1 Samweli 3 - Ebibulia 2001

Omukama nahabukira Samweli

¹ Omwana Samweli akolera Omukama omu mikono ya Eli. Mara omu bir'ebyo ekigambo ky'Omukama kikaba kihambire, n'okubonekerwa kukaba kutaliho.

² Omu kiro kimoi Eli abyamire omu kiyumbakye, mara aho yabandize kuhuma amaisho atakibonage,

³ etara ya Ruhanga etakaraire, na Samweli abyamire omuli Rwensinga y'Omukama mbali Esanduku ya Ruhanga yabaire eli,

⁴ Omukama ayeta Samweli. Samweli ayetabuka ati, “Kaboneke waitu!”

⁵ Airuka agoba Eli amugambira ati, “Waitu wanyeta, naizire.” Kyonkai Eli amugira ati, “Tinkakwesire, oshubeyo obyame.” Agarukayo abyama.

⁶ Omukama ashuba ayeta ati, “Samweli.” Aho Samweli aimuka agya agoba Eli, amugambira ati, “Waitu, wanyeta, naizire.” Kyonkai Eli amugambira ati, “Mwana wange, tinkakwesire, oshubeyo obyame.”

⁷ Samweli akaba atakamanyire Mukama mara ataina kigambo kyoyamushuruliire.

⁸ Omukama ashuba ayeta Samweli omurundi gwa kashatu. Aimuka agya ahali Eli amugambira ati, “Waitu, wanyeta naizire.” Ahanyuma Eli akenga okwo Omukama niwe alikweta omwana ogwo.

⁹ Nikwo Eli kugambira Samweli ati, “Ogende obyame, k'arashuba akakweta ogambe oti, ‘Mukama hanga, kuba omwiru wawe nahulira.’ ” Samweli ashuba omu kiyumbakye abyama.

¹⁰ Omukama aija ayemelera, ayeta nk'orwa mbere ati, “Samweli, Samweli.” Samweli ahorora ati, “Mukama hanga, kuba omwiru wawe nahulira.”

¹¹ Aho Omukama amugambira ati, “Ekiro kimoi nyina ekyo ndikora omuli Isiraeli; buli omoi alikihulira amatwi galimwana.

¹² Kir'ekyo nirwo ndigobesheleza byona ebyo nagambire kugwera eka ya Eli.

¹³ Namugambire okwo ndibonabonyia ekaye ebiro byona aha rw'entambara ey'alikumanya, kuba abatabani bakandogotaho tiyabatangire.

¹⁴ Nikwo ndikurahilira ekaye okwo entambara yabo ebiro byona thaliho kitambo anga kihongo kiligyatilira.”

¹⁵ Samweli abyama akeisa obwire; kayaimukire akingura enyigi za Rwensinga y'Omukama. Ebyo yaboine akatina kubigambira Eli.

¹⁶ Nawe Eli amweta ati, “Samweli, mwana wange!” Ayetaba ati, “Kaboneke waitu!”

¹⁷ Amubaza ati, “Omukama akugambiireki? Otansheleka. Otakugira kyowansheleka akaija akakubonabonyia kubi.”

¹⁸ Aho Samweli amugambira buli kantu, tiyamushelekire. Eli agamba ati, “Niwe Mukama, akore okwo arayenda.”

¹⁹ Samweli akura, n'Omukama amusingira, n'ebyo yamugambiire akabigobesheleza byona.

²⁰ Isiraeli yona kwema Dani kugoba Beersheba emanya okwo Omukama ataireho Samweli kuba murangiwe.

²¹ Kandi Omukama agendelera kuhabukira omuli Shilo, nabonekera Samweli omu byo yamutumaga. Kayagambaga baisiraeli bamuhuliliza bona.