “Waitu iwe mushaija wa Ruhanga, ninkutagiliza otanyita, n'abairu bawe aba 50 abakuli omu maisho otabaita.

¹⁴ Nobona okwo omuliro gurugire omw'iguru gukaita abakuru bombili ab'emitwe y'abaisherukare gatanu n'agatanu gabo; kyonkai mbwenu inye onganyire olikasinga.”

¹⁵ Aho omumalaika w'Omukama agambira Eliya ati, “Ogende nawe, otamutina.” Eliya aimukya, agenda nawe obuso,

¹⁶ agambira omukama ati, “Omukama Ruhanga nagamba ati, ‘Ahakuba otumire entumwa kuraguza ahali Baalizebubu, Ruhanga wa Ekironi okw'obon'oti omuli Isiraeli thalimu Ruhanga ow'okuraguzaho okabona ekigambokye, tokuburuguke aha kitanda ky'obyamireho, mazima nofa.’ ”

¹⁷ Kityo Ahazia atahya nk'okwo Omukama Ruhanga yabaire agambiire omu kanwa ka Eliya. Mara tiyasigire mwana, akasikirwa omurumuna Yehoramu, guli mwaka gwa kabili Yehoramu eya Yehoshafati omukama wa Yuda aliire engoma.

¹⁸ Ebindi byona ebyo Ahazia yakozire bihandikirwe omu Kitabo ky'Amakuru g'Abakama ba Isiraeli.