1 Samweli 26 - Ebibulia 2001

Daudi nayanga omurundi gwa kabili kwita Shauli

¹ Abazifi baija Gibea ahali Shauli nibagamba bati, “Daudi ayeshelekire omw'Ibanga lya Hikila oburugaizoba bwa Yeshimoni.”

² Shauli akwata omuhanda agya Omw'Irungu lya Zifu n'abashaija 3,000 endondwa omuli Isiraeli kuhiga Daudi omw'irungu elyo.

³ Asisira aha rushozi rwa Hakila bwatana aha muhanda gw'oburugaizoba bwa Yeshimoni. Kyonkai Daudi aikara omw'irungu. Kayaboine okwo Shauli yamuhonderayo,

⁴ atweka abanyomozi, amanyuruza kabutekire okwo Shauli yaizire.

⁵ Aho aija mbali Shauli yabaire asisiire, abona mbali abyamire, hamoi na Abuneri mutabani wa Neri, omugabe w'eihelye. Shauli akaba abyamire omu rusisira omunda, n'eihe lisisiire limuzingoire.

⁶ Aho Daudi abaza Ahimeleki Omuhiti, na Abishai murumuna Yoabu mutabani wa Seruya ati, “Ahali inywe omu babili n'ohai owo turagenda hamoi omu rusisira mbali Shauli ali?” Abishai ahorora ati, “N'inye ndagyayo naiwe.”

⁷ Kityo Daudi na Abishai bagendera eihe omu kiro. Shauli akaba abyamire omu rusisira omunda anagiire, eichumulye lisimbire omw'itaka aha mutwegwe. Abuneri n'eihe babyamire bamuzingoire.

⁸ Aho Abishai agambira Daudi ati, “Kir'eki Ruhanga yakuha omubisha wawe. Mpahonu mbwenu kamutere eichumu omurundi gumoi gwonkai mubambijanyie aha itaka, tindikwija kumutera lya kabili.”

⁹ Kyonkai Daudi amugarukamu ati, “Otamwita! N'ohai ayakwita enkorwa majuta y'Omukama atakwetwe ntambara?”

¹⁰ Ashuba ati, “Obuso bw'Omukama, Omukama niwe alimwita, anga ekirokye kiligoba ayefere, anga agye omu ndashana agweyo.

¹¹ Nikikabure, inye kwita enkorwa majuta y'Omukama. Kyonkai kwata eichumu elimuli aha mutwe, n'enjoga y'amaizi, tugende.”

¹² Wenene Daudi aba niwe aihya eichumu n'enjoga y'amaizi ebyabaire bili aha mutwe gwa Shauli, bagenda. Thaliho muntu yakiboine anga kukimanya, anga wena wena kusisimuka, kuba bakaba banagiire bona. Omukama akaba abanagiize muno.

¹³ Daudi agenda buseli bunu ayemelera aha ibanga eiguru, asigamu akatambi omugati yabo,

¹⁴ ayeta eihe, na Abuneri mutabani wa Neri, nagamba ati, “Abuneri tohorora?” Aho Abuneri ahorora ati, “Waba ohai iwe alikweta omukama?”

¹⁵ Daudi amugambira ati, “Iwe toli mushaija? N'ohai omuli Isiraeli alikukushusha? Kubaki otalikulinda mukama rugaba rwawe? Omuntu omoi yaba aizire kumwita.

¹⁶ Ekyo wakora ekyo ti kirungi. Obuso bw'Omukama, oli w'okufa, orwo otalinda mukama wawe enkorwa majuta y'Omukama. Mbwenu leba mbali eichumu ly'omukama lili, n'enjoga y'amaizi ebyaba bili aha mutwegwe.”

¹⁷ Shauli amanya eiraka lya Daudi, abaza ati, “Daudi mwana wange, eli iraka lyawe?” Daudi agamba ati, “Iraka lyange, rugaba omukama.

¹⁸ Mukama wange kubaki nompigiliza inye omwiru wawe? Nkozireki? Nyina ntambaraki eyo nkozire?

¹⁹ Rugaba Omukama singa ohulire ebyo ndikukugambira. K'Omukama araba niwe akunchokeize, asinge akunde ekihongo. Kabaraba bali bantu, obuso bw'Omukama nibakaraamwe, aha rw'okuba bambinga omu nsi y'Omukama Ruhanga ntasikamu nibagamba bati, ‘Genda ofukamire baruhanga abandi.’

²⁰ Mbwenu aha rw'ekyo ndeka ngwe omu mabona g'Omukama Ruhanga, eshonga omukama wa Isiraeli atabaire kunyita, nk'okwo omuntu ahiga endahi omu mabanga.”

²¹ Aho Shauli agamba ati, “Nshobize. Mwana wange Daudi garuka, tinkyakukora kubi, kuba omu kiro onganyire tiwanyita. Leba mbaire mufera, nataza nashagulirana.”

²² Daudi ahorora ati, “Eichumu nily'eli, Rugaba! Omusigazi omoi aije alitore.

²³ Omukama Ruhanga arongora buli omoi aha rw'oburungibwe, n'obwesigwabwe, aha rw'enshonga mbwenu Omukama yaba akumpaire, kyonkai tinaimukya mukono kwita nkorwa majutaye.

²⁴ Okwo kir'eki nakuleka ntakwisire Omukama Ruhanga asinge ampungye atyo anyihure omu biyengo byona.”

²⁵ Aho Shauli amugambira ati, “Mwana wange Daudi obe kilimugisha! Noija kukora ebintu bingi mara ogoshoke.” Aho Daudi agendabwe, na Shauli agaruka omuka.