1 Samweli 29 - Ebibulia 2001

Abafilisiti nibanga kutabara na Daudi

¹ Abafilisiti amahe gabo gona bagashoroleza Afeki. Abaisiraeli bakaba basisiire aha nchuro omuli Yezireeli.

² Abatwazi b'Abafilisiti kababaire nibahingura bali omu mitwe y'ebikumi n'enkumi, kandi Daudi n'abashaijabe nibahingura enyuma baina Akishi,

³ abakuru b'amahe g'Abafilisiti bagamba bati, “Abaheburania aba nibakoraki aha?” Akishi abagambira ati, “Ogu ni Daudi omwiru wa Shauli, omukama wa Isiraeli, kanya aka twamazire hamoi amakiro; kwema ampungiireho tinkamubonagaho muze kuhika kir'eki.”

⁴ Kyonkai abakuru b'amahe g'Abafilisiti bamukwatirwa ekiniga, bamugambira bati, “Garurayo omushaija ogu ashube mbali wamutaire. Talikwija kutabara naichwe mu ndashana, ataija akatuhinduka omu ndashana omwo. Omuntu ogu nahiga kutwita gube muhanda gw'okuchwa amaiko na mukamawe.

⁵ Ogu ti Daudi owo bazina nibahororangana omu mayaga bakwese, ‘Shauli akaita enkumize, Daudi obukumibwe?’ ”

⁶ Ahanyuma Akishi ayeta Daudi amugambira ati, “Obuso bw'Omukama, obaire oli mwesigwa, kandi omu bwange naba nimbona kili kirungi kutabara nanye, tukatabaruka ahamoi, enshonga kwema oizire owange kugoba kir'eki tinkakubonagamu kabi. Kyonkai abatwazi tibalikukusiima.

⁷ Ahonu mbwenu ogarukeyo. Ogende n'emilembe otakwija okatamisa abatwazi b'Abafilisiti.”

⁸ Daudi amubaza ati, “Kyonkai nkozireki? Omwiru wawe omuboinemuki kwema mbandize kukukolera kuhika mwaha kutagenda kurashanira babisha ba Rugaba Omukama wange?”

⁹ Akishi amuhorora ati, “Omu mibonere yange nimanya okw'oli nyakatetere nk'omumalaika wa Ruhanga. Kyonkai abakuru b'amahe g'Abafilisiti bagambire bati, ‘Atakutabara naichwe mu ndashana.’

¹⁰ Ahonu mbwenu oimuke bwankya karai n'abairu ba mukama wawe abo waizire nabo, orwo harabona mugende.”

¹¹ Kityo Daudi aimukya bwankya karai n'abashaijabe batabaruka bashuba Filisitia. Kyonkai Abafilisiti batemba Yezireeli.