1 Samweli 25 - Ebibulia 2001

Okufa kwa Samweli

¹ Samweli afa. Isiraeli yona ehurura emuchulira; bamuzika Rama omwe. Ahanyuma Daudi agya omw'irungu lya Parani.

Daudi na Nabali

² Hakaba haliho omuntu omuli Maoni, mara aina ebyo yakoraga Karimeli. Akaba ali mutungi muno, aina entaama 3,000 n'embuzi 1,000. Akashangwa ali Karimeli nashara entaamaze obwoya.

³ Eibaralye akaba ali Nabali, na mukaziwe eibaralye ni Abigaili. Omukazi akaba ali mushobokerwa mara ali murungi, kyonkai omushaija akaba ali mukoma kandi ali ngwagwa. Akaba ali Mukalebu.

⁴ Daudi ahulira omw'irungu okwo Nabali yabaire nashara entaamaze obwoya.

⁵ Atuma abasigazi 10 abagambira ati, “Mugye Karimeli owa Nabali mumushulire.

⁶ Mumushure muti, ‘Ogire emilembe, n'eka yawe egire emilembe, na byona eby'oinabyo bigire emilembe.

⁷ Nimpulira ngu oina abashazi b'obwoya. Abashumba bawe tubaire twinabo kyonkai titubakozire kubi. Kandi ebiro byona ebyo babaire bali Karimeli tibabuzirwe kantu.

⁸ Obaze abasigazi bawe barakugambira. Aha rw'ekyo abasigazi bange obakilire kurungi, ahakuba twaija aha kiro kikuru. Ninkushaba abairu bawe na mutabani wawe Daudi obahe kyona kyona aky'oinakyo.’ ”

⁹ Abasigazi kabagobire, bagambira Nabali ebi byona omw'ibara lya Daudi; bashuba balindaho.

¹⁰ Nabali ababaza ati, “Daudi n'ohai? Mutabani wa Yese n'ohai? Bir'ebi bhaliho abairu bangi abalikusigaho bakama babo.

¹¹ Nkwate ekyakulya kyange n'amaizi n'enyama yange eyo mbagiire abashazi bange b'obwoya mpe abantu abo ntalikumanya mbali balikuruga?”

¹² Aho abasigazi ba Daudi bagaruka bamugambira byona.

¹³ Daudi agambira abashaijabe ati, “Buli muntu ayekome embanda.” Buli muntu ayekoma embanda; Daudi kwakwo agyekoma. Abantu nka 400 bamuhondera kandi 200 basigara n'emigugu.

Abigaili nagwisiliza Daudi

¹⁴ Kyonkai omusigazi omoi agambira Abigaili, muka Nabali ati, “Daudi ayemire omw'irungu yatuma entumwa kuramya mukama waitu; kyonkai wenene yabarotokera.

¹⁵ Okwo abashaija bakatubera barungi muno, batukorage, mara titwabuzirwe kantu orwo twakagendaga nabo omw'irungu.

¹⁶ Bakaba bali ngabo yaitu ekiro n'omushana omwanya gwona ogwo twabaire twinabo nitulisa entaama.

¹⁷ Aha rw'ekyo eki okimanye mara otekeleze ekyo orakora. Nobona nibagonza kukora kubi mukama waitu n'ekaye yona, kandi agira emize mibi taliho n'omoi yakumugambira kantu.”

¹⁸ Abigaili ayanguha akwata emikate 200, n'enfulebe ibili z'edivai, embagwa z'entaama itanu, ebipimo bitanu by'engano ebabwire, engoobe 100 z'ezabibu, n'emikate 200 y'etini, 200, abiteka aha ndogobe.

¹⁹ Agambira abasigazibe ati, “Munyebembere, nanye mbahondeire.” Kyonkai Nabali iba tiyamugambiire.

²⁰ Kayabaire ali aha ndogobe nasoka asiikirwe eibanga, Daudi n'abantube nabo basongoka bamutahiremu. Ababuganganwa.

²¹ Daudi akaba yagambire ati, “Mazima amani gange gafire bushai kulinda eitunga ly'omuntu ogu lyona omw'irungu, hataliho kilikye kyona kyona ekibuzire; aha rw'ebirungi yandongora ebibi.

²² Ruhanga anyite bwita, kwija kugoba bwankya kandaba nsigireho buzima omushaija omoi omu bashaijabe bona.”

²³ Orwo Abigaili yaboine Daudi ayanguha, akuburuguka aha ndogobe, amubandamira.

²⁴ Amugwa omu maguru ashuba agamba ati, “Entambara ekwate inye, Rugaba. Ninkutagiliza ohulire omuzana wawe akugambiire, ohulire ebigambo by'omuzana wawe.

²⁵ Mukama wange, atafaho muntu ogu Nabali ow'emize, okwo eibaralye lili, na wenene nikwo ali. Eibaralye ni Nabali, mara aba mulenga. Kyonkai inye omuzana wawe abasigazi bawe Rugaba, ab'otumire timbaboine.

²⁶ Aho mbwenu, Rugaba, obuso bw'Omukama, mara mwoyo gwawe, okw'Omukama akutangire obwitamuntu, na iwe wenene kwehoroza, aho ababisha bawe na balinya abalikwenda kukukora kubi, babe nka Nabali.

²⁷ Ebigemuro ebi ebyo nakuletera, mukama wange, singa obihe abasigazi ab'olikutabara nabo.

²⁸ Singa banganyire entambara yange, kuba Omukama naija kukuha obukama obuli bukama, orwo alikumurashanira. Oburora bwawe bwona tolizokwamu kabi.

²⁹ K'abantu bakukubinga kukwita, orashangwa nobaliranwa omu bantu abalindwa Omukama Ruhanga wawe. Ababisha bawe arabachunkya oti yabachunkisa ekihubeezo.

³⁰ Orwo Omukama araba yakukoleire ebirungi byona nk'okwo yakuraganisize, mukama wange, yakutaireho kuba mukama wa Isiraeli,

³¹ Rugaba otalija okechuza handiki kuterwa nkuratima aha rw'okushangwa oisire omuntu hataliho nshonga, anga aha rw'okushangwa ayehoroize. Omukama k'aliba yakugizirege, Rugaba, aho baliijuka omuzana wawe.”

³² Daudi agambira Abigaili ati, “Omukama Ruhanga wa Isiraeli, asingizibwe, ayakusindika kir'eki kwija kuntanganwa!

³³ Gaberwa amagezi gawe, na iwe oli muberwa iwe ayantanga kwehoroza nkaita omuntu!

³⁴ Ninkurahilira obuso bw'Omukama Ruhanga wa Isiraeli ayantanga kukwita. Kuba otayanguha okaija kuntanganwa, mazima butakeire Nabali yaba atalikusigara na mushaija n'omoi.”

³⁵ Aho Daudi amutora ebyo yabaire amuleterire. Ashuba amugambira ati, “Ogaruke omuka n'emilembe; ebyo wagamba nabihulira, n'ekyo wataka nakikuha.”

³⁶ Abigaili agobera Nabali; amushanga omwe nakora obugenyi oti bw'omukama. Nabali akaba yabaiire muntu ondijo, enshonga akaba yatamire muno. Kityo tiyamugambiire kantu kulemwa kugoba bukeire.

³⁷ Bwankya Nabali edivai yamurugireho, mukaziwe amugambira ebigambo ebyo; atina muno, agandara nk'eibare.

³⁸ Kahahingwireho ebiro nka 10 Omukama Ruhanga aita Nabali.

Daudi nashwera Abigaili

³⁹ Orwo Daudi yahuliire okwo Nabali yafa, agamba ati, “Asingizibwa Omukama ayayehora ekijumi ekyo Nabali anjumire, akantanga kukora kubi. Ebibi bya Nabali Omukama yabimuziza wenene wenene.” Ahanyuma atumaho Abigaili namuragiraho k'aba mukaziwe.

⁴⁰ Orwo abairube bagobire Karimeli ahali Abigaili bamugambira bati, “Daudi yatutuma ahali iwe, katukutwara okaba mukaziwe.”

⁴¹ Aimuka, abandama obuso bukanga aha itaka, agamba ati, “Leba, ndi muzanawe, ngye nabise abairube ebilenge.”

⁴² Ayanguha akuuba endogobe, abazanabe bontanu bamushemba. Akuratira entumwa za Daudi, agenda aba mukaziwe.

⁴³ Daudi ashwera na Ahinoamu owa Yezireeli. Bombili baba bakazibe.

⁴⁴ Kyonkai Mikali mukaziwe, Shauli ishe akaba yamusiigiire Paluti mutabani wa Laisha ow'ekigo kya Galimu.