1 Samweli 6 - Ebibulia 2001

Esanduku y'Endagano negaruka

¹ Esanduku y'Endagano ekaikara omu nsi y'Abafilisiti emyezi mushanju.

² Abafilisiti beta abakuhani n'abafumu bababaza bati, “Esanduku y'Omukama tugigire tutai? Mutumanyise okwo turagigarurayo.”

³ Abakuhani n'abafumu babagira bati, “Kamuragarurayo Esanduku ya Ruhanga wa Isiraeli, mutagigarurayo bushai. Mugire ekyo mwagitaho kuliha obufu bwanyu nirwo murakira. Aho nirwo muramanya ekyo abaire naikara ababonaboneize.”

⁴ Abafilisiti babaza bati, “Ndihiki eyo turamugilira?” Bagamba bati, “Ebizimba by'ezahabu bitanu n'embeba z'ezahabu itanu, kuhonderana n'orubara rw'abatwazi banyu, okuba inywena hamoi n'abatwazi banyu muteirwe ekibundo kimoi.

⁵ Aha rw'ekyo mukore ebishushani by'ebizimba byanyu, n'eby'embeba zanyu ezilikwita ensi, mara muhe Ruhanga wa Isiraeli ekitinwa, rundi yakulekera kubabonabonyia na baruhanga banyu n'ensi yanyu.

⁶ Kubaki nimusikiira emitima nka Farao n'Abamisiri? Orwo Ruhanga yabahindwire bafera tirwo bataishwire Abaisiraeli bakagenda?

⁷ Ahonu mbwenu kwata egali emoi empya muzikome aha nte ibili ezilikwonkya ezitakakomwagaho nkomo, kyonkai enyana ezo muzizihyeho muzishubye omuka.

⁸ Mukwate Esanduku y'Omukama mugite omu gali, kandi eshanduku endijo egili aha rubaju mugitemu ebintu by'ezahabu eby'okumulihira mugitaishure egende.

⁹ Kandi mulebe; k'eragenda eyolekeire ensi yayo, Betishemeshi, nikwo kugir'oti Ruhanga wa Isiraeli niwe atuteize ekibundo ky'amani eki. Kakitabaire kityo, turamanya okwo tiwe atuhaire kibonabonyio, kitugwireho bushai.”

¹⁰ Abafilisiti abo bakora batyo. Bakwata ente ibili ezilikwonkya, bazikomaho egali, kandi enyana zazo bazikomerana omu nju.

¹¹ Egali bagitamu Esanduku y'Omukama, n'eshanduku elimu embeba z'ezahabu, n'ebishushani by'ebizimba byabo.

¹² Ente zikwatira kimoi nyaihanda elikugya Betishemeshi; zigenda nizijuga, zitalikuhinduka bulyo anga bumosho, mara abatwazi b'Abafilisiti bagenda bazihondeire kulemwa kuhika omu rubibi rwa Betishemeshi.

¹³ Omu kanya ako abantu ba Betishemeshi bakaba nibagesha engano omu ruhanga. Kabanagire amaisho bakabona Esanduku bashemelerwa.

¹⁴ Egali egoba omu ndimiro ya Yoshua Omubetishemeshi, eba nimwo eyemelera. Hakaba haliho eibare lihango. Basa emiti y'egali, ente bazitambira Omukama ekitambo ky'okwokibwa.

¹⁵ Esanduku y'Omukama n'esanduku eyabaire egili aha rubaju einamu ebintu by'ezahabu, Abalevita bazita aha ibare lihango. Kir'ekyo abantu ba Betishemeshi batambira Omukama ebitambo by'okwokibwa, bamutambira n'ebitambo ebindi.

¹⁶ Abatwazi batanu b'Abafilisiti kabaaboine byaba bityo, kiro kyonene ekyo bagaruka Ekironi.

¹⁷ Ebi nibyo bizimba by'ezahabu eby'Abafilisiti balesire nk'endihi aha Mukama: Ekya Ashidodi kimoi, ekya Gaza kimoi, ekya Ashikeloni kimoi, ekya Gati kimoi n'ekya Ekironi kimoi.

¹⁸ N'embeba z'ezahabu kuhonderana n'orubara rw'ebigo by'Abafilisiti ezatwarwaga abatwazi batanu bizingoirwe enkuta n'ebyaro. Eibare lihango ely'omu ndimiro ya Yoshua Omubetishemeshi elyo bataireho Esanduku y'Omukama, bujulizi bw'ebyabaireho kugoba mwaha.

¹⁹ Omukama akaita abantu nshanju ba Betishemeshi okuba bakalinguliza omu Sandukuye. Aho abantu bachura orwo yabateize ekibundo kihango kityo.

²⁰ Ahanyuma abantu ba Betishemeshi bagamba bati, “N'ohai ayakushobora kwemelera omu maisho g'Omukama Ruhanga ogu Omutakatifu? Esanduku egi eturugeho, manya egye owa bahai?”

²¹ Aho batuma entumwa aha banyansi ba Kiriatiyearimu, nibagamba bati, “Abafilisiti bagarwire Esanduku y'Omukama. Abafilisiti bagigarwire, mwije mugitware owanyu.”