1 Samweli 30 - Ebibulia 2001

Daudi narashanisa Abaamaleki

¹ Orwo Daudi n'abashaijabe bagobire Zikilagi aha kiro kya kashatu, Abaamaleki bashangwa banyagire Negebu na Zikilagi. Bakaba bateire Zikilagi bagyokya n'omuliro.

² Abakazi na bona ababaire bagilimu, abajege n'abahango, babatwara endore. Tibaisire muntu n'omoi, kyonkai bahwa nabo, bagenda.

³ Daudi n'abashaijabe kwija omu kigo, bashanga kyokize, abakazi babo n'abana babo batwetwe endore.

⁴ Aho Daudi n'abantu abo yabaire ainabo bachura, balemwa baburwa n'agachura.

⁵ Baka Daudi bombili: Ahinoamu owa Yezireeli na Abigaili muka Nabali kifa owa Karimeli, nabo bakaba batwetwe endore.

⁶ Daudi ajunara muno aha rw'abantu kugamba kumuteza amabare, nobona bona bakaba nibashanshagazibwa abana babo. Kyonkai Daudi ayegumisiliza ayekwete Omukama Ruhangawe.

⁷ Aho Daudi agambira Abiatari omukuhani, mutabani wa Ahimeleki ati, “Ndetera efodi.” Abiatari agimuletera.

⁸ Daudi abaza aha Mukama ati, “Mbinge abanyagi aba, ndabakwata?” Amuhorora ati, “Obabinge; noija kubakwatakwo okabaka n'eminyago.”

⁹ Nikwo Daudi kwimukya n'abashaija 600 abo yabaire ainabo. Bagoba aha Kaiga ka Besori mbali abandi basigaire.

¹⁰ Kyonkai Daudi n'abashaija 400 baguma babingire ababisha. Ebikumi bibili basigara enyuma; bakaba balemirwe muno, agashabuka Akaiga ka Besori gayanga.

¹¹ Bagwamu Omumisiri omw'itarabuga, bamuletera Daudi. Bamuha ekyakulya alya, n'amaizi g'okunywa.

¹² Bamuhaho n'omukate gw'etini, n'engoobe ibili z'ezabibu. Kayabaire yaliire agarukwamu akoyo, enshonga emishana eshatu n'ebiro byaho akaba atakaliire kakulya handiki kunywa maizi.

¹³ Daudi amubaza ati, “Oli w'ohai? Isi oli wa nkahai?” Agamba ati, “Ndi musigazi wa Misiri, omwiru w'Omuamaleki. Orwo ndwaire ebiro bishatu ebihingwire mukama wange yannaga.

¹⁴ Tubaire tunyagire Negebu ey'Abakereti na Negebu eya Yuda na Negebu eya Kalebu, kandi twayokya Zikilagi n'omuliro.”

¹⁵ Daudi amubaza ati, “Wakuntwara mbali abashuga aba bali?” Ogu ati, “Onnahilire obuso bwa Ruhanga okwo otanyite, anga okwo otannage mu mikono ya mukama wange; aho ndakutwara mbali abashuga aba bali.”

¹⁶ Kayamugobizeyo abashanga bemaliire ensi yona nibalya, nibanywa, nibazina, aha rw'eminyago ey'amaani eyo banyagire omu nsi ya Filisitia na Yuda.

¹⁷ Daudi abaita kwema aha kalemba bazana kugoba bwaigoro obwa bukeire bunu. Tibahungireho muntu n'omoi shana abasigazi 400 abakuubire engamia bakairuka.

¹⁸ Anyaguruza bona ab'Abaamaleki babaire batwete na bakazibe bombili.

¹⁹ Thaliho kyabuzireho, kibe kike anga kihango, babe bana bojo anga bana baisiki, gube munyago anga kyona kyona ekyabaire kitwetwe. Daudi akabigarura byona.

²⁰ Ashuba anyaga amahyo gona ag'entaama n'ag'ente. Abantu bafunya ebitunganwa ebyo bagenda bamwebembeire, bagamba bati, “Eminyago egi ya Daudi.”

Nibabegana eminyago

²¹ Daudi agobera abashaija 200 ababaire balemirwe muno kutashobora kumuhondera, bakasigara aha Kaiga ka Besori. Baija kumuchwekera n'abo yabaire ainabo. Daudi kayabagobire abashura.

²² Aho empwabujwa omu bashaija ezabaire zitabaire na Daudi zigamba ziti, “Orwo batatabaire naichwe, titulikwija kubahaho minyago eyo twanyaguruza, shana buli muntu akwate mukaziwe n'abanabe agende.”

²³ Kyonkai Daudi agamba ati, “Barumuna bange, eby'Omukama yatutunga mutabigira mutyo. Atulinzire, yamara yatuha abashuga ababaire batutabaliire.

²⁴ N'ohai alikwija kubaikiliza aha kigambo eki? Nk'okw'omugabo gw'ayatabara omu ndashana gwigana nikwo omugabo gw'ayaikara aha migugu guraba. Babeganirwe kumoi.”

²⁵ Kwema kir'ekyo aragira kakiba kiragiro, mara mugenzo omuli Isiraeli na mambwenu.

²⁶ Orwo Daudi yagobire Zikilagi, atwekeraho batahibe, abagurusi ba Yuda, eminyago, nagamba ati, “Eki kigemuro kyanyu aha minyago eyo tunyagire ababisha b'Omukama.”

²⁷ Akitweka kili ky'aba Betheli, Ramoti na Negebu, Yatiri;

²⁸ Aroeri, Sifumoti, Eshitemoa;

²⁹ Rakali, ab'ebigo by'Abayerahimeeli, ab'ebigo by'Abakeni;

³⁰ Horima, Borashana, Ataki;

³¹ Heburoni na hona mbali abashaijabe babaire baikaire nibatera oku n'oku.